Nhiara 124 - Alkitab bahasa Luang

Itmatromlawanni Makdenrer die ed maka kruwun reria rimormiorni

¹ Nhiar maka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni la'a letlawna Yerusalem (Nhiara Ziarah Daud): La'pa Itmatromlawanni Makdenrer die edonna Nodnian it de, hota it tsi'a hya' o?! Makden Israel miy re, mikot teka!

² La'pa it arwalli re rler rtemn ita, ne Itmatromlawanni Namkek rer tiertehra to' ita, de hota it tsi' emkameni o?!

³ Yoma la'a ira ralam mehrani la ita pede rahankeran nan de riwra rlumu-rtelan to' it wa.

⁴ La'pa Itmatromlawanni edonna Ntulan mai ita, de emeknekama it taner olek it wa, pa tayaton la gera ralamni.

⁵ Pa hota it tmati lia gera ralamni, yoma twuwul wenna ita la'a ger maka kmota-kaulu letgarni.

⁶ Mmiai pia ta'uli-tawedi Orgahi-Orha'a Uplerlawna-Mempulwatnu, yoma E edonna Nolin limni la mai ita pa la'pa it arwalli re rehgoru ita.

⁷ It emolmolan nekama ma'nu maka katiewar doin la dedesu tniokla, pa nnem olietlet wa yoma tniokla netnian oleka wa.

⁸ Tniulan de ha nwatiaga Orgahi-Orha'a Uplerlawna-Mempulwatnu Maka Kakoki-kayapi niana lyanti nora nohkerna wawannu re honona.