Nhiara 135 - Alkitab bahasa Luang

Nhiar ya'uli-yawedi la Itmatromlawanni Makdenrer die, haleluya!

¹ Haleluya! Ya'uli-yawedi la Itmatromlawanni Makdenrer die! Mmiai pia tran atulga Orgahi-Orha'a nanni la lyanti! Miy hononmi mak khima-kre' E'a de mi'uli-miwedia E'a!

^2-3 Mak kar lia Uplerlawna roma kreini ralamni de miy hononmi mi'uli-miwedi, mhiu'ru-mhielma, mlilili-mmiamuawua Itmatromlawanni! Yoma la' Itmatromlawanni Makdenrer die tlernana kalwiedwedni. Mmiai pia twatunu-twahniar pa ta'uli-tawedia E kotni-nanni yoma sniayni onni E'a.

⁴ Yoma Itmatromlawanni Nwalir niana Yakop duratni-waitni pa Nhi'a la gah wamueheni. De riy Israel re er maka Uplerlawna Nhi'a la E rimormiorni.

⁵ Agat niohora Itmatromlawanni inponni pa Nareh dioin momuoga uplera-upmati re honona.

⁶ Nhi'a hadom la'a nohkerna-rai miaran di nora darta-lyanti Nlernohor neka E ralma-rior wamueheni. La' lor la tah'i lawna la'pa tah'i wikni nekane Nhi' emkade wal lia.

⁷ Nhopna anin lawna pa nlergot la gen miaka Nwahi' tar olekwa, na'nama wowta-kakma de anin lawna nod lia'a-nod miai. Nala otna de nodia ihini-turnu na'itar wut nieka hita-tlena kukru-gauru pa nhi'nande layera ndawar la noha wawannu.

⁸ Nwunu-nwenna a'na yanulu re honona la' Mesir. De nwaga la rimormiori pa ntuin la nhiuri-wnia'ana.

⁹ La' makden Mesir gaini ralamni de, Nhi'a-nyap nieka hihi'a-yapyapi mak kamehi-kayona mak ktutga Uplerlawna rurni-laini pede ema rtaplelleltarga, totpa Nwahla ray Mesir nor wutga tniutnu-nhianni nhielli-liarni hihi'ini-yapyapni.

¹⁰ Noha-rai liawanni mak kaplin niohora E', de Nal la yawa me Nwenan nan momuoga ray-ray lialawna re honona.

¹¹ Emeknekama Sihon makden la Amori rayni, me Og makden la Basan rayni, me la' walia ray-ray nio'a Kana'ana re honona.

¹² Totpena nohoni-raini re honona Nala la E rimormiorni, de rla' Israel gahani momuoga.

¹³ Matromlawnu ne! Makdenreri O'a! O nanmu de riy rwahaur nohora la meni-meni maiya noh maran di wawannu, me hota edonna rhoratdoin etia O nanmu della pa nodia la tuwu-tuwu.

¹⁴ Yoma Omuodniana rimormiormu mak kakleh hala, me la' walia Mtiulla-msiaynia riy maka khima-kre' O'a.

¹⁵ Mak kden la noha-rai re rhi'a-ryapia leli-maha pa rwal lia uplera-upmati totpena rwaltiora-rwaltieman la nayanni. Uplera-upmati re, rira rakoki-rayap nian to'a re.

¹⁶ Rhi' uplera-upmati re de rodia nurnu, mere edon raltieri, rodia matni mere edon ramkek nana hadoma.

¹⁷ Rod wialia tlinni mere edon ratlin eti. E rakleh memna aranni!

¹⁸ Eee! Hota mak khi' nana uplera-upmati re pa rha'ar aranni la hota rwal lia hamamuamua emeknekama ir uplerni-upmatni!

¹⁹ Israel miy re! Mmiai pia mi'uli-miwedia Itmatromlawanni oo! Harun duratni-waitni mak kla krei o'tani-matni (imam-imam), mmiai pia mi'uli-miwedia E' Makdenreri E'a.

²⁰ Riy Lewi hononmi mak khima-kre'a imam-imam la Uplerlawna roma kreini nayanni mia mi'uli-miwedia Itmatromlawanni Makdenreri de. Miy hononmi mak ka'unni-kamta'ata Itmatromlawanni, mi'uli-miwedia mlilili-mmiamuau Orgahi-Orha'a Uplerlawna-Mempulwatnu la' genni-tienni.

²¹ Mi'uli-miwedia Itmatromni la' Sion, de la' Yerusalem, maka Ha Ndella de! Haleluya! Ya'uli-yawedi la Itmatromlawanni Makdenrer die!