Nhiara 136 - Alkitab bahasa Luang

Itmatromlawanni Makdenrer die tulla-sniayanni la makden Israel

¹ Ta'uli-tawedia Itmatromlawanni Makdenrer die yoma Endella kalwiedni-paitiotni wawannu. Tulla-sniayanni nodi liarni pa hadom edon nler etia.

² Ta'uli-tawedi tsu'ru-tselam la Uplerlawna-Mempulwatnu mak kareh dioini meman la makodi plolli honona maka rimormiori nohkeran di rhoi-rtania. Ta'uli-tawedi E'a yoma tulla-sniayanni nodi pa nodi liarni.

³ Ta'uli-tawedi tlilili-tmamuau Orgahi-Orha'a. E' ed makodi plolli la'a mak karuri-kalai honona mak ha riwra la noha utnu-liannu. Ta'uli-tawedi E'a onnila tulla-sniayanni mak kodi liarni.

⁴ Ta'uli-tawedi E'a yoma E' ed maka khi' nana hihi'a-yapyapi mak kamehi-kayona maka riy edon ramkek taru pede ema rtaplelleltarga, onnila E tulla-sniayanni mak kodi liarni.

⁵ Ta'uli-tawedi E'a yoma E' ed maka kakoki-kayapi lyanti Nnairia E kirkirni-ralma-rior samomuounu, onnila E tulla-sniayanni mak kodi liarni.

⁶ La' E yat wamueheni pa Nweran targa nohmarna la gera-tah'i ulatni wawannu, onnila E tulla-sniayanni mak kodi liarni.

⁷ E' ed mak khi' nana mak kodia hititni-repreparni mak kdella lyanti, onnila E tulla-sniayanni mak kodi liarni.

⁸ De Nhi'a lera pa nodi plolli la leler gahani, onnila E tulla-sniayanni mak kodi liarni.

⁹ Me Nhi' wtiona-wolla pa nodi plolli la melmela, onnila E tulla-sniayanni mak kodi liarni.

¹⁰ Nhopna hopopanni-lili'irnu nwenna upa-a'na yanulu la' Mesir yoma tulla-sniayanni mak kodi liarni la' Israel re rimormiorni.

¹¹ Nodigota Israel la' Mesir, onnila E tulla-sniayanni mak kodi liarni.

¹² Nnairi limni mak karuri-ka'orta, onnila E tulla-sniayanni mak kodi liarni.

¹³ La' Laut Gelagah de Nhi'a pa nahniarit la woru, onnila E tulla-sniayanni mak kodi liarni.

¹⁴ Nodia E rimormiorni riy Israel re pa rleret lia walli, onnila E tulla-sniayanni mak kodi liarni.

¹⁵ Mere ray Mesir nora maka'arni honona re rler pa ratpupul wenwenna, yoma Nsaynia rimormiorni pa nodi liarni.

¹⁶ Nodia E rimormiorni pa rala' lola wo'ora-kawur letletna-mdurdurna, onnila E tulla-sniayanni mak kodi liarni.

¹⁷ La'pa Nala ray-ray mak karuri-ka'orta re la yawa, yoma la'a tniulanni-sniayanni mak kodi liarni la E rimormiorni.

¹⁸ Nwunu-nwenna ray-ray orkota-ornanana, onnila E tulla-sniayanni mak kodi liarni la rimormiorni.

¹⁹ De Sihon makden Amori rayni de, Nwenan nana, onnila E tulla-sniayanni mak kodi liarni la E rimormiorni.

²⁰ Og makden Basan rayni ho'mana, Nte'la wenan nan walia, onnila E tulla-sniayanni mak kodi liarni la E rimormiorni.

²¹ Ray-ray mak kmati re letni-ruhunni honona de Orgahi-Orha'a Nala la E' rimormiorni, onnila E tulla-sniayanni mak kodi liarni.

²² Totpena Nhi' gen die la riy Israel, mak khima-kre' E' de gahani, onnila E tulla-sniayanni mak kodi liarni.

²³ La' pa riy ral it la yawa de, E' edon Nhoratdoin ita, onnila E tulla-sniayanni mak kodi liarni.

²⁴ Nwe'er doin it la it arwalli limni ralamni, onnila E tulla-sniayanni mak kodi liarni.

²⁵ Hare honona makdella nohkeran di wawannu de, Nalla ra'ana-remnu, onnila E tulla-sniayanni mak kodi liarni.

²⁶ Mmiai pia ta'uli-tawedi tlilili-tmamuau Uplerlawna-Mempulwatnu makdella tutullu-lolo'oni. La E' nanpena tniulanni-sniayanni nkokar la lyanti tutullu me nwahipin la nohmarna ga'arni de. La hadom mana edonna nodi' et lia kalwiedni de ha lolola!!