Nhiara 119 - Alkitab bahasa Luang

He' ed mak klernohor reria Itmatromlawanni Makdenrer die deullu-tatarni lirni-tunnu de hota ramuki-rahepur reri Talan mak kaplola pa tahepuepur reri

¹ Riy mak edonna kler tar lia do'a-hala mere nlernohor reria Itmatromlawanni deullu-tatarni, de hota ramuki-rahepur reri!

² De riy maka ka'unni-kamta'ata la'a hya' maka Itmatromlawanni ha Nakot oleka re wa, pa rala ir ralma ploi-ple'erni pa rat niohor memn E'a, de hota ralamni rahepuepru.

³ Nhiolli-lietni rlernohora Itmatromlawanni ralma-riorni pa edonna rler la yatni-halli.

⁴ Matroma, Omuala oleka O deulu-tatarmu pa am matga, Matroma, totpena amlernohor reria.

⁵ Matroma, awuak de la'a hya' maka Mukota re, de agala a ralmu tetema pa liernohor reria.

⁶ La'pa aliernohora hya' maka Omukota re honona, hota riy edonna rhi' amola-ma'a a'u.

⁷ La'pa agat niohor oleka O lirmu-tunmu mak kaplola-kamneha, maka Omueti oleka re honnona, de a'u'uli-uwedi re'ru, agodia ih'ru ploi-ralma ple'era.

⁸ A'g e wuahak pa ghu'ru-ghelam la hya' maka Mdieul taru-mtiatar taru re honona. Yan Muolin limmu-mpue'er rormu la a'u.

Tala it ralamni tetema pa tlernohor reria Itmatromlawanni deullu-tatarni

⁹ La' talan emkameni pede riy makden ma'ta la tuwari-laweru lewatni hota ratiaka inonni pa yana rler la do'a-hala ralamni? Hota rlernohor reria O lirmu-tunmu de, Matroma totpena yana rler la do'a-hala ralamni.

¹⁰ Hota agala a ralmu tetema pa gat niohor memn O'a, Matroma. Yana Muolin doinia a lia pa wuaho'a-wuahai sala O loimu-talanmu.

¹¹ O wniatutu-wniaye'emu honona de awuatierun targa la a ih'ru-ralmu, totpena yana aghi'a do'a-hal la' O'a.

¹² U'uli-uwedi reria O'a Matroma, ne awuak pa Mpuatutu-mpuaye' reri a lia'a hya' maka ha Mue'er taru-mtiatar taru oleka re wa.

¹³ Aghar li'ru pa ukot nohora deulu-tatar maka ha Mue'era-mtiatar taru oleka re wa.

¹⁴ O nie'ermu-tniatarmu emeknekama re'a-tniar lalawna mak khi' a ralmu pa nahepuepur reri yoma aliernohor reria.

¹⁵ Agiwra wuatutu-wuaye'ela hya' maka ha Muetli oleka re wa. De maka ha Mtiut tiaru re atia'wa reria a nhiortu la' honona.

¹⁶ La'a hya' maka ha Mukot taru re, de rhi' a' pua a ralmu nahepuepru, ne hota a'g edonna ghoratdoinia la.

La' emkameni ho'mana riy rler la kropna-krieutu de Itmatromlawanni Makdenrer die deullu-tatarni lirni-tunnu nodi yahe'i-yahepru

¹⁷ Matroma! Awuak de Muala ralam kalwiedmu pa nden rer lia a' di makhima-kre' O'a, totpena amuormiori plalahwa pa utlina-utailla wniatutmu-wniaye'emu re honona.

¹⁸ Mhuaria a kirkira-ralma rio'ru totpena ania'erit nana O wniatutmu-wniaye'emu maka mak ksamomuou memna la'a nie'ermu-tniatarmu ralamni.

¹⁹ Hota a'g edonna muori plalahwa wal lia noh di wawannu pa awuak de yana Matro'mu Nade'a nie'erni-tniatarni re la' mai a'u.

²⁰ A ralma-rio'ru ndawar rer miamainia O deulu-tatarmu, yoma lera-ler nekpa agiwra plet pa a gat niohora O lirmu-tunmu.

²¹ Ompuolliohora riy maka kpo'ona-kraka me Mukmua riy maka edonna klernohora O lirmu-tunmu.

²² Matroma, Mual a' pua yana riy rapolu-raliella me rahe'i-ramali a'u, yoma a'g e ghi'a hadom de aliernohora hya' maka ha Mukota.

