Nhiara 149 - Alkitab bahasa Luang

Nhiar ya'uli-yawedi yoma ral arwalli re la yawa

¹ Haleluya! Ya'uli-yawedi la Itmatromlawanni Makdenrer die! Twahniara nhiar warwuaru la'a Orgahi-Orha'a. Ta'uli-tawedia E'a la'a E rimormiorni yawokni-yale'enu.

² Riy Israel miy re! Mimuki-mihepur nohora E' maka kakoki-kayap nian miy. Makden la Sion mimuki-mihepru yoma miy Raymi inhata!

³ Miala tiwla-prai hitara-fiola, he'emi-heparmi, nor wutga loimi-nhiekmi mia mi'uli-miwedia E kotni-nanni!

⁴ Yoma Orgahi-Orha'a ralamni nahepur reri onnila rimormiorni re. E Ntulan la riy maka nhiolli-lietni lola yawa re totpa ra'unut la ar ralma.

⁵ Pede mimuki-mihepur nohora nhiarmi de miplin niohor mela lawn oleka onnila ya'unut lawna maka mliernana de. La'pa mininmi la lewu wawannu mana mi'uli-miwedi Orgahi-Orha'a.

⁶ Mpiahniar de lirmi re inpona pa mi'uli-miwedia Uplerlawna la' genni-tienni. Ne mtiorrer wutwutga wehla ara mnarnarta.

⁷ Totpena ma mpiahla nan memna riy mak kwatiawua noha-rai korni, de miukmua riy mak kaplin niohora Uplerlawna.

⁸ Me totpena ma mpiutu-mkioh wualia ray-ray nor wut nieka o'ta-matni re honona rnairia wutwutu mnotna.

⁹ Hota miukmua re mliernohora hya' ed mak Orgahi-Orha'a Netlia. La' talan emkade pede Uplerlawna Ntutga plollolmu totpa riy rhu'ru-rhelma Uplerlawna rimormiorni miy mak klernohor reria E'a. Haleluya! Ya'uli-yawedi la Itmatromlawanni Makdenrer die!