Nhiara 22 - Alkitab bahasa Luang

Sniumbaini la'a ir rler la klieratni

¹ Rlernohora nhiara mak ha rweta la Rusa mak kmai lia Reprepra. Hadi de Daud ya'ulli-yawedni la'a wniatunnu-wniahniarni maka ha rala la mak khi' o'ta la mak kwatunu-kwahniara:

² Uplerlawnu ne, Uplerlawnu ne, nihya'pa Omuolin limmu-mpue'er rormu mai a'u?! A'g e puol lia O'a, mere O' oliet reh'u ne O' edonna Mhua'wu nan a'u.

³ Matromlawnu ne! La' lelera-melmela a'g e puol lia O'a, mere Omtiot ti'lu. A'g e siumbain rer tio'owa mere emkade ho'mana a ralmu emeka ha niowra-wnialia.

⁴ Mere O'a, de Ray mak kakleha do'a-hala kuku' eti. O' ed maka riy Israel e ra'uli-rawed re'ru.

⁵ La'a up mamni-tgar mamni de e rha'ar reri aranni la O'a. Ir rpesiay lia O'a, noma O' ed mak kamori-kalewan nan ira.

⁶ O' edonna Muolin limmu la ira, ne la'pa ir rpol lia O'a de O muai pia Mulewna re. Rha'ar aranni la O'a, yoma Omhi' nan memna hya' maka Omukot targa oleka re.

⁷ Mere la' a' di de riy honona rmakriarni a'u. Rhi' a' die emeknekama riy mak kakleha welli me rahe'i-ramali a'u.

⁸ Honona re rhikwyo' nurnu me rdikdik o'tani pa rwali-walliohora a'u.

⁹ Riwra: “E nha'ar aranni la e Matromlawanni. Ne mai pia tamkek teka hota Enamori-nalewna e' me edonna, la'pa plollola pa e Matromlawanni ralamni nal nan e'a!”

^10-11 Mere Uplerlawnu ne! O' ed mak kalgot a lia i'nu apannu ralamni, me aguhu ma'ta, de O' ed maka kariwa-kahai a'u. O' de a Uplerlawnu. A mormio'ru-dardia'ru ndella O limmu ralamni la' lera a kuku'-keke' ma'ta a'u pa la'pa ntutu-nte'ela lera-mela ri.

¹² Yan olie'tu, yoma arwa'lu re riwra rehgor a'u, ne hota riy id mana edonna ntulan mai a'u.

¹³ A' arwa'lu rpepan rer a'u emolmolan nekama hayori-orpau lidna mak kpora-kdawra riwra rwahaka wniadudallu.

¹⁴ Rmai pia rapalia a' die rwihi-rak nihini pa emolmola ohpora-ahdiawra mak kiwra klihira-knai a'u.

¹⁵ Aruple'a nal a'u me a ru'ru-kliaklu honona raldoin la genni. A ihru ralmu nmadger pa emeknekama lilli (lilin).

¹⁶ A'ukleha ruri-lai wia. La'pa krui mak kdella a wa'wu ralamni mana nkeran-nhau pua a na'mu nkulit targ' olek la'a nu'ru lyanatni. Matrome! Mpuaklol tiar niek a lia'a koda-awu wawannu. Nhi'pa amuati olekwa.

¹⁷ Riy yatyata re rmai pia rle'lu reria a'u pa emekwalima oha-ahu mak kiwra klihira-knai pipi-duma. Rmai pia rkoki-rta'wa a li'mu-la'ku.

¹⁸ A ru'ru-kliaklu re honona de rayamkeka momuou pa arwa'lu re rpoi-rkek a' die emeknekama yohya' maka ha rahe'eya.

¹⁹ Noma rwarui-rwate'la a naniai'ru re pa rwahakra. Rdurmu-rhakra a rainu de rwahedga patui.

²⁰ Mere Matrome! Yan olie'tu la mai a'u. Muai pletlet pa ma Mtiulan mai a'u. Yoma O' nanpena ed maka karuri-kalai nian a'u.

²¹ Mua Mulewna a lia'a wehla gai liokarni, me Muolin doinia a lia'a oha-ahu re nurnu-riautnu.

²² Ukleh oleka rur wia pa Munawar doinia a lia la' hayori-orpau ri dudallu me la'a ohpora-ahdiawra re nihini tutnu mak katnia'wa.

Ra'uli-rawed reria Uplerlawna

²³ Hihi'imu-yapyapmu hota aghi'a la tui la'a a'mu-hya'lu, i'nu-na'ru. La'a iskola-krei de a'uli-uwedre'ru totpena iratlin nana.

²⁴ Mak kola tieru-mak kawur nehla rer lia Itmatromlawanni Makdenrer die, mriarin la haleluya! Yakob duratni-waitni mi'uli-miwedia E'a. De makden Israel hononmi mriu'u-mtiowar la E nayanni.

²⁵ Yoma E' edonna Nmakriarnia riy mak kler la susa ralamni, me edonna Nolin limni-nwe'er rorni la riy mak polpuol inni-wakwak amni. Mere matni nreprepar la tulu-lyanti me tlinni nher tiarga la mak kwaka tniulan la E'a.

²⁶ Matroma! La'pa makden Israel honona re rtepartarlia kniola tieru-niawur nehla la' O'a de a'u'uli-uwed re'ru, yoma la'a hya' maka Omhi'nan oleka re. Me hota ir ramkek nana agala a patu'yu-paro'onu mak a'ukot targa la O'a.

²⁷ La'a riy mak kakleha-kaplara re de, hota ra'ana-remun nande rpeher wa. La'a mak kola tieru-kawur nehla la O' de hota ra'uli-rawed reria O'a. Twakwak de ir honona rler la pripanni-fa'anni pa nodi liarni.

²⁸ Hota la'a lodna-hairi me leta-leta honona mak kdenl a noh pa'etu-rai piatatra mai lyanti nayanni hota rhoratnana Itmatromlawanni Makdenrer die, pa rawali owa'an pa rmai lia E' de. Hota noha mniotni honona rtuk lia E nayanni.

²⁹ Yoma Orgahi-Orha'a mak kodi plolli hota ed mak ktorna-krautia lodna-hairi honona mak kden la'a nohkerna-rai miaran di.

³⁰ Riy mak katulu-kapetna honona rtuk lia. Rimormiori mak edon nalo'on wali ne rmat pia rerun la noh mati-rai miolu de rwaltiora-rwaltieman la.

³¹ Hota la' tuwu-tuwu mak kmai nieka re rla rkola tieru-rawur nehla la E'a. Tuwu ida hota nakot nohora Orgahi-Orha'a hihi'ini-yapyapni mak kden la plol wawannu, la'a tuwu mak kmai.

³² De rakota riwra Itmatromlawanni Namori-nalewna E herni-darni.