Nhiara 24 - Alkitab bahasa Luang

Ray mak kden la hititni-lomlomarni

¹ Hadi de Daud ya'ulli-yawedni la'a wniatunnu-wniahniarni: Orgahi-Orha'a Uplerlawna-Mempulwatnu ed maka gahani mai nohkerna-rai miaran di, nora ihini-mniotni honona.

² E' ed mak kwatatg ulga noh di watu liar pianullu la'a tah'i lawna, me Nariria la'a gera kdieldelma.

³ Itmatromlawanni Nolin doinia pa he' ed mak kafia'at nana wo'orni la'a Sion? He' ed mak khu'ru la E romni ralamni mak kden hande, de la' gen miaka kmou-kwitan de?

⁴ Mak kla'a re de, enekneka riy mak kho'a-khaiya limni la do'oni-halli ralamni me namoga ihrani-ralamni la'a mak kawu'u-kahana, mak edonna kru'u-ktowar la watu-au mak ha rhi' nana la uplera-upmati, me mak edonna klokra-khautu la'a hya' mak edon kaplola.

⁵ La'a riy mak emkare, er mak klernana ra'a-palu la Itmatromlawanni, de Uplerlawna-Mempulwatnu mak kamori-kalewna ira ed mak ketlia de Niwra ir de de rakleha do'a-hala.

⁶ Emkadel la'a riy mak kmai lia Uplerlawna gaini ralamni totpena rkola tieru-rawur nehla rer lia. E' de it upni-tgarni Yakopa Uplerlawanni E'a.

⁷ Rhari tpopoinia nhiar lawna kolkuolu die totpena Ray mak kden la hitita-lomomar de Nla'a rialma.

⁸ He' ed Ray die no? Orgahi-Orha'a mak karuri-kalai, maka ktoran reria haneknek wawannu inhatte, me mak ka'unut la'a ar ralma inhatte.

⁹ Rhari tpopoinia nhiari kolkuolu die pa napliorlora totpena Ray mak kden la hitita-lomlomra inhatte Nlola rialma.

¹⁰ Ray meni hade no? Orgahi-Orha'a Makodi Plolli la' Ar Ralma, Hade ed mak ha riwra Ray mak kden la hititni-lomlomarni inhatte.