Nhiara 142 - Alkitab bahasa Luang

Daud nsumbain la Itmatromlawanni Makdenrer die yoma riy yatyata re rhokra-rlai e'a

¹ Nhiar wniatutu-wniaye'a, maka kakot nohora Daud la ler ha ndella liena ralamni. Nhiar di, de Daud sniumbaini la Itmatromlawanni Makdenreri die:

² Aghaun matmiat pia apuol lia Itmatromlawanni, giwra: “Matrome! Mtiulla-msiayn nan a'g ee!”

³ Apuolu-wuak la Itmatromlawanni gaini ralamni pa ukota plele'era a su'su honona la E'a.

⁴ La' lerni la trema-trema a ino'nu nakleh et miemna ruri-lai lia a te'mu, de O orgahamu Muat niohora hya'a maka hota aghi'a. La'a loi-talan maka hota aliola re de a' arwa'lu re re'er targa dedesu rapra'pa pa npitu-nkora.

⁵ La'pa a'ukillia wali-wali pa awuahaka riy maka hota rtulan la mai a'u, mere riy id mana edonna rhe'du nan a'u! Hota alia uhewu a lia' hanmeni?

⁶ Dewade aghaun la O nanmu, agiwra: “Matroma, O' ed maka kruwun rer a'u, Matroma! Agha'ar reri a ralmu la O'a yoma la' O' nanpena ed maka ktoran reria a mormio'ru-dardia'ru di.”

⁷ Mutail rer lia a li'ru, yoma alier olek la klieratni wa. Mua Mulewna a lia'a arwa'lu ri limni ralamni, yoma takeni puar nana re.

⁸ Mua Mulgot a lia roma nhio'la ralamni totpena alier teman la O wokmu-le'emu pa wuahaur nohora O kalwieda-paitiotmu maka ha Mhi' oleka la mai a wua, totpa hota ma'uli-mawedi O'a.