Nhiara 140 - Alkitab bahasa Luang

Tsumbain pa twaka yamori-yalewan la' Itmatromlawanni Makdenrer die

¹ Hadi de Daud nhiar ya'ulli-yawedni maka ha rala la mak khi' o'ta la mak kwatunu-kwahniara:

² Munawar doinia a lia la'a riy yatyata re limni ralamni Matroma! Mutiak reri a' totpena yana riy maklekla-makdiaini re rhi'a yotyotni-yatyatni mai a'u.

³ Yoma la'a ira ralma-riorni de sukni rwarora-rwalai nieka yatyata-halala. La' lera-lera nekpa rhi' nande riy rahuri-rawo'or mamaini.

⁴ Namni re rwalawar de emeknekama niy miaka namni khena. Nurnu rage'a yapupu-yaheri emeknekama niy miaka kodi nhienni.

⁵ La' hade pede Matromlawnu ne! O' de Makdenreri O'a! Orgahamu Mriuwun reri-Mu'ahla reria a'u totpena yana lier tar lia riy yatyata-halala nnia'ohma-nniakatni re honona. Mutiak alia'a riy maklekla-makdiaini re mak kiwra ral a lia yawa.

⁶ Mak kpo'ona-kraka re, e rherier tio'a mere e rhi' wutwutga dedesu la' mai a'u. Re'er targa dari nieh'a pa riwra ra rtorn a'u. La' talan mak lol meni-meni to' pa e rtan targa totota-wudwiudi mai a'u.

⁷ Mere aghaun pa puol lia O' de giwra: “A Matromlawnu O'a, maka a'ukola tieru-gawur nehla la de. Mhueri tlinmu la a polpuo'lu-wakwa'ku di!”

⁸ Matroma! O' ed mak kodi plolli la haneknek wawannu. O' de ed maka kal a pua liernana mormiori-lewlewna onnila rurmu-laimu plolmu-mnehemu. La' O' de aliernana kruwun lawna la'a yawunu-ya'ara lerni.

⁹ Matroma! Yana Muolin doinia pa riy yatyata re rlernohora wniarorni-wnialaini re! Yan memmemna Mhur dioinia pa rhi' nana hya' ed maka rna'ohma-rnakatia mai a'u.

¹⁰ Yan memmemna Muala arwa'lu re pa ra'unut nan a'u. Muolin doinia pa lirni-tunnu mak kyata-khala re pa rutin wenn owa'ana orgahani la genni.

¹¹ Ndella pa ai kwiari ntuin la ir o'tani wawannu onnila ir wniarorni-wnialaini maka kyata-khala re. Ndella pa rhopli-rnaklia ir la hu'ula-liena matmiati-molmuolu ralamni totpena yana rawrikgot la genni.

¹² Riy maka suksukni rapupu-raheri de yana rmori-rdar lia noha-rai di wawannu. Ne riy maklekla-makdiaini re rler la yatlorni-yatra'ani.

¹³ Agatga de Matro'mu Muodniana riy mak kler la kleha-lara.

¹⁴ Riy maka kwehwa ploi-ple'era de plola pa hota ra'uli-rawed reria O'a. Mak khi' mak kaplollola la O yamkekmu de hota ror O' la'a geni-tiena ida.