Nhiara 19 - Alkitab bahasa Luang

Itmatromlawanni Makdenrer die, nanni ndella ya'uli-yawedi yoma la'a limni enni nor wutga deullu-tatarni

¹ Hadi de Daud ya'ulli-yawedni la wniatunnu-wniahniarni mak ha rala la mak khi' o'tani la mak kwatunu-kwahniara:

² La' lyanit lawna de, Uplerlawna plolli-mneheni preheni-mkaini nayamkeka. Yoma la'a darta-lyanti itamkek memna E limni enni mak samomuou memna.

³ La'pa lera nherun lera, mela nherun mela de itwatniar rer lia lyanit marna de tamkek nan memna Uplerlawna limni enni. Emkade pede itat niohora Uplerlawna plolli-mneheni preheni-mkaini tutullu-lolo'oni.

⁴ Wolla-wtiona me lera mak kdella la lyanit marna re edonna raltieri-raltiani hadomdoma. Id mana edonna nakunu-napohola genni-tienni pa nayatlina.

⁵ Emkade ho'mana ralharia Uplerlawna preheni-mkaini la'a noheri woru-lyanti nayanni nhi'nande riy nohkeran-rai miaran di rat niohor memna. Emeknekama Uplerlawna Nhi'a lerlawna romni la'a lyanti.

⁶ La' yawyawar de lerlawan de hitni nma nra'pa pa emeknekama muanke'a mak na'nama nmehlima dewade nlergot la kamarni ralamni nahepuepur reri, me emekwalima mak kawlari ida mak riy rwetwet la e nanni de, nwahi'pa nawlari.

⁷ Nala' pa nwaloh nohora lyanti honi pa nla' honi. La'a hya'a to'a de nlernan momuoga pahnani.

⁸ Itmatromni deullu-tatarni riorni-liaini lirni-tunnu honona re rdella plol wawannu, ne rhi' aruri ita. E lirni de itpesiaya, me nodia wniarora-wnialai samomuou la' riy mak kaplin niohor ma'ta talla plollola.

⁹ Hya' maka Itmatromni Nakot taru re honona de raplol momuou nhi'nande riy ralamni rahepru. Lirni id mana edon nhala mere rtutga talan mak kaplollola.

¹⁰ La'pa riy rhu'ru-rhelma Itmatromni lirni de ha samomuou muemn hade. Nhiu'ru-nhielma ya'unni-yamta'ata nden rer lia E' pa nodi liarni. Ne deullu-tatarni honona re samoga me naplol memna.

¹¹ Pede samounu nareh dioinia leli-mah marmara, la'pa maha ihini mana edon narehelia. A ralmu nal nana nareh dioinia ya'ana-yemnia mikmikri-lamliamni, nareh dioinia gani turnu mak mikmikarni de!

¹² Matroma! Deulu-tatarmu re mana ha rnairia pa rwatutu-rwaye'a me rpolliohora hopopanmu-lili'irmu a' di. Hota riy mak klernohor reri re rlernan unut lawna.

¹³ It edon tlernan ma'ta riy id mak kat niohora do'oni-halli honona. Matroma! Mumou-muwitna a do'a-ha'lu mak a'uplin niohora re.

¹⁴ Me Muhal doin wali a lia'a do'a-hal mak atiotpa uhak nana. Yana Muolin doin a pua do'a-hala re rodi plolli mai a'u. Totpena hota a'g edon ghi' do'a-hala werwerta.

¹⁵ Wuakwak de a lira-tu'nu maka awuaror nana me maka a'ukota re, de rlola O ralma-riormu, totpena Mrieiniana-mua'nana. Matroma O' nanpena ed maka kariwa-kahaiya, mak kamori-kadari me mak kod nian a lia' a mormio'ru-dardia'ru di.