Nhiara 16 - Alkitab bahasa Luang

Unut lawna la riy mak khu'ru-khelam la Itmatromlawanni Makdenrer die

¹ Daud sniumbaini la wniatunnu-wniahniarni: Mutiak a'u Uplerlawnu ne, yoma agha'ar a arnu la O' mak kruwun rer a'u.

² A'ukot la Itmatromlawanni: “A Matromlawnu O'a, Omhi' a ralmu pa nahepuepru. O' ed mak kareh dioin memna hare honona mak aliernana re!”

³ A'g e ghu'ru-ghelam la'a riy mak edonna khi' do'a-kyapi hala mai noh di. A ralmu naplele'er pa agora ira mholi wutu.

⁴ Mere he' mak kiwra kru'u-ktowar la hegan ornoha-orrai, yeher to'a pa rlului-rnurnuhru la' lera-lera. Uhmena gor wut lia ir pa mhoi-mtania rara la hegan ornoha, la'pa kotni-nanni uhmena gheik la.

⁵ Mere Matroma! O' emolmolan neka me nhiakra samomuou memna maka aliernan de. Hya' ed maka hota aliernan de etla O limmu ralamni.

⁶ La'a hya' to' maka Omuala mai a'u re de, id mana edonna yata. Hare honona samomuou memna!

⁷ U'uli-uwedi reri O'a Matroma, yoma Omtiutga talan mak kaplola mai a'u. La' melmel ho'mana awuaror nohora talla mak kaplol de pa hota aliola.

⁸ A nhiortu nden reri mamain la' O'a Matromlawnu ne! O' ed rer lia a' o'nu pede ta'ennian memna riy rawo'la a'u.

⁹ La' hade pede a ralmu nden rer lia' yahepru, me a'u'uli-uwedia O'a. Hota a' ino'nu edon nler la hadomdoma.

¹⁰ Yoma hota O' edonna Mtio'or doinia a' pua lier la matmiati-molmuolu ralamni. O' edonna Muolin doinia lili'irmu-hopopanmu mak katlina-katailla O'a, de nler la noh mati-rai miolu.

¹¹ O' ed mak ktutmuat a lia'a loi-talan mak kler la mormiori-dardiari ralamni. A yahepru de emekneka opli mak kha'a yoma O' e Muor A' tialla. Omdiella a' o'nu pede anieniehu-tiertera la yamuki-yahepru pa nodi liarni.