Nhiara 14 - Alkitab bahasa Luang

Rimormiori mak kpodku-kpadku hihi'ini-yapyapni

¹ Hadi de Daud kieheni-nhiarni maka ha rala la mak khi' o'tani la mak kwatunu-kwahniara: Riy mak kpodku-kpadku wniarorni de: “Uplerlawna edonna Ndel la'a lyanti.” Riy mak kakot emkade nhiolli-lietni yotyota-yatyata pa edonna rwo'la-rlekur la kalwiedni ralamni.

² Itmatromlawanni Ndella Ilyamou-Watyatoha pa Nlina-nmat reria rimormior mak kdella nohkeran di wawannu, totpena Namkek teka hota he' ed maka kna'erit nana Uplerlawna talanni pa nwak pa nat niohor E'a, totpa nhu'ru-nhelam la.

³ Mere riy honona rawlari olek la talan mak kaplola, ne rima-rima rhi' yatyatni-halalli. Plol toto'a pa riy id mana edonna nhi'a-nyap miemna plola-mneha.

⁴ Pede Itmatromlawanni Niwra: “Eh! Riy id mana wniarorni edonna nla' temni, mormiorni de rhi' matmera-wulkgaulu la'a rimormio'ru, pa rwarui-rwate'la ira hyonni-hyanni. Ne la riy id mana edonna nhoratnana A' pua edonna nkola tieru-nawur nehla mai A'u.”

⁵ Riy mak kyata-khala re de hota ramta'at nande rmakuk tiarga la genni, yoma Uplerlawna ed maka kruwun reria rimormior mak klernohor reria E'a re.

⁶ Riy mak kyata-khala de rhi'a yawuhi-yawe'et la' riy mak kakleha-kaplara, mere Itmatromlawanni Makdenrer die, ed mak kruwun reria re.

⁷ Awuakwak pa Uplerlawna mak kdella Sion de Namori-nalewna mak kden Israel, de Yakopa duratni-waitni re, totpa rler la yamuki-yahepur lawna. Itmatromlawanni orgahani ed maka khernu-kwau doinia E rimormiorni mehrani-maunu, pa rler la kalwiedni-paitiotni!