Nhiara 2 - Alkitab bahasa Luang

Rmalawna la'a Orgahi-Orha'a Nora ray miak Ha Ntutmuata-nkewra'a

¹ Nihya'pa hairi-hairi maka Yahudi atia'a rhi'a kokokna-rariarni yoma riwra rmalawna Uplerlawna? La'a hya' pede o'ta-mat la noh pa'etu-rai piatatra rna'ohma hya' mak edon perkuna?!

² De ray-ray marna-wuhura noha wawannu, me maktorna-makrautu rla' lir id pa ratlinnon keran la Orgahi-Orha'a Nor wutga ray maka orgahani Ha Nwalir niana de.

³ Makodi plolli re riwra: “Mmiai pia ttewar doinia Orgahi-Orha'a Nor ray maka Ha Ntutmuata-nkewra' de plolli-mneheni totpena hota Ir edon Rodi plolli owa'an mai ita.”

⁴ Orgahi-Orha'a Uplerlawna-Mempulwatnu Nden nek la'a liwan genni-mtatan genni mak kden la Ilyamou-Watga hithita pa kaniha-kamali niohora.

⁵ Na'nama Orgahi-Orha'a Nawenan pa Nhoktemna re. E yawenanni de nhi' pa ir ramta'at wenna.

⁶ Orgahi-Orha'a Niwra: “La' Sion de A'ilu-wa'tu maka kmou-kwila de A orgah'u rian olek A li'mu la ray miaka wualir niana o'tani wawannu.”

⁷ Noma ray die nakot walia niwra: “Agiwra ukot nohora hya' maka Orgahi-Orha'a Ha Net tiar lia de, pa Nakot la a'u, Niwra: A' a'nu o'a. La'a ler di de Atiutga la riy honona o Ammu A'u.

⁸ Mpuak nek wa, ne hota luwu-a'na la'pa lodna-hairi durti-waiti honnona de Agala tiy o'a me noheri-woru lyanti nayanni Aghi'a la o gahamu.

⁹ Hota Agal o' pa omtorna-mrautia la hairi-hairi, de mniairia lie'ena mnotna. Ne hota mniairia lie'en de pa ma mpueyata hairi-hairi re emolmolla ran tan miaka ha rliwar wawah'a.”

¹⁰ Hade pede ray-ray miy re! Mitlin hare pa mkienia la ralammi! Maka kodi plolli miy hononmi la nohkeran di wawannu, mhiopliala nhiolmi mak edon kaplola re!

^11-12 Mhima-mrie'a Orgahi-Orha'a, de miatu mi'unni-mimta'ata. Miuh' idamni-mriama lia'arni, de mimta'at nande mdiwra-mdia'ala genmi, yanhi'pa E Nawenna pa nhi'nande mlieretniekla mlier la yatyatni-halalli yatlorni-yatra'ani, yoma pleta-plet pa hankeranni-ralmha'arni ntuin la riy maka kahmena katlina-katailla E'a, mere la'a riy maka kwak E' pa edonna Nolin limni-nwe'er rorni la ira, de irler la unut lawna!