Nhiara 29 - Alkitab bahasa Luang

Itmatromlawanni Makdenrer die, Ntutga plolli-mneheni la anin lawna ralamni

¹ Daud ya'ulli-yawedni la'a wniatunnu-wniahniarni: Uplerlawna hopopanni-lili'irnu la'a Ilyamou-Watyatoha miy re! Mmiai pia mi'uli-miwedi mhiu'ru-mhielma mlilili-mmiamuawua Orgahi-Orha'a Uplerlawna-Mempulwatnu onnila E preheni-mkaini hititni-repreparni nora E plolli-mneheni.

² Mi'uli-miwed reria E'a yoma E nanni ed mak kden la tutullu-lolo'oni. Mtiuk lia E', mak kamrehi-kamda'ar nohora liplipni-kamka'mani momuounu-witwitanni.

³ Orgahi-Orha'a Uplerlawna-Mempulwatnu Nhar lirni pa nlola tah'i lawna wawannu pa nmai die prahkani emeknekama kukru-gauru, me yetanni (wniahlani) lola hletan lawna-yoir lawna wawannu.

⁴ Orgahi-Orha'a Nhar lirni de npenpuen niohora tniorna-riautu nor wutga preheni-mkaini.

⁵ Lirni nodia upkarururu pa nwakloli-nwaklalia ora-au liawna, ne agaria on lalawna mak kden la'a Libanon ho'mana kdielu-kliatna pala patia.

⁶ Orgahi-Orha'a Nhi' pa wo'or Libanon de herieri-walwialia pa emeknekama sapi a'na mak knenehu-ktertera la' genni. Ne wo'ora Siryon narian pa emeknekama hayori-orpau mak kran lakni na'nama nahe'eya la' to'orni.

⁷ Orgahi-Orha'a lirni nhi' nande layera nwadawar lola etnu lioli.

⁸ Lirni nawo'la-nawainia wo'ora-kawru. Orgahi-Orha'a Nawo'la-nawainia wo'or-kawru mak kden la Kades.

⁹ Orgahi-Orha'a lirni nkahyoi gergera ora-au mak ha riwra ora-au mak karuri, me napi'ir momuoga ora-au mak kden la wo'ora-kawru re tawni. Me la'a roma-kreini de Itmatromlawanni upni-a'nani re riarin pa riwra: “Orgahi-Orha'a inponni toto' memna!”

¹⁰ Orgahi-Orha'a Nodi plolli la ger wawuau liawna wawannu. Enodi plolli de emeknekama Ray pa ntorna-nraut pa nodi liarni.

¹¹ Matroma! Mual rurmu-laimu la hermu-darmu mutmu-rahamu, totpena honona re rler la kalwiedni-paitiotni.