Nhiara 13 - Alkitab bahasa Luang

Riy mak kler la susa ralamni nsumbain la Itmatromlawanni Makdenrer die

¹ Hadi de Daud ya'ulli-yawedni la wniatunnu-wniahniarni mak ha rala la mak khi' o'tani la mak kwatunu-kwahniara:

² Niwra: Hota mowen nianpena O Mhuoratnan a'u, Matrome? Ne hota mowen nianpena O Mhuaria O gaimu mai a'u Matrome? Hota mowen nianpena alier la kalwiedni Matrome? Hota a'g emkadi mamaini?

³ Hota ler wo'ira owa'ana a ralmu wolwo'la pa edon namtiertiernu? Lera-ler nekpa a ralmu nmawal doinia. Yana Muolin doinia a' arwa'lu pa nal a lia yawa, Matrome!

⁴ Mlin reri-muat reri a'u Matrome! Uplerlawnu ne! Mtiulan pa Mpuahla nan a li'ru, me Mual a'u pua ururi-ulai, totpena yana alier la noha mati-rai molu.

⁵ Yana Muolli arwa'lu re pa riwra ir ral olek a lia' yawa. Yana irahepru pa riarni-riarin nohora yoma ra'unut nan olek a wua.

⁶ Yoma agha'ar reri a arnu la O'a, onnila O sniayanmu mak kodi liarni, pede a' nianpena ed mak kamuki-kahepur nohora O'a, yoma O' ed mak kamori-kalewna a'u. Pede agiwra gala wniatunu-wniahniara ga' u'uli-uwedia O la' genmu-tienmu yoma O kalwiedmu-paitiotmu mai a'u.