Nhiara 143 - Alkitab bahasa Luang

Daud nsumbain pa nwaka tniulla-sniayni la Itmatromlawanni Makdenrer die

¹ Hadi de Daud nhiar ya'ulli-yawedni: Matroma, Mutlin reria a sniumbain la O'a. De, Mutail rer lia'a hya' maka ukotkota. Mpuahla a li'ru di onnila Omdien nek la plol wawannu me hya' ed maka Muno'taru re, hota Mhi' nana.

² Matroma, a' di de hopopna-lili'irmu mak ktutu-khana O'a. Yan Mhudi-mpuar a'u, yoma la'pa riy id mana edon naplol la O gaimu ralamni.

³ Matroma, a' arwa'lu nal a lia yawa, pa nhi'nande rhokra-rlai olek a pua rho'la targ a lia'a roma nhio'la mak mel'uta ralamni pa a'g emeknekama riy mak kmati miemn olekwa.

⁴ A ino'nu nakleh et miemna ruri-lai lia a te'mu pa nhi'nande aghakomu-ghakamu.

⁵ Mere a'g e ghoratrer mia'ta O hihi'imu-yapyapmu honona la' ler ululu. A wniaro'ru-wniala'yu nod rer lia hihi'imu-yapyapmu mak kamehi-kayona re.

⁶ Noma ariana a li'mu pa asiumbaini. Yana olie'tu la mai a'u, Matroma, yoma agha'ar a' arnu la' O'a pa emeknekama tani mak keran tar lia genni yoma rwei niek otna pa nturu.

⁷ Matroma, Mpuahla a li'ru la dodo'ondi wa yoma a'ukleh et miemna ruri-lai lia a te'mu nhi'nande aghakomu-ghakamu. Yan Mude'u mai a'u. Yanhi'pa a'g emeknekama riy mak kmat pia kanietar la hoi-kietra ralamni.

⁸ Matroma, awuak pa la' yawyawar la' lera-ler nekpa Mual a' pua agat niohor memna sniayanmu mak Omtiut rier nieka mai a'u, yoma agha'ar targ a arnu la Omueh'a. Mtiutga talan mak hota aliola yoma arian a ralmu pa asiumbain tiy O'a.

⁹ Amuai die giwra dien to'ola O limmu ralamni, totpena Omuolin doinia a lia'a arwali re limni ralamni.

¹⁰ Mpuatutg a'u totpa aliernohor reri O ralma-riormu. Yoma a Uplerlawnu O'a. Matroma, Muala pa Nhiw Lululmu Nalakra a lia'a loi-talla mak kaplele'era, yoma E ralam kalwiedni.

¹¹ Matroma, Mulewna a'u totpena hota riy ra'uli-rawedia O kotmu-nanmu onnila ramkek nana ralam kalwiedmu mai a'u. Muhal doinia a lia'a yatyatni-halalli yoma O' ed mak khi' rer nieka kalwiedni-paitiotni la rimormiormu.

¹² Onnila Mtiut rier nieka ralam kalwiedmu de mai a'u, pede Mukum penna a arwa'lu re. Mpunu-mpuenna re yoma nhiolli-lietni rpa'ei-rpahala la O hopopanmu-lili'irmu a'u.