Nhiara 25 - Alkitab bahasa Luang

Rsumbain pa rwaka loi-talla mak kodia lina-lera

¹ Daud wniatunnu-wniahniarni: Matroma! Awuatniar la heyanan pa siumbain la O'a.

² Uplerlawnu ne! A pesia'yu nden rer lia O'a. Yana Muolli a' pua a arwa'lu re ral a lia yawa. Yana irahepru pa riarni-riarin nohora yoma ra'unut nan olek a wua nhi'nande alier la yamola-yama'a.

³ La riy mak klili-kdiori pa rmalawna, mere rakleha nhiapargenni, ir er mak kler la yamola-yama'a. Mere la'pa hameni mak kha'ar aranni la O'a, de hota Muala pa ral arwalli re la' yawa totpena yana arwalli ramalia re.

⁴ Matroma! Makdenreri O'a! Mtiutga ralma-riormu mai a'u me talan plollola mak hota aliola.

⁵ Mpuatutu-mpuaye' a lia'a hya'a mak kaplola me Muala ruri-lai totpena aghi' nana, yoma O' nampena Uplerlawnu mak kamori-kalewn a'u, pede nhi'inde agha'ara arnu la O'a.

⁶ Matroma! La' ululu de nhi'inde Omtiutga ralam kalwiedmu me tniulanmu-sniayanmu mai a'u onnila sniayni onni O'a, pede awuak pa Mhi' emkade owa'ana.

⁷ Yana Mukmu a lia do'u-ha'lu pniera-dniayti maka aghi'a-yapia la'a lerni la adien ma'ta la tuwari lewatni. Mere la'a ralam kalwiedmu de pede Mtiut reri sniayanmu mak kodi liarni mai a'u.

⁸ Itmatromlawanni Makdenrer die, Ndella plola wawannu me Ntut rer nieka ralam kalwiedni la rimormiori, pede Ntutga loi-talla plollola la'a riy dodo'a-halala mak kler la klieratni.

⁹ Itmatromlawanni ed mak kalakra riy mak katu khu'ru-khelma, me Nwatut ir la nhioli-liet kalwiedweda maka Enwahakhaka.

¹⁰ La'a riy mak katu khu'ru-khelam la Itmatromlawanni deullu-tatarni lirni-tunnu de, de Entut nieka tniulanni-sniayanni la' ira yoma hya' to' maka Enakot targa de plol toto'a pa Enhi' nana.

¹¹ Matroma! Mumou-muwitna a do'u-ha'lu totpena riy ra'uli-rawedia O nanmu, yoma a do'u-ha'lu inponni rehia.

¹² Matromlawnu ne! Riy mak khu'ru-khelma katlina-katailla O'a, de orgahamu Mpuatutu-mpuaye'a la' loi-talan mak ha Muhakaka.

¹³ Hota rmori-rdar lia rehenu-lawanni, me duratni-waitni mana rlernan walia geni-tien maka ha rano'tar lia re.

¹⁴ Riy' maka khu'ru-khelma ka'unni-kamta'at la' Itmatromlawanni, de rla' E talanwalli, me hota Nakot momuoga la'a nnio'oni nnia'eratni la ira.

¹⁵ Agha'ara a arnu la' Itmatromlawanni Makdenrer die, yoma E' ed maka kamori-kalewna a lia'a dari miaka kanietra, me tniokal mak ha rtokal targa la' loi-talla.

¹⁶ Matrome! Mumkek mai a' die ralammu nmawla, yoma riy id mana edonna rhe'du nohor a lia'a nniahora-nniala'a maka a'udodo'or nohor di.

¹⁷ A sniu'su lawan rehia pa Muolin doin a lia wa.

¹⁸ Mhuoratreria a sniu'su re honona me Mumou-muwitna a do'u-ha'lu honona re.

¹⁹ Mumkek la! A arwa'lu re harahu me honona ralamni edonna ral meman a'u.

²⁰ Mutiak reri a'u, Matroma! Mulewna a'u totpena yana a arwa'lu ral a lia yawa nhi'nande alier la yamola-yama'a. Mtiulan nan a'u yoma la' O' nampena aliernana mak kruwun reri-ka'ahla reri a'u.

²¹ Awuak pa Omutiak reri a'u yoma adien nek la plola wawannu. Mtiulan mai a'u yoma a'g e uhnia'ar rer lia O'a.

²² Uplerlawnu ne! Muolin doin O rimormiormu Israel la'a kropna-krieutu honona.