Nhiara 17 - Alkitab bahasa Luang

Riy mak kakleh hala sniumbainni

¹ Daud sniumbaini: Matroma! Mutlin reria a li'ru mak kwaka plola-mneha la' O'a Matroma! Mhueri tlinmu-mpuali matmu mai a polpuo'lu-wakwa'ku mak klola a ralma plele'eru di Matrome!

² Mtiulan pa Muod nian a lia' lira-tun di Matroma, yoma la' O' nanpena ed mak kat niohora plolli-halli.

³ La'pa orgahamu Mueh'a mak Mumkek a lia' lera melli yoma Omiwra Mtia'aga a ih'ru-ralmu de emeka riy rala ai ra rhudia maha, de hota Mumkek nana a ih'ru-ralmu mak kaploi-kaple'era. La' lira-tun maka a'ukot la O'a, de ha rwatiaga a ih'ru-ralmu mak awuaror nana.

⁴ La'a hya' maka Omukota de hare er maka aghi'a, pede oliet a lia talan mak riy maklekla-makdiaini rlola.

⁵ La' a mormio'ru di de, awuo'la-liekur la'a loi-talan maka ha Mtiutu-mtie'a, ne a'g edon gokur la malwiru onde la malganna.

⁶ A puol lia O'a, Uplerlawnu ne! Yoma la' O' nanpena ed mak klin reri-kmat reria a'u, pede Mpuahla mai a'u, Matroma. Hota tlinmu nta'i nan momuoga hya' maka ukota re honona.

⁷ Mtiut momuoga tniulla-sniayanmu mak kdait la lyanti. Yoma O' ed maka kamori-kalewna rimormiori mak kakriuwun la O nayanmu. Yoma la' O' inonmu onni nanpena riy edonna ramta'at la arwalli mak hota rwakriania.

⁸ Mutiak reria a' die emeknekama mat wamuehemu. Mude'a-mumoinia a'u emeknekama hiwi tei mak kreka-krek a'nani la liwarni nayanni,

⁹ totpena riy yatyata-halala re ta'enniana rte'la nan a'u. Yanpa mak kle'lu reri a'u re hota rwenan nan a'u.

¹⁰ Ir de riy kospo'ona mak kakleha sniayanni la ir rimormior wialli.

¹¹ Rmai die rwaleran pa rle'lu rer a'u yoma riwra ror au mpakdordiorni, totpa rwehya litr a'u.

¹² Wniehwani re emeknekama ohpora-ahdiawra mak kiwra klihira-knaiya mak ha riwra ra'ana, ne lala'a-tattiaya pa emeknekama ohpor mak kwei nieka hya' maka niwra nlihira.

¹³ Mupriri-mukdeda pa Muora re mpiahapra lia'ara totpena orgahamu Mutowra re. Ne Mulewn a'u, Matrome! Mual wehlamu mua Muorindoini riy yatyata re.

¹⁴ Matrome! Mulewn a lia'a riy mak kawoka-kale'ga re'a-tniarga nohkeran di wawannu. Muala ir pa rler la yatlorni-yatra'ani maka Omhi' targ oleka de. Mukum wutga rora di'nani-lohorni honona.

¹⁵ Mere a' die hota umke'ku yoma a'g edonna diel la'a do'a-hala re ralamni. La'pa umat wa, de umkekna'nu pede a ralmu nahepur memna.