Nhiara 21 - Alkitab bahasa Luang

Ra'uli-rawedia Uplerlawna yoma Nal arwalli re la yawa

¹ Hadi de Daud ya'ulli-yawedni la wniatunnu-wniahniarni maka ha rala la mak khi' o'tani la mak kwatunu-kwahniara:

² Matromlawnu ne! A ray miamni kaniha-kamalia yoma O' ed mak kala ruri-lai lia e'a. Ralamni de nahepuepur reri yoma Omtiulan pa nareh niana arwalli la' ara ralamni.

³ O' ed mak kreiniana-ka'nana la'a hya' maka e nwak la O'a pa Omhi'a honona re pa rtutu-rte'ewa.

⁴ Omuodi oleka yare'emu-yapalmu mak karehi-kalawna pa Omuala la e'a, me O' ed maka Mkuowa sape' maha ihi la' o'tani.

⁵ La'pa enwak la' O' de, O' ed mak kala e tuwnu pa mormiorni plahwa. Hota nmormiori pa nodi liarni yoma Omrieiniana-mua'nana e wakwakni de.

⁶ Matroma! La'a O tultulanmu pede ray de nal arwalli re la' yawa nhi'nande riy honona ratota-rawawa ray nanni. La'a O hihi'imu-yapyapmu pede rwoh'a reri-rwanin reria e kotni-nanni.

⁷ Omura'a-mupal muemn e'a pa nodi liarni ne e ralamni nahepuepur reri yoma Omuor e' talla.

⁸ Yoma e nha'ar rer aranni la O'a Matroma. Ne hota namtatan pitpit niohora genni-tienni yoma O' Makdella Tutullu-Lolo'oni de Mtiulla-msiayn reri e'a pa nodi liarni.

⁹ Matroma! Hota O' ed mak kdeh'a reria arwalmu nhi'nande honona rran limni, me Omtiorna riy honona maka gai pietan la O'a.

¹⁰ Hota O'a Matroma, O hankeranmu-ralmha'armu ntuin meman la nohkerna. Omuai die emeknekama ai mormiori mak kdudmu-klairi, mak kram momuoga arwalmu re honona

¹¹ La'a arwalmu re duratni-waitni upni-a'nani de hota riy id mana edon raltarga. Yoma hota Omkuhi-mhuo'ora ir kotnu-turnu gerni-wniaunu honona re.

¹² La'pa arwalmu re riwra rwarora-rwalaiya ralma-riora yatyata-halala la' O'a, de hota ralma-riorni re hamamuamua.

¹³ Hota Omtieran ra'pa la ira, de hota rwaldioinia pa kurna-kiatra.

¹⁴ Ampahniara pa ma'uli-mawed reri O'a, Matroma yoma la'a O rurmu-laimu plolmu-mnehemu takenia am mpar nana.