Nhiara 27 - Alkitab bahasa Luang

Ya'uli-yawedi la'a sniumbaini ralamni me rwaka tniulan la Uplerlawna

¹ Daud wniatunnu-wniahniarni: Matroma! O' de Makdenreri O'a! O' ed mak kahita-karepra me mak kamori-kalewn a'u. A'g edonna umta'at la hadomdom eti yoma O' ed mak khi' wat lutru yaro'wa geni mai a mormio'ru (benteng), pede a'g edonna diwra-dia'al taru.

² La'pa riy yatyata riwra rper temn a' pua rwenn a'u, de hota ir er maka rdunit tar pua rtuwnu hgotni-rwaga du'urnu.

³ La'pa a' arwa'lu re rle'lu nan a'g emkameni ho'mana, a ihru edonna ndiwr' eti. La'pa rwatipna-rwahewar pa rapal niana a'g ho'mana, a'g e uhnia'ar to'ola O'a.

⁴ Maka a ralmu nwak toto' meman de totpena adien nek la Matro'mu romni pa nodi liarni la a mormio'ru di. Totpena a' orgah'u u'eram reria O kalwiedmu ne totpena aliernan reria lirmu-tunmu mak kawiru-kawewl a'u.

⁵ Matro'mu ed maka kruwun rer a lia'a a sniu'su ralamni. E' ed mak kade'a-kamoin a lia'a E romni ralamni me Nran a lia'a wo'ora la illi-watnu wawannu.

⁶ Pede hota a'g e uru'u-utowr' a' arwa'lu re honona la'a a wa'lu-wa'lu. Ne uhepur nohora pede agodia nhioi-tniani la Itmatromlawanni romni ralamni, ne awuatunu-wuahniar rer lia' E'a.

⁷ O Matrome! Awuak pa matmu reprepar la tulu-lyanti, me tlinmu mana nher tiarga la polpuo'lu. Yan Muolin limmu me Mpue'er rormu la a'u. Mere Mtiulla-msiayn pa Mpuahla nana a polpuo'lu-wakwa'ku.

⁸ Omukot olek mai a'u Miwra: “Mmuai pia mkiola tieru-muawur nehla mai A'u,” pede awuahla giwra: “A'g e muai Matroma”!

⁹ Yan Mude'u la mai hopopanmu a' di. Yan Muwenan pa Mpuayotlia a'u. Yoma la O' nanpena ed mak ktulla-ksayn a'u. Yan memmemna Mhuoplial a' pua Mhuoitio'or mai a'u, Uplerlawnu ne! Yoma O' nanpena ed mak kamori-kalewn a'u.

¹⁰ La'pa a i'nu nor a a'mu rhoitio'or doin mai a'u, mere Matro'mu! O' ed mak kpiara-klakoi khilpai-kmanatu a'u.

¹¹ Mtiutga O ralma-riormu mai a'u Matroma! Muodia a lia'a loi-talla mak kaplele'era yoma a arwa'lu liawanni.

¹² Yan Muolin doin a lia arwa'lu mak kahak pa rhi' yatyat la a'u, yoma ralahar pa rwaghal a'u me rakot mamain de riwra rwunu-rwenn a'u.

¹³ Agha'ara arnu la O'a, yoma agatga de hota aliernana himima-rere'a la O'a mai noh di wawannu.

¹⁴ Mmiai pia itsi' aruri it ihranu ralamni. Yoma tsa'ar reria it mormiorni la Itmatromlawanni Makdenrer die. Yan memmemna it twaler la E'a mere itweiwiei pia hota Nma Ntulan mai ita.