²³ La'pa o'ta-mata maka kodi plolli rawoka-rale'u pua rakot nohora aliolola totpena ral a lia yaw ho'mana a' di mak khima-kre' O'a de, a'g edonna wo'la nohora re, yoma a'g e wuarora-wualai niohora la'a hya' maka ha Mue'ertaru-mtiatartarg oleka re wa.

²⁴ Mak ha Mue'er taru-mtiatar taru re emeknekama nnio'a-niatu maka klohni-kpalmua a ralmu nhi'nande a ralmu nahepru.

Ralamni-riorni totpena nlernohor reria Itmatromlawanni Makdenrer die lirni-tunnu deullu-tatarni

²⁵ A'ukpo'pa targa a lia'a koda-awu ralamni yoma nhi' pa amuat wia! Matrome! Mual a pua alier owa'an la mormiori-dardiari kalwieda-paitiota wa, yoma Mhuoratreria O nnio'omu de meee!

²⁶ La'a hya' maka aghi'a-yapi niana re de hota ukot nohora la O'a Matroma, ne Matro'mu Nwahla nan a'u! Awuak de Mpuatut tio' a lia'a hya' maka ha Mukot taru re.

²⁷ Mtiulan la mai a'u de Muala a ralma-rio'ru pa nna'eritnana deulu-tatarmu re honona. Emkade hota a'g e wuarora-walai niohora O wniatutu-wniaye'emu mak ksamomuou memna.

²⁸ A nhi'wu-nhio'nu namkoha-namnanin tar lia'a a sniu'su ralamni, mere Matromlawnu ne, Mhi' aruri-alai nian a'u emekto'ama hya' ed maka Mukot targa oleka de.

²⁹ Muod olietlet targ a lia'a loi-talan maka kodia kliert a'u. Yoma la'a O kalwiedmu pede Mpuatut nieka a lia'a O deulu-tatarmu re.

³⁰ La' maka awualiri, de uhak totpena agatu ghu'ru-ghelam rer lia O lirmu-tunmu. Deulu-tatarmu re er maka awuahniorat reria.

³¹ La'pa la'a hya' maka ha Mukota re de a'g e liernohor reri pa awuak la Matro'mu de yana Mhi' a' pua liernana molmola-mama'a.

³² Hota agala a ralma ploi-ple'era pa aliernohor reria hya' maka ha Mukot taru. Yoma O' e Mual a' pua a nhiortu yeher to'ama naphyari.

Tsumbain pa twaka Itmatromlawanni Makdenrer die Nala kirkira-ralma riora la'a E lirni-tunnu deullu-tatarni

³³ Matroma, Mpuatutg a'u totpena agat niohora la'a hya' maka ha Mue'er taru-mtiatar taru re. Totpena aliernohora pa nodi liarni pa la nhoru.

³⁴ Mhi' a' pua a nhiortu yeher to'ama naphyari lia O deulu-tatarmu re, totpena agala a ralmu tetema pa aliernohor reria.

³⁵ Awuak de Mtiutga loimu-talanmu mai a'u totpa aliernohora O lirmu-tunmu re yoma hade ed mak khi' a ralmu pa nahepru.

³⁶ Mtiulan mai a'u totpena a ralma-rio'ru ndawar rer miamain la O deulmu-tatarmu. Yana awuaror nohor reria kupna-kai re'a-tniaru.

³⁷ Matroma, Mutiak reri a'u totpena yana a ralma-rio'ru nodi rer lia hya' maka edonna nwal lia hadomdoma. Mtiut nieka kalwiedmu-paitiotmu mai a'u emekwalima hya' ed maka Mukottarg olekwa.

³⁸ Mhi' nan memna hya' ed maka Mukottarg oleka Matroma la hopopanmu a' di, yoma Mukottarg olek hadewa la riy maka katu ka'unni-kamta'at O'a.

³⁹ Matroma, yana Muollia pa rhi' amolu-ama' a'u, yoma hade ed maka umta'ata rer lia. Mtiulan nan a'u yoma plola la O nie'ermu-tniatarmu de samoga.

⁴⁰ Matroma, a yahe'ru de ndawar rer miamaini la'a hya' maka ha Mukot olek re wa. Matroma, onnila O' ed mak kden rer lia plol wawannu de Mual a pua lier la mormiori-dardiari warwuaru.

