Nhiara 132 - Alkitab bahasa Luang

Itmatromlawanni Makdenrer die Nwalir nian Daud pa nwal lia ray me Sion pa nwal lia genni-tienni

¹ Nhiar maka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni (Nhiara Ziarah): Matromlawnu ne! Mhuoratreria Daud mak lera nlernana yawuhi-yawe'eta tututu-wawuau.

² Matroma, O' di de Yakop Uplerlawanni, de Orgahi-Orha'a Uplerlawna-Mempulwatnu Makaruri-kalai. Yana Mhuoratdoinia la' emkameni la Daud nlokra nnio'oni la' O'a,

^3-4 niwra: “A'g edonna rien eti a lia'a a ro'mu nayanni onde unin a lia'a a ge'nu,

⁵ la'pa a'g edonna uriri mia'ta roma krei id la Yakopa Uplerlawanni, de Orgahi-Orha'a Uplerlawna-Mempulwatnu Makaruri-kalai die.”

⁶ La'a Efrata de it tatlin nana rwahaur nohora luwuau-koplahu maka Uplerlawna riorni-liaini genni noma tla tlernana la wo'or-kawru (padang) Yaar pa amodi mmai.

⁷ Mmiai pia tla'a Orgahi-Orha'a roma kreini. Mmiai pia tru'u-towar la E liwan genni gaini.

⁸ Matromlawnu ne! Ampakwak pa Mdien nek la genmu-tienmu di, Omuor wutga gen miaka luwuau-koplahu maka O riormu-liaimu genni, mak ktutga O rurmu-laimu de.

⁹ Ampakwak pa riy makpolu-makwak la O'a la rimormiorni rerieini (imam-imam) rden rer niek la plol wawannu ne rimormiormu mana ramuki-rahepru, rwatunu-rwahniara.

¹⁰ Matroma, la'a O hopopanmu Daud de rerieini de, yana Mpuanikli-mpuayotlia ray miaka ha Mpualir nian de.

¹¹ Itmatromlawanni Makdenreri de Nlokr' olek la Daud ne hota E' edonna Nhoratdoinia E nnio'oni la. Niwra hota la Daud a'nani ida de Itmatromlawanni Nala pa nhi' ray, totpena ntorna-nraut pa nhernu-nwaga Daud.

¹² “Hornama upmu-a'namu re rlernohora la'a hya' maka Ukot taru re pa rlernohora, de hota duratni-waitni re rhernu-rwauga o' pa rhi' ray.”

¹³ Yoma Itmatromlawanni Makdenrer die, Nwalir nian oleka Sion onnila E' ed maka sukni pa Nhi'a la genni-tienni.

¹⁴ Niwra: “Aghol lia handi wa pa nodi liarni. Agiwra godi plolli la gen di wa.

¹⁵ Pena Agala ra'a-palu pripanni-fa'anni la Sion (Yerusalem) de. La'pa rimormiorni mak kakleha-kaplara nekane A gala yamanna pa ra'ana.

¹⁶ La'a riy makpolu-makwak la A'u (imam-imam) re rtutga talan totpa rler la yamori-yalewna. Ne rimormio'ru re honona neniehu-terter nohora yamukni-yaheparnu.

¹⁷ La' Sion di hota Agala Daud duratni-waitni id pa nhi' ray. Lodanni-hairni hota Agala pa naruri-na'orta la'pa nodi liarni.

¹⁸ Lodanni-hairni nler la pripanni-fa'anni, mere la'pa arwalli re rmola-rma'a yoma ral ir la' yawa.”