Nhiara 145 - Alkitab bahasa Luang

Ra'uli-rawedi Itmatromlawanni Makdenrer die onnila ralam kalwiedni

¹ Daud nhiar ya'ulli-yawedni: Matroma! O' di de a Uplerlawnu O'a! A Ra'yu nek O'a! Agiwra u'uli-uwe'du la O genmu-tienmu ne hota u'uli-uwedi ghu'ru-ghelma lilili-mamuau O' pa nodi liarni!

² La' lera-ler nekpa agiwra u'uli-uwedi reri O'a, Matroma. Ne hota emkade pa nodi liarni.

³ Orgahi-Orha'u ne! O' inponmu nareh dioin neka hanekneka wawannu, pede riy ta'enniana rwaror nana O inponmu mak kamrehi-kamda'ara! Ya'uli-yawedi de nden rer tiy O'a.

⁴ La durti-waiti tuwu pa la' tuwu ra'uli-rawed reria O' hihi'imu-yapyapmu. Hota rakot nohora O rurmu-laimu lol meni-meni to'a totpena upni-a'nani re rat niohor memna.

⁵ Rakot nohora hihi'imu-yapyapmu mak kamehi-kayona. Me awuarora-awualai reria O prehemu-mkaimu di de edonna nhorg eti!

⁶ Rwahaur nohora O tulanmu-kniarmu mak karehi-kalawna, me la'a O inponmu de ed maka hota a'g ed mak kakot nohora.

⁷ Hota rwahaur nohor walia O ralam kalwiedmu mak karehi-kalawna, me rwahniar nohora la emkameni la Omdien nek la plol wawannu.

⁸ Itmatromlawanni Makdenrer die ed maka nhi'inde Ntutga ralam kalwiedni me tniulanni-sniayanni la rimormiori. Edonna Nwahla pleta-pleta rira do'oni-halli yoma sniayni onni E'a.

⁹ La'a Itmatromlawanni Makdenrer die yehwani de nhi'inde nara' reria rimormiori honona. Ntutga sniayanni la'a hare honona maka E Nakoki-nayap niana.

¹⁰ Matroma! Hota la'a O limmu enni re honona hota ra'uli-rawedia O'a. Rimormiormu honona ra'uli-rawedi rhu'ru-rhelma la'a tutulmu-lolo'omu.

¹¹ Hota ir wal pia rakot nohora O plolmu-mnehemu emekwalia Ray, me rwahaur nohora O rurmu-laimu

¹² totpena riy honona ratga de O hihi'imu-yapyapmu de inponni nareh miomuou me rat niohora O lodanmu-hairmu rurni-laini hititni-lomlomarni.

¹³ O lodanmu-hairmu nodia la tuwu-tuwu. Omuodi plolli emeka Ray pa nodi liarni! Itmatromlawanni Makdenrer die edonna Nhortaplinga E nnio'oni re honona. E sniayanni toto'ola la'a hya' maka ha Nhi' nana re honona.

¹⁴ Itmatromlawanni Makdenrer die Ntulan rer lia'a riy maka kler la sniusa ralamni, me Enrana riy maka kru' rieri-ktowar rer re o'tani la heyanna totpena mormiorni ndenrer lia samomuounu.

¹⁵ Ha mormiori honona rha'ar aranni to'ola O'a. La'pa raplar wa dewade Muala ir pa rlernana ya'anni-yemannu.

¹⁶ La'a hya' maka ha rakleha de O ed mak kala pede nhi'inde ir edonna rakleha-raplara.

¹⁷ Itmatromlawanni Nwehwa-nlakat de nlol talanni, me ralamni npenpuen lia tniulla-sniayanni la'a hya' maka ha Nhi' nana re honona pa nodi liarni.

¹⁸ Enrehgor rieri la'a he' maka kpol rer lia E'a, de he' to' mak kpolu-kwak la e de ralamni re ploi-ple'era.

¹⁹ La'a riy mak klernohor reri E'a, de Enala hya' maka rwahaka. Nta'wa reria tlinni la ira, totpena Namori-nalewna!

²⁰ Itmatromlawanni Makdenrer die Enruwun reria he' to'a maka ralamni napal nian E'a. Mere la'pa riy maka nhiolli-lietni nyat olekwa, de E ed maka Nukum penna.

²¹ Agiwra u'uli-uwedia Orgahi-Orha'a kotni-nanni la lelera-melmela! Hare honona maka E Nakoki nayap niana re, mmiai pia ta'uli-tawedia tsu'ru-tselma tlilili-tmamuau E la'a tutullu-lolo'oni pa nodi liarni.