Nhiara 28 - Alkitab bahasa Luang

Rsumbain pa rwaka tniulan la Itmatromlawanni Makdenrer die

¹ Daud wniatunnu-wniahniarni: Matroma! Makdenreri O' e! A'g e puolu-wuak la O'a. O' nanpena emeknekama wo'or watu muaka nhi'inde a'uyaheu lia, pede wuak pa Mhueri tlinmu la a polpuo'lu. La'pa O' edonna Mpuo'la nohor a' die, de hota a'g emeknekama riy mak kla' oleka hoi-kietra ralamni.

² A'upal niana O rommu mak kmou-kwitna de pa arian a li'mu pa asiumbain tiy O'a. Mutlin reria a li'ru maka aghaun pa ukota la O' e!

³ Matroma! Awuak de yana Mukum wutg' a lia'a riy mak edonna ka'unni-kamta'at O'a, mak kholi-klet la'a yatyata-halala. Hare er mak kaltier die rhi'a nur mi'na, mere ralamni de rpohra-rgehpa.

⁴ Mpuahla nan ira de Mliernohora do'oni-halli re. Mhi' totpena rlernana mdududga yata-hal maka ha rhi' nan oleka re.

⁵ La' hare honona de edonna ra'unni-ramta'ata Matro'mu Muor wutga tulanmu-kniarmu. La' hade pede hota Omukum penan memna re pede it edon tamkek nan memn ir owa'ana.

⁶ U'uli-uwedi reria O'a Matroma, yoma la'a hya' maka apuolu-ghaun la O'a re, de Mutlin nana.

⁷ Matro'mu ed mak kala ruri-lai mai a'u, me lol meni-meni to' mana Mruwun reria a'u. Apuesiay reri O'a, Matroma. Omtiulan nan a' pua Mhi' reria a lia'a yaniha-yamali, pede a' muana u'uli-uwed rer O la'a wniatunu-wniahniara.

⁸ Itmatromlawanni Makdenrer die, ed mak kala ruri-lai la'a E mutnu-rahanu. E' ed mak kodniana, me namori-nalewna ray miaka ha Nwalir niana.

⁹ Mumori-mulewna mutmu-rahamu Matroma! Mura'a-mupalga re. Mhi'a inonmu de emeknekama mak kheri-mak klai nhiuri-wnia'ana me Mlin reri-muat reria pa nodi liarni.