Tsa'ar it mormiorni la Itmatromlawanni deullu-tatarni

⁴¹ Matromlawnu neee! Mtiut tieka O sniayanmu mak kodi liarni la' a'u. Mumori-mulewn a'u yoma O nnio'omu olek hade wa.

⁴² Totpena hota awuahla riy maka kapolu-kaliella a'u re lirni-tunnu mai a'u, yoma agha'ar a arnu la hya' ed maka Mukottarg oleka re.

⁴³ Mtiulan la mai a'u Matroma, totpena ukot hadom de adiella plola wawannu, yoma aghapar rer lia' O lirmu-tunmu makaplola-kamneha maka Omueti olek la de.

⁴⁴ Agiwra ghi' hadom de ga' rer lia O deulu-tatarmu pa nodia pa nodi liarni.

⁴⁵ Pede la a mormiori-dardia'ru di de alier la mtiertierannu, yoma a'utlina-utailla O wniatutmu-wniaye'emu.

⁴⁶ La'a hya' maka ha Mue'er taru-mtiatar taru re honona, de hota ukota-ulde'eta hare la'a ray-ray re honona de hota edonna muola-mua'a.

⁴⁷ A su'ku matmiat lia O lirmu-tunmu yoma a ralmu e nod rer lia.

⁴⁸ A ralmu nal nana hya' maka ha Mukota pa aghu'ru-ghelam rer lia. Maka ha Mtiut tiaru re atia'wa reria a nhiortu la' honona.

Tsa'ar it aranni la Itmatromlawanni Makdenrer die lirni-tunnu deullu-tatarni.

⁴⁹ Matroma, Mhuoratreria O nnio'omu la a'u, mak khima-kre' O' di. Agha'ara a arnu la O nnio'omu de.

⁵⁰ La' ler maka alier la kropna-krieutu de nnio'omu de ed mak kodia a lia'a ralam mtiertierannu. Aliernana mormiori-dardiari onnila hya' ed maka Mukottarg oleka wa.

⁵¹ Lera-ler nekpa riy maka kpo'ona-kraka re raniha-ramalia a'u. Mere emkade ho'mana atioran rer pitpitga la'a O deulu-tatarmu re honona pa aliernohor rer nieka la.

⁵² Awuarora-wualai niohora O deulu-tatarmu maka ha Mue'er taru-mtiatar taru la'a ulul genni, de nnia'eratni. La' hade pede a ralmu di namtiertiernu olekwa.

⁵³ A'uwenan la riy maka ralamni nkoili-nkaili, yoma ir ralma-riorni edonna nko'i nan etia O deulu-tatarmu.

⁵⁴ La'a a mormio'ru mak edonna kaplahwa la noh di wawannu, de la'a hya' maka ha Mukottaru re de agodia la wniatunu-wniahniara pa u'uli-uwedi reria O'a.

⁵⁵ La'pa lera nmel wa dewade a'g e ghoratreria O'a Matroma! O deulu-tatarmu de atioran reri apitga.

⁵⁶ Yoma agatu ghu'ru-ghelam la' O nie'ermu-tniatarmu de nhi'nande a ralmu nahepuepru.

Nakottarga hota natlina-natail rer lia Uplerlawna lirni-tunnu deullu-tatarni.

⁵⁷ Matroma, la' O' nanpena ed maka a ralmu ha nala. Pede a'ukottarga de hota aliernohora O wniatutmu-wniaye'emu.

⁵⁸ Agal tetema a ralmu pa awuak la O' pa Mtiulla-msiayn nan a'u, de emeknekama O nnio'omu-niatmu maka ha Mukottarg' oleka re wa.

⁵⁹ A' orgah'u wuaror nohora a nhio'lu-lie'tu maka aghi' nana re honona, pede orgah'u ukottarga de hota awualdioin targho' pa aliernohora O lirmu-tunmu re honona.

⁶⁰ Amuahrur pua liernohor reria O lirmu-tunmu. A'g edonna palo'ona-patau a lia a ge'nu, mere wuo'la pa uplet nohora pa utlina-utailla hya' ed maka ha Mukot oleka de.

⁶¹ Riy yatyata-halala re re'er targa darni pa ra rtot a'u, mere a'g edonna ghoratdoinia O nie'ermu-tniatarmu.

⁶² La'awa mela letgara, demade a'umat pa u'uli-uwedi O'a Matroma, yoma aghoratnana hya' maka Omueti oleka re maka kaplola-kamneh momuou.

⁶³ Agora riy maka ka'unni-kamta'at O'a re mla' ihyida-ralmida, de la'a riy honona mak klernohor reri O lirmu-tunmu de rla' a mutwua'lu.

⁶⁴ Mai noha wawannu re honona rpenpuen momuou lia O sniayanmu mak kodi liarni, Matroma! Mpuatutu-mpuaye' a lia'a hya' maka Mue'er taru-mtiatar taru re honona.

La' sniusa ralamni de nwatutu it totpa tatlina-tatailia Uplerlawna lirni-tunnu deullu-tatarni

⁶⁵ Matroma, Omliernohor oleka la'a hya' maka ha Muno'taru re pa Mhi' nan samomuoga la a' di, mak khima-kre'a O'a.

⁶⁶ Matroma, Mual a' pua liernana kirkira-ralma rior samomuou, yoma a'g e pesiaya la'a hya' maka ha Mukota re honona.

⁶⁷ La'pa a'g edonna liernan ma'ta niukum lawan de, awir olek la walli wa, mere la' dodo'ondi de a'g e tioran reria la'a hya' maka ha Mukota.

⁶⁸ Yoma samou etla O'a, la' hade pede Omhi' neka samomuounu. Pede Mpuatutg a'u totpena liernohora la'a hya' maka ha Mue'er taru-mtiatar taru re wa.

⁶⁹ La'a riy maka kpo'ona-kraka re honona rapupu-raheria a'u, mere plola pa agala ih'ru ploi-ralma ple'er pa ga liernohora O lirmu-tunmu re honona.

⁷⁰ Riy id la' ir mana edonna rna'erit nana hya' mak kaplola, mere deulu-tatarmu de nhi' a ralmu pa nahepuepru.

⁷¹ Alier la sniusa ralamni onnila Omukmua a'u Matroma, mere ha nodia kalwieda-paitiota mai a'u yoma la' talan emkade pede awuatut lia liernohora reria hya' ed maka ha Mukota re.

⁷² La' a wniareknu de, O deulu-tatarmu re rarehi momuou lia'a leli-maha werwerta welli la' noh di wawannu.

Itmatromlawanni Makdenrer die deullu-tatarni naplola-namneha

⁷³ Matroma, O' ed maka kakoki-kayap nian a'u, la' hade pede orgahamu Mual teka kirkira-ralma rior samomuou mai a'u totpena agatu wuaror nan la'a hya' maka ha Mukota re honona.

⁷⁴ La'pa riy maka khu'ru-khelma O' lirmu-tunmu re ramkek a' die, ralamni re rahepur wenna. Yoma a'g e gha'ara a' arnu la'a O nnio'omu re honona.

⁷⁵ A'g e gat niohora la'a hya' maka ha Muetlia re honona de rlol talla, Matroma. O' e Mukmu olek a wua yoma lera-lera nekpa Msiayn reri a'u me Mhi' rer niek la hya' ed maka Mukottarg olekwa.

⁷⁶ Awuak de O sniayanmu mak kodi liarni de nhi' a lia'a ralma yahepru owa'ana. Totpena plol memna la'a hya' ed maka ha Muno'a mai a'u, mak khima-kre' O'a.

⁷⁷ Matroma, Mtiulla-msiayn a'u, totpena a mormio'ru naplalahwa, yoma a hepru ndella lirmu-tunmu de.

⁷⁸ Ndella pa riy maka kpo'ona-kraka re rmola-rma'a, yoma nhi'inde rakot nohor a'u, de riwra hya' mak edon kaplola, mere rakleha nhiapargenni. Mere a'g e wuarora-wualai nieka lira-tun muaka ha Mukota re honona.

⁷⁹ Awuak de riy maka kola tieru-kawur nehla la O'a re, rmai tieman la mai a'u totpena rat niohora O deulu-tatarmu.

⁸⁰ Awuak totpena a ralmu mana edonna nkoil la'a hya'a maka ha Mukota, totpena yana liernana molmola-mama'a.

Nsumbain pa nwaka Uplerlawna Namori-nalewan nan e' la'a arwalli mak kterna e'a

⁸¹ Matrom ee! Awuewiei-niarnara O tultulanmu la la'pa ukleh oleka ruri-lai wia! Aghoratreria pa uhnia'ar la O nnio'omu.

⁸² Awueinia'nu la O nnio'omu de la mahneka memna. A'g e giwra: “Matromee! Hota mowen nianpena Omhi' a' pua a ralmu nmi'no? Yana Muolin limmu mai a'g ee?!”

⁸³ A' di de emeknekama lokrahi genni (kantong anggur) maka ulatni namkioran wa pa rhopliala wa me edon rhoratreri owa'an wa, mere la'a hya' maka ha Mukot oleka wa de a'g edonna ghoratdoinia la.

⁸⁴ Matromee! A'g ed mak khima-kre' O'a! Hota awuei lera wo'ir owa'ana nampena Mumori-mulewan nan a'g e?! Hota mowen nianpena O Mukmua riy maka nhi'inde khokar rer a'u re no?

⁸⁵ Riy mak kpo'ona-kraka, mak edonna klernohora deulu-tatarmu re, e rahi oleka hu'ula totpena ra rtota-rwudi a'u!

⁸⁶ Mere lirmu-tunmu honona re de raplol momuou pede riy rpesiaya. Mtiulan la mai a'u Matroma! Yoma ir e rhokr a'u mere rakleha nhiapargenni.

⁸⁷ Trema-trema rwenan nan a'u. Mere a'g edonna ghoratdoinia O nnio'omu-niatmu.

⁸⁸ Mumori-mulewn a'u Matroma, yoma la'pa emkameni ho'mana Omsiayn rer a'u pa nodi liarni. Totpena la a' muana ghu'ru-ghelma utlina-utail la'a hya' maka ha Mriora-mliai tiarga.

Tpesiay reria Itmatromlawanni Makdenrer die, lirni-tunnu

⁸⁹ Matromlawnu ne! O lirmu nden la pa nodi liarni. Deulu-tatarmu de Mriora-mliai tiarga la Ilyamou-Watyatoha pa edon rherun doin etia.

⁹⁰ Hya' ed maka Omukottarga de Omhi' nana nodia pa tuwu nla' tuwu. O' ed maka karir niana noh di pede nden nek la genni.

⁹¹ Mak kdena ri honona erla yoma la'a hya' maka Omukot taru. Ir honona ri de rlernohor rer lia hya' ed maka ha Mhuopna.

⁹² O nie'ermu-tniatarmu re rhi' nan a ralmu pa nahepru la' ler maka alier la sniusa ralamni. La'pa edon emkade plol toto' pa amuati olekwa.

⁹³ La' lera-ler nekpa a'g edonna ghoratdoinia O lirmu-tunmu, yoma la' lirmu-tunmu de pede Omumori-mulewn a'u.

⁹⁴ Matrome! Mumori-mulewn a'g e! Yoma a' di de O' gahamu a'u. Mumori-mulewn a'u yoma awuadu'du-wualeran pa liernohora O lirmu-tunmu maka Mueti oleka wa.

⁹⁵ La'a riy yatyata-halala re rwahak talan pa rwenn a'u. Mere lera-lera nekpa awuarora-wualai niohora O nie'ermu-tniatarmu.

⁹⁶ A'g e umkeka de la'a ha samomuou nek de edonna naplol samomuou mua'ta, mere enekneka O nie'ermu-tniatarmu nmemeh'a to'a maka naplol toto' meman la.

It ralamni nal nana Itmatromlawanni Makdenrer die, nie'erni-tniatarni

⁹⁷ Matroma, a ralmu nal nana O nie'ermu-tniatarmu, pede la' lera-lera nekpa a'g e wuarora-wualaiya re.

⁹⁸ Nhi'inde a'g e ghoratreri mamainia lir maka ha Mukota re pede agat pua rehi tiargho'ola arwa'lu re.

⁹⁹ La'a a o'tu-kriahlu de e narehi tiargho'ola tungkuru mak kwatutg a'u re honona. Yoma a'g e wuarora-wualai niohor mamainia lira-tun muaka ha Mukot oleka re wa.

¹⁰⁰ A'g e gat pua reh tiargho'a mak moratni rwahr olekwa, yoma a'g e tioran reria lir maka ha Mukottaru re pa aliernohora.

¹⁰¹ A' oliet a lia nhioli-lieta ilu-wniehwa yotyota-yatyata, yoma agiwra utlina-utailla O wniatutmu-wniaye'emu.

¹⁰² A ralmu mana edon nkoili la'a O wniatutmu-wniaye'emu re honona, yoma O' ed maka kwatutu-kwaye' nana hare la mai a'u.

¹⁰³ La'a lira-tun muaka ha Mukota re mi'nani narehi miemna gan tiuru mi'nani.

¹⁰⁴ La'a O nie'ermu-tniatarmu re pede a'g e gat niohora mak kyata-mak khala, ne la' hade pede a oliet a lia nhioli-lieta ilu-wniehwa yotyota-yatyata.

Itmatromlawanni Makdenrer die, nie'erni-tniatarni nodia lelerni mai ita

¹⁰⁵ Lirmu de ed mak kodia wa'du la a la'ku. Me nhi' lelerni la loi talan maka a'u la' lola.

¹⁰⁶ A'g e liokra olekwa, de hota aliernohora lirmu-tunmu maka kaplola-kamneha re, ne hya' ed maka a'ukottarg oleka de, hota aghi' nana.

¹⁰⁷ A'g e lier la kropanni-krieutnu polpuol inni-wakwak amni, Matromee! Mhuoratreria O nnio'omu pa Mutiak reri a'u totpa yana amuat wie!

¹⁰⁸ Matroma! Mriei lilili-mua'mamaga a sniumbainu pa a'u'uli-uwedi O'a, Matroma. Me Mpuatutu-mpuaye' a lia'a O lirmu-tunmu maka ha Mhi' oleka la deulu-tatra la noha wawannu.

¹⁰⁹ La' lera-ler de trema-trema amuati onnila arwa'lu re mere a'g edonna ghoratdoin memna O nie'ermu-tniatarmu.

¹¹⁰ Riy yatyata-halala re e re'er targa tniokla la mai a'u. Mere a'g edonna ula'a sala la'a O nie'ermu-tniatarmu maka klergot lola O nurmu.

¹¹¹ Lira nhiopanmu de ed maka khi'a re'a-tniaru la mai a'u pa nodia liarni me hade ed mak kodia ralma pliorlora la mai a' ihru-a ralmu.

¹¹² Agetli oleka de hota O lirmu-tunmu maka ha Muet olek la re, de a ghu'ru-ghelam la pa nodi la nhoru.

Itmatromlawanni Makdenrer die, nie'erni-tniatarni nodia ihru-ralma mtiertiernu

¹¹³ La'a hya' maka ha Mue'er taru-mtiatar taru re honona de a su'ku matmiat lia re. Mere a ralmu sukni tia'ala riy maka ralamni edonna tetema la O'a.

¹¹⁴ Yoma la' O' nanpena ed maka kodnian a lia'a hya' to'a. Me la'pa emkameni ho'mana O' ed mak kruwun reri a'u. Uhnia'ar to'ola O'a, Matroma onnila hya' ed maka Omukottarg oleka wa.

¹¹⁵ Riy yatyatmi re! Olietmi la mai o'nu, yoma la' a' die agiwra utlina-utail la'a Uplerlawna maka a'ukola tieru-gawur nehla.

¹¹⁶ Mhuoratreria nnio'omu, Matroma, pa Mual a' pua ururi-ulai totpena amuormiori plalahwa. Agha'ara a arnu la O'a, Matrom e! Mumori-mulewan nana a'g e! Yanpa a nhia'arge'nu de nwalia la hamamuamua.

¹¹⁷ Mhueli-mliakia a'u, totpena amuori-liewna ne hota a'g edonna ghortaplinga lira-tun muaka ha Mukota re.

¹¹⁸ Mpuayotlia riy maka kwir ghal la'a hya' maka ha Mukota re! Yoma nhi'inde rnairi pudi-akla pa rna'ohma yatyatni mere hota nwalia la hamamuamua.

¹¹⁹ Matro'mu Nhi' riy yatyata mai nohkeran di pa emolmolan nekama haga'u-hamda'ara maka rhopliala la. Yoma la' maka ha Mhi'a la ira pede yeher to'ama a su'ku liernohora la hya' maka ha Mue'ertaru re honona.

¹²⁰ A ino'nu ndiwra-nda'al la genni onnila O'a. De la'pa a ralma-rio'ru nheik tar lia hya' maka Muetlia la'a rira wawannu re, de umta'ata.

Nhiu'ru-nhielma la Orgahi-Orha'a lirni-tunnu nie'erni-tniatarni

¹²¹ Matromlawnu ne! Nhi'inde a'ukot hadom de a'uplele'era me aghi' hadom de adien nek la plollolli wawannu. Pa awuak de yan Mual a lia'a arwa'lu re limni ralamni pa hota rwatei-rwahapr a'u.

¹²² Matroma, a'g ed maka khima-kre' O'a. Mukot memna la mai a'u, Matroma, hota O' ed mak ktulan la mai a'u. Yan Mual a' pua rimormiori po'ona rtingkai re rtