Nhiara 30 - Alkitab bahasa Luang

Itmatromlawanni Makdenrer die, Nala yamuki-yahepru na Nhernia yatipu-yatiani

¹ Hadi de Daud ya'ulli-yawedni la'a wniatunnu-wniahniarni maka ha rwahniar la'a rwatia roma krei kniarni:

² A'u'uli-uwedia O'a Matroma! Yoma O' mak kamori-kalewn a'u. O' edonna Muolin limmu mai a' pua a arwa'lu re riarin taru la yamalli pa rhi'a mola-ma' targ' a'u.

³ Uplerlawnu ne! A puol lia O'a! Matro'mu ed mak ktulan oleka mai a' pua a kalwied la'a a nie'nu-nhie'nu.

⁴ O' ed mak kahal doin a lia'a matmiati-molmuolu ralamni, me Mkenia a lia'a mormiori-lewlewna ralamni. O' edon Muolin doin a pua rie' wut lia mak kerun la noh mati-rai miolu.

⁵ Miy miak klernohor reri Itmatromlawanni Makdenrer die, miy mpiahniara nhiara ya'uli-yawedi la Itmatromlawanni. Mi'uli-miwedia Itmatromlawanni mak kden la mounu-witanni ralamni.

⁶ Itmatromlawanni hankeranni-ralmha'arni de edon nodi pa nodi liarni, mere pleta-plet pa namdiarua pa nawali owa'an la ralam kalwiedni. La' a mormio'ru tetema, de aliernan E ralam kalwiedni de. La' emkameni ho'mana lera nmel wa de a'g e koko'a-herer a'u, mere hota la' repardoin wa dewade niniha-malmiali a' owa'an wa.

⁷ La' ler maka adiella kalwiedni-paitiotni ralamni de, de agatniekame hota a'g edon lier la yatyatni-halalli.

⁸ Yoma la O kalwiedmu mai a'u Matroma O Mhi' a' die emeknekama ili-watu wo'ora mak karuri-ka'orta. Mere la' ler maka alier la susa ralamni de a'umta'at wenn a'u pa awuarora de: “Ine! Uplerlawna Nolin doin olek limni mai a'g ee!”

⁹ Alier la polpuol ina-wakwak ama pa, apuol lia O'a,

¹⁰ giwra: “La'pa amuat die hota Omliernana unut lawna hya'a Matrome?! Riy mak kmati olekwa mana ta'enniana ra'uli-rawed re'ru Matroma! La'pa amuat die ta'enniana wuahaur nohor owa'ana O kalwiedmu-paitiotmu mai a' pua nodi liarni!

¹¹ Mlinreri-muatreria a'u Matroma! totpena Mtiulla-msiayn a'u. O' to' ed mak ktulan mai a'u.”

¹² A yatipu-yatnia'nu de O Mual oleka yamuki-yahepru ma Mhuernia. O' ed mak ka'ala a ralam mawlu pa O Muala niniha-malmiali ma Mhuernia.

¹³ Pede hota la' hadiwa de a'g edonna riwa li'mu mere a'u'uli-uwed rer O'a Matroma. Uplerlawnu ne! Hota a gala a tu'nu-nhia'ru pa a'u'uli-uwedia O'a Matroma pa nodi liarni.