Nhiara 139 - Alkitab bahasa Luang

Orgahi-Orha'a mak kakoki-kayap niana rimormiori ed mak kat niohora memna rimormiori ita ha lololli me hota edon Nolin limni la mai ita

¹ Hadi de Daud nhiar ya'ulli-yawedni maka ha rala la mak khi' o'ta la mak kwatunu-kwahniara: Matromlawnu nee! Omumkek rer nieka a ihru-ralmu pede Omuat niohor oleka a wua!

² Omuat niohora momuoga a hihi'u-yapya'pu. La'pa a'g etla olietlet ho'mana, Omuatg oleka wa hare honona mak awuaror nana re.

³ Omuat niohora alia' hanmeni me arien a lia hanmeni. A hihi'u-yapya'pu tulla-knia'ru honona re, Omuat niohor momuoga.

⁴ Me la'pa a'g edonna ultier mia't ho'mana, Omuat niohora oleka la'a hya' maka agiwra ukota-ulde'eta.

⁵ O ed maka khikdior reria a lia'a a wa'lu-wa'lu! Me O ed maka kala O plolmu-mnehemu mua Mriuwun reri a'u.

⁶ Hya' maka Ompuarora-mpualaiya mai a'u de samomuou muemna hade, pede takeni wuarora-wualai niana hare honona.

⁷ Hota alia liola loi-talan meni totpena uhal doinia O'a?! Hota aliol talan meni pa uwlar olietlet la O'a totpena matmu nloi lia mai a'g oo?

⁸ La'pa agiwra gha'at la lyanti totpena amuol wua, mere O' etla hande wali. La'pa alia'a noha mati-rai miolu de ralamni ho'mana O ed walia.

⁹ La'pa alia ghollia tipur matni onde la warat matni, mak ler ha ntutuin la delooo!

¹⁰ Ho'mana la hande mana O' edon Muolin limmu-mpue'er rormu la mai a'u. Agiwra upru'wu la yawa, dewade O ed maka mrian a lia heyanna.

¹¹ Ne la'pa awuak de mela-kalma nruwun reri a'u totpena lelerni mak adiella de nwalia melmel wa,

¹² mere la' Matro'mu de mela mana nreprepar pa emekneka repr oleka wa yoma Omumkeka melmelli mana emeknekama nreprepra.

¹³ Matromlawnu ed maka kakoki-kayapia ih'u-ra'ru. Mhi'a plu'wu-pleheya (teliti) a lia la' ler maka a'g ed ma't la' i'nu apannu ralamni.

¹⁴ Matroma! A ino'nu maka Omukoki-muyapia, de samomuounu nee! Hya' maka ha Mhi' nana re honona rhi' a pua u'uli-uwedi O'a, yoma agat niohora hya' maka Mhi'a re de samomuou memna.

¹⁵ Mumkek reria a ih'u-ra'ru ru'ru-kliaklu la' ler maka muori liawan lolola la' a i'nu apannu ralamni. yoma O' ed maka kakoki-kayapi plu'u-plehu a'u. Mere la' ler de de riy ta'enniana ramkek nan a'u.

¹⁶ La'pa adien ma'ta la a i'nu puhuni-apannu de O matmu e nod rer lia mai a'u. La' ler maka a i'nu edon nmor dioin ma'ta a'u ho'mana lera wo'ir maka hota amuormiori la nohkeran di wawannu di, Omtiulsi oleka la O pukmu ralamni.

¹⁷ Uplerlawnu ne! A takeni wuaror nana mak ha Mpuarora-mpualaiya re! Wniarormu-wnialaimu harahu rehia!

¹⁸ La'pa atiotpa pa ariekna, de liawanni reh wialia eni'ola makden la eni wawannu. La'pa umat doin la yawyawra mana O edon oliet mai a'u.

¹⁹ Uplerlawnu ne! Mpunu-mpuenan momuoga riy yatyata rella. Muhal doinia a lia'a riy maka sukni kwunu-kwenna rimormior wialli rilla mai a'u!

²⁰ Uplerlawnu ne! A'g e utlin rer miemna nhi'inde e rwohora-rtatra O la O genmu-tienmu. Arwalmu re rmalawan la O'a, rnairi lir mak edon kaplola.

²¹ Matrome! A ralmu namehra doin la'a riy maka kagai pietan la O'a. A'uwenan la riy maka kmalawan la O'a, Matroma.

²² La'pa umkeka re a gah'u npahna wenna, ne aghi'a la a arwa'lu.

²³ Uplerlawnu ne! Pena Omumkek rer nieka a ihru-ralmu! Ne Mtia'ag a' pua totpena Muatg a ralma-rio'ru.

²⁴ Matroma! Mumkek teka yanpa ralma-riora yatyata-halala ed ma'u? Ne la'pa etla de Muwiru-muwewla totpena alier la loi-talla plollola totpa hota agor O pa nodi liarni!