Nhiara 141 - Alkitab bahasa Luang

Sniumbaini la'a ler maka nler la susa ralamni

¹ Hadi de Daud nhiar ya'ulli-yawedni: Apuol lia O'a Matroma! Muheri tlinmu-mutatar matmu la' a wakwa'ku di. Pleta-plet pa Mtiulan mai a'u Matrome!

² Mrieiniana a siumbainu di pa emeknekama a'g e ghi'a nhioi-tniani huwu mikmikri-lamliamni la' O'a. Me a li'mu rora maka aghoi-tian tiy O' di de emeknekama nhioi-tniani maka ha rala la lera ntuini.

³ Mutiaka a nu'ru, Matroma. Yanpa a'ukota la'a hya' ed mak edon nla' nan O ralammu.

⁴ Mual a' pua oliet a lia wniarora-wnialai yatyata-halala. Me yan adien wut lia riy mak kmalawna. Yana gora re ma'ana-memun wutu la ir ya'an lawna-yemun lawanni.

⁵ Ndella pa riy kalwiedweda rpolliohora a'u me rwatutu-rwaye'a a lia' samomuounu. La' talan emkade pede rtutga ralam kalwiedni re mai a'u. Rano'a-ra'atga a' die, emeknekama wu'ru mikmikir mak aliernana, pa hota a'g edonna wuayotlia de. Mere la' riy yatyata re, asiumbain nek ir la Uplerlawna totpa ta'enniana rhi' yatyatni-halalli.

⁶ La'pa hota riy rte'la la riy yatyatni re o'tani-matni pa rinn'ernia la weran wutu tetni, de hota ir ratga a li'ru maka a'ukota re de raplol momuou.

⁷ Hota ir rurni-kliakallu re de rrinnie'era harella la'a hoi-kietra walli-walli, emekwalima e rtu'tu-rlewru mkokoha watliawna id la'a tan kierna wawannu.

^8-9 Mere a' di de, la'pa emkameni ho'mana, a'g e uhnia'ar tar tio'ola O'a Matroma, mak kla' a Uplerlawnu. La' O' nampena aliernana mak kruwun reria a'u. Yana Muolin limmu mai a' pua amuati yoma riy yotyota-yatyata re e rmakokan nohora dedesnu wniahi'ini pa ra rtot la'a-rtot mai a'u.

¹⁰ Emkadella wa totpena ir orgahi rtuin targ owa'an la ir dedesnu mak ha rhi' taru re! Mere hota a' die alier la mormiori-lewlewna ralamni.