Nhiara 137 - Alkitab bahasa Luang

Yatipu-yatniani la'a ger wawuau makden Babel re aratni

¹ La' ler maka rtorn am pia rwutu-rkohoga am lia noha Babel de, amamtatan la gera wawuau re aratni pa a nhiorat mamni nko'i nana Sion, a gen miamni de, alului-nurnuhru nohora.

^2-3 La'a riy maka ktoran nan ami re rhopan pa ampahniara nhiara yamuki-yahepru mak kwatiawua Sion. Mere amahmena mpatunu-mpahniara pede amaloi-mata'ara a hitara-fiol mamni la ora-au hananni.

⁴ Yoma hota emkameni owa'an pa ampahniar nohora Itmatromlawanni Makdenrer die la' noha-rai maka mahulti-mahamar la?!

^5-6 Oh! Yerusalem, a ge'nu-tie'nu nee! A ralmu ndawar reri a gen mamni de totpena adiella hande owa' ana. Hade ed mak khi' a pua a'uhepuepur toto' memna. La'pa aghoratdoin Yerusalem de, ndella pa ta'eni a nu'ru wuahniar owa'ana ne a li'mu edon nahe'i owa'ana tiwla-prai.

⁷ Matromee! Yana Mhortaplinga riy makden la Edom de hihi'ini-yapyapni la' lerni la makden Babel rkowra-rwalia letlawna Yerusalem de riarin tar pua riwra: “Miopan waklolia! Mtiuwun yopna la pa miopan waklolia! Yana mhi' targa au tio'orni id pa nayariri oo!”

^8-9 Makden Babel miy ree! Hota rwakoha-rwanannia miy letmi! Mpiei nieka nhiakarmi oo! Mitlina! La'pa he' ed maka kwahla nan yatyatni-halalli maka miy mhi' nan oleka mai makden Yerusalem ami, hota ralamni re ramtiertierun wa. Ir er mak kte'la la miy upmi-a'nami maka lokmera-papay mia'ta pa rnakul targa la wo'ora wat muetma wawannu, de rlernohora hya' ed maka mhi' nan oleka mai ami.