Nhiara 138 - Alkitab bahasa Luang

Daud Na'uli-nawedia Itmatromlawanni Makdenrer die onnila tulanni-sniayanni

¹ Daud Nhiarni: Matromlawnu ne! A'uli-uwedi O'a de agodia ihru-ralmu mak kaploi-kaple'era. La'pa adien ho'ola uplera-upmati gaini ho'mana awuahniar pa u'uli-uwedi niek O muemeha.

² Awualtiora-wualtieman pa a'upal niana O rom gah waumuehemu Matroma! U'uli-uwedi O nanmu, yoma Mtiut rer niek sniayanmu mai a'u. O' edon Muwlar dioinia nnio'omu. Omhi' pa rira ra'uli-rawedi O nanmu la'pa lirmu-tunmu yoma O' ed mak kreh niana hya'-hya' honona.

³ La'pa aghaun tiy O' de, Ompuahl olekwa me Omurur niana a ralmu pa apuarani.

⁴ Matroma! Hota la' ray-ray honona mai noha wawannu ra'uli-rawedi O'a, yoma ir honona ratlin oleka hya' maka Mukot taru.

⁵ Matromlawnu ne! Makdenreri O'a! Hya' ed maka Mhi' nan de, ed maka khi' ir pa rwahniar nohora O'a yoma Omuemeha nanpena inponmu narehia hya'a-hya'a honona.

⁶ Orgahi-Orha'a Ndella gen tiutullu-lolo'oni mere edon Nolin limni-nwe'er rorni la riy maka klola yawa. Mere la'pa riy maka kpo'ona-kraka re, Orgahi-Orha'a Ndel oliet la' ira, mere Nat niohora ir hihi'ini-yapyapni yatyatni-halalli.

⁷ La'awa lerni la alier la sniusa, de O' ed maka khi' a pua a'g edonna wualer la a mormio'ru. O' ed maka kora a' arwa'lu re miwenwenna me Omual a' pua lier la mormiori-lewlewna yoma la' O plolmu-mnehemu.

⁸ Hare honona maka Omiwra Mhi' nana mai a'u, de id mana edonna Mhuoratdoinia. Matromlawnu ne! Makdenreri O'a! Omtiutga sniayanmu pa nodi liarni pede Matrome! Yana Muolin doin a'u maka Mukoki-muyap niana di.