Nhiara 121 - Alkitab bahasa Luang

Itmatromlawanni Nruwun rer ita

¹ Nhiar miaka rwatunu-rwahniar la'pa rha'at la wo'or wawannu pa rla rkola tieru-rawur nehla la Itmatromlawanni (Nhiara Ziarah): Awuatniar la wo'ora-kawru re hananni, pa wuatoli-wuatakra hota he' ed maka kmai pia ktulan la mai a'g o?

² Mere la'pa emkameni ho'mana eneknek to'ama Orgahi-Orha'a Makohi-maka'ara, kawilla-kayomtia lyanit marna nohkerna-rai miaran di, ed maka mak ktulan la mai a'u.

³ Hota edonna Namkek rer nieka o' pa o mtiuini-mdiayi, yoma la'a E' de edonan Nanin targa la'a yatiak genni ralamni.

⁴ Plola! Mak kakruwun reria Israel de edonna Nhoki onde Nanin targa.

⁵ Itmatromlawanni Makdenrer die ed maka katiak re'ru, pa Nden nek la o' onmu totpena Nruwun re'ru.

⁶ Hota ler pahna lawna edonna nhit nan o'a me o' edonna mumehra-mumau onnila wolla.

⁷ Itmatromni Makdenrer die ed maka kruwun reri o' pa edonna mlier la yatyatni-halalli yatlorni-yatra'ani. E' ed maka klernohor reri o' totpena mlier la mormiori-lewlewna ralamni.

⁸ La'pa omlia'a-muai die hota E Nlernohor rer nie'ku pa nodi liarni.