Nhiara 18 - Alkitab bahasa Luang

Daud nwahniara pa na'uli-nawedia Uplerlawna onnila Enal Daud arwalli re la' yawa

¹ Hadi de Daud ya'ulli-yawedni la wniatunnu-wniahniarni mak ha rala la mak khi' o'tani la mak kwatunu-kwahniara. Daud di, mak khima-kre' Itmatromlawanni. E nwahniara nhiar di la' ler maka Itmatromlawanni Nanawar doinia e la'a Saul nor wutga Daud arwalli re honona:

² Daud lirni: A ralmu nod rer lia O'a Matroma, a ru'ru-la'yu de eneknek O'a.

³ Matro'mu emeknekama wo'or watu niutni mak ka'ara yaro'wa genni (benteng) mak nhi'inde a'uyade'ela. Uplerlawnu emeknekama wo'or wat muaka nhi'inde a'uyaheu lia, me emekwalima keliau-halwa'an mak kaheu reri a'u, yoma uro'wa targ a lia nayanni. E' de Naruri-nalai pede Namori-nalewn a'u.

⁴ Ya'uli-yawedi nden rer lia Itmatromlawanni. Yoma apuol lia dewade Nolin doin a lia'a a' arwa'lu letgarni.

^5-6 A arwa'lu re rtokal rtarg oleka tniokla la a ga'yu ralamni totpa hota rwutu-rkohog a' pua rodia a lia matmiati ralamni. Alier tar olek la matmiati-molmuolu ralamni yoma emeknekama gera wawuau liawna nma nwau dioin a'u pa alier olek la kowlora-pah'a meti.

⁷ Pede la'pa tah'i lola tieru dewade apuol lia. Agiwra: “Matromlawnu ne! O' de a Uplerlawnu O'a, pa ma Mtiulan mai a'u!” Itmatromlawanni Nden nek la E romni nayanni pa Nlin reri-nmat reri a'u. Nta'wa taru tlinni la a sniumbainu.

⁸ Pede noh marna mana ndiwra-nda'ala me la' wo'ora tutulu nayanni la'a noha wikni-ray gerni mana rkahyoi gergera, yoma la Uplerlawna hankeranni.

⁹ Orgahi Nwaran aranni, de mokla-mahu nlergot lola irannu, me ai mormiori nor wutga ai kwiari rlergot la wawni ralamni.

¹⁰ E Nhi' pa lyanti nahniarit wa, dewade Nhapar reria kakam metam lawna id pa Nodiernia la yawa.

¹¹ Nha'at la hamormiori mak kamehi-kayona ida (Kerub) pa Nnem nohora yoma anni nodia.

¹² Nnem nohora hamormiori de E Nayahew lia wowta-kakma mak kpupun nana.

¹³ La' gaini ralamni kakam lawna ida nwahita-nwatlen nohora otna-anni mak kwal lia es nor wut nieka ai.

¹⁴ Orgahi-Orha'a Uplerlawna-Mempulwatnu Makdella Tutullu-Lolo'oni Nhar lirni emeknekama kukru-gauru. Pede riy honona ratlin nana E lirni mak kwatiaga darat tutulu.

¹⁵ E' nekpa Npok doinia ra'pani rella' malwiru-malganan pa na nreye'era arwalli rella' genni. Nala kukru-gauru, hita-tlena pa pro'a-prahka lol walli-walli dewade arwalli re mana ema wlari tipru-wlari warta lol etnu-liolli.

¹⁶ La' noha wikni mak kden la hletan lawna mana ema rkok doinia, me la'a tani kierna wawannu ho'mana nadwiera. Yoma Orgahi-Orha'a hankeranni-ralmha'arni ntuin meman la' nohmarna.

¹⁷ Nden nek la' heyanan pa Netar doinia limni, na'nama Nhedga a lia'a gera tlinni.

¹⁸ E' ed mak kolin doinia a lia' a arwa'lu maka ha riwra metam keranni, la'a riy mak kahankeran rer lia mai a'u. Yoma ir rurni rehi a'u.

¹⁹ La' ler maka alier la tututu-wawuau de rma rlewri a'u. Mere a Matromlawnu Makdenrer die, edonna Nolin limni mai a'u.

²⁰ E' ed mak kolin doin a lia'a kropna-krieutu ralamni. E Namori-nalewn a'u yoma a'g ed mak khi' amikria E ralamni.

²¹ Itmatromni Makdenrer die, ed mak kwahla a nhio'lu-lie'tu mak kaplola. Enara'a-napalga a'u yoma a'g edonna ghala.

²² Yoma adien rer lia E deullu-tatarni, me a'g edonna ghoitio'or tar lia'a Uplerlawna maka akola tieru-gawur nehla.

²³ La'a hya' maka E Ne'er taru-ntatar taru, aliernohora, me la'pa ha Nakotkota re de a'g edonna uwlari tiar lia.

²⁴ E Natga de agho'a-ghaiya olek a li'mu la yatyata-halala honona, me uplinu wuakrian tiar lia mak ha riwra do'a-hala.

²⁵ Pede E orgahani mak kwahla a nhio'lu-lie'tu mak kaplola. Yoma Natga de adiel la'a plola wawannu.

²⁶ Matroma! Makdenreri O'a! Omtiulla-msiayn reri riy mak klernohor reri O'a, me Omhi' kalwiedwed la riy mak khi' kalwiedweda.

²⁷ La riy mak kakleha do'a-hala, demade Orgahamu Mtiutga de O' nek de edonna Mhi' do'a-hala. Mere la'pa rlernana riy yatyata-halala, de Omlia'a ir arwalli.

²⁸ La'pa rlernana riy maka khu'ru-khelma lol yawa, de Omrieiya la mormiori-lewlewna, mere la'pa riy mak katulu-kapetna de, Omutowra la yawa.

²⁹ O' ed mak ktutnia a wa'du lipli'pu. Matroma Uplerlawnu ne! O' ed mak khedga a lia melmelli pa kodia lelerni mai a'u.

³⁰ Yoma o' ed mak kal ruri-lai mai a'u, totpena awualerna a arwa'lu harahu re. O' ed mak ktulan mai a'u pede arieiye'er targa lutru yaro'wa genni.

³¹ Uplerlawna hihi'ini-yapyapni honona re raplollol momuou. E nnio'oni de tpesiaya. Itmatromlawanni Makdenrer die, emeknekama keliau-halwa'an maka ha ra rkaduw reria riy mak nayahew lia.

³² Yoma Uplerlawna ida Nmeh'a to'a, Itmatromlawanni inhatta. E' nanpena emeknekama wo'or wat muaka nhi'inde a'uyaheu lia pa Nruwun reri-na'ahla reri a'u.

³³ A Uplerlawnu inhatti, E' ed mak kala ruri-lai lia a'u, ne Nhi' loi-talan mak aliola de namtemteman memna.

³⁴ Nhi' aruria a la'ku de emeknekama rusa mak karuri-kalai, ne Natiaka aliolola la'a wo'or tutulu.

³⁵ E' ed mak kwatutu-kwaye' a' pua u'ara. Pede agatu we'el targa rapra'pa pa ga wuei arwali.

³⁶ Matroma! O' ed mak kruwun rer a lia ar ralma, me O' wal pia ed mak kamori-kalewn a'u. O' ed mak klin reri-kmat reria a' pua Mtiutu-mhana a lia' ar ralma. Onnila ralam kalwiedmu mai a'u, riy rwetwet rer lia a na'nu.

³⁷ Agatga de O' ed mak katiak rer a'u totpena yana a' arwa'lu rhopan pa arian a li'mu. Pede hota a'g edonna tiuini-diai taru.

³⁸ Aghokra-liai a arwa'lu. Aghapartiklia re pa agala ir la yawa.

³⁹ Awuakloli-waklallia re, pa ghelkiai-ghakpera re.

⁴⁰ Matroma! O' ed mak kala ruri-lai mai a'u pa nhi'nande u'unut nan momuoga re.

⁴¹ Omhi' nana a' arwa'lu re wlari tipru-wlari wiarta, pede awunu-wuenna mak ralamni edonna ral momuog a'u re.

⁴² Arwali re polpuolu-hawaunia re mere riy id mana edonna rma rtulan la ira. Polpuol inni-wakwak amni la Orgahi-Orha'a mere E' edonna Nkil matni la.

⁴³ Aghi' ir pa ramkoha-ramnana pa rwal lia en liu'wu-tan miakmu maka anni nod lia'a-nodi miaiya. Aghoplial ira pede ir emeknekama loka-da'la la loi-talla ralamni.

⁴⁴ Matroma! Omulewn a lia riy mak khi' kokokna-rariarni yoma riwra rmalawan mai a'u. Ne Mhi' a' pua agodi plolli la mak kden la noha-rai piatatra. Lodna-hairi maka ululu uplin niohora re mana, la' dodo'ondi de agodi plolli la.

⁴⁵ Mak kwatiaga hairi-hairi ratlin tut nian a' die, honona re rhu'ru-rhelam la hya' mak a'ukota. Ramta'at nande rwaltior la a gai'yu ralamni pa ruh' idma-rrama lia'ara.

⁴⁶ Honona re wuhurni-tekalli, me preheni-mkaini re ema rmakuk tiarga, ne la'a mak karo'wa tar mua'ta la lutur watu la' ar ralma mana rlergot pa rran limni, de rdiwdiwra-rdada'ala.

⁴⁷ Matroma, Omdien reria pa nodi liarni! Uplerlawnu emeknekama wo'or wat muaka nhi'inde a'uyaheu lia. U'uli-uwedi O'a. Mriarni! Uplerlawna Nmemeh'a ed maka inponni. E' ed mak kalewan nan a'u.

⁴⁸ E' ed mak kwahla nan a arwa'lu hihi'ini-yapyapni pa Nal a' pua u'unut nana re. Lodna-hairi nor wutga luwnu-a'nani re E' ed mak karu'u-katowra la a ga'yu ralamni.

⁴⁹ Enalewna a lia'a arwa'lu. Matroma! O' ed mak kala unut lawna mai a'u, pede ariehi-tialu niana arwa'lu re. O' ed mak kolin doin a lia la' arwa'lu mak maklekla-makdiaini re limni ralamni.

⁵⁰ La' hade pede u'uli-uwedi rer O la'a lodna-hairi me la'a mak kden la noha-rai piatatra mai lyanti nayanni. Awuatunu-wuahniara de wuet rer lia O nanmu.

⁵¹ Uplerlawna ed maka Nal unut lawna la'a a'u, Daud, de E rayni maka ha Nwalir niana. Ne E' ed mak ktutga E sniayn lawanni mak kodi liarni la'a agor wutga durtu-waitu, la'pa di'na-lohoru pa nodi liarni.