Nhiara 23 - Alkitab bahasa Luang

Itmatromlawanni Makdenrer die, ed mak khi' heri-lay lia mai a'u

¹ Hadi de Daud ya'ulli-yawedni la'a wniatunnu-wniahniarni: A Matromlawnu de emeknekama riy mak khi'a heri-lay lia mai a'u. De lera-lera nekpa Nhuri-nwa'an a'u pede ta'enniana a'ukleha hadomdoma.

² E' ed mak kadud tiarga a lia'a wewan potpioti wawannu me Nalakr' a' pua Nodia a lia'a gera tliwu onni totpena arien a'u.

³ Nal a' pua ururi me Nodia a lia'a loi-talla plollola, totpena hota ra'uli-rawedia E kotni-nanni yoma samomuounu.

⁴ La'pa aliol lowna-ahla mak lol melli-kalamni ho'mana a'g edonna umta'at kuku' eti, yoma Matro'mu Omuora a' tialla. Omriuwun reri a' die emeknekama heri-lay ida e nala lie'eni nora aukakaklu na natut rieria pipni-dumni. Omriuwun reri a' die emeknekama heri-lay ida mak katiak reri pipni-dumni.

⁵ O' ed maka khi' targ oleka ya'ana-yemnu la'a mei plalahwa pa a arwa'lu re ramkek reri, ne Omhu'ru-mhuelm a' pua Muodi a lia'a mei de emeknekama o'ta-mat maka ha rpolu-rwak nana la'a genni-tienni. Omhuri-mtiowria lokrahi (anggur) turnu la a la'ru ralamni pa penpuenu-nanahala.

⁶ Matroma! Agatga de O' ed mak ktutga ralam kalwiedmu me tniulanmu-sniayanmu mai a lia a mormio'ru-dardia'ru di tetema. Pa hota adien wut lia O' pa itdella O rommu nayanni pa nodi liarni.