Nhiara 147 - Alkitab bahasa Luang

Mhia'ar aranmi la Orgahi-Orha'a mak kodi plolli ne E' nekpa ed mak ktutga ralam kalwiedni la rimormiori

¹ Haleluya! Ya'uli-yawedi la Itmatromlawanni! Makdenreri E'a! La'pa it ta'uli-tawedia Uplerlawna de ya'uli-yawed die nodi it la ha samomuounu. De la'pa twahniar pa ta'uli-tawedia it Uplerlawanni de, plola pa nlol talanni, me nhi' it pa tahepur reri.

² Itmatromlawanni Nariria owa'ana Yerusalem la' genni. La'a riy maka arwalli re rhoplia la noha-rai dom to'a re, de Nodia pa rawal wia.

³ Nhi'a riy maka ralamni nmolu-nhelma re pa rler la yamuki-yahepru. Me Nagapnia mak kamno'a-kamrara honona.

⁴ Ne Nhi' wtiona harahu memna na'nama Netlia wtiona re genni-tienni me nanni.

⁵ Plola! Orgahi-Orha'a maka itsu'ru-tselma de inponni toto' memna! E' ed mak kodi plolli-ktaryatu. Wniarorni-wnialaini kirkira-ralma riorni edonna nla ntutu-nte'a.

⁶ Itmatromlawanni Na'ala riy maka riy ratowar reri re pa nariria la genni. Mere la'pa Nlernana riy yatyata re de Nliwra la tan kierna wawannu.

⁷ Mmiai pia twahniar nohora nhiar ya'uli-yawedi la Itmatromlawanni Makdenrer die, de tala tiwla-prai hitara-fiola ta tamuki-tahepur nohora it Uplerlawanni.

⁸ E ed maka kweran nana kakam makden la lyanti na'nama Nhi' targa otna pa ntur lia noha wawannu pa Nhi'a wewna pa nmor lia wo'ora-kawru.

⁹ Nalla nhiurni-wnia'ana re pa ra'ana-remnu. Me Nal walia la ma'nu akaka a'nani re la'pa polpuolu-hawaunia.

¹⁰ Itmatromlawanni ralamni edonna Nwahaka kud mak karuri, me riy miak kparan lia la' ar ralma ho'mana edonan wali.

¹¹ Mere ralamni sukni to'ola riy mak khu'ru-khelma ka'unni-kamta'at la' E'a, de la'a riy mak kha'ar mormiorni la E sniayanni mak kden pa nodi liarni.

¹² Hei makden Yerusalema! Mi'uli-miwedia mrieililili-mia'mamuaga Itmatromlawanni Makdenrer die nanni. Hei makden Sion! Mi'uli-miwedi mhiu'ru-mhielma it Uplerlawanni la'a tutullu-lolo'oni.

¹³ Yoma E' ed maka karuri-ka'orat nana miy letmi puohra lawanni nhiarni, me E' wal pia ed maka ktera-kdema rimormiori makden la hande.

¹⁴ E' ed maka katiaka nohomi-raimi totpena yana arwalmi re rhi'a kokokna-rariarnia. Me Nala metma wetra' lawna samomuou na Napehra miy.

¹⁵ Nhar lirni la hya' maka ha Niwra Nhi'a la nohkerna dewade honona rwo'ti-rhar wia.

¹⁶ Itmatromlawanni Nalernia tah'i muti, de emeknekama ahwa nhiawi, me Nkuru-nkarga kgar maka kawatu de emeknekama awu li'ina.

¹⁷ Otan tah'i muti maka ha Nalernia de emeknekama watgo'ola prowta, pa nhi'nande riy edonna rtahan nana wokni pa rdiwra-rda'ala.

¹⁸ Dewade Itmatromlawanni Nhar lirni pa ta'hi mut miaka kawat die nmadgerrauru. Eneuga aranni noma ger ema rwau dioinia la!

^19-20 Itmatromlawanni Nakot nohor E nnio'oni la'a Yakopa duratni-waitni. Nal oleka deullu-tatarni riorni-liaini la makden Israel. Edonna Nhi' emkade la noha-rai korni pede ir edonna rat mua'ta nie'era-tniatra re! Mere Nakot nohora hare honona mai makden Israel ami. Haleluya! Ya'uli-yawedi la Itmatromlawanni Makdenrer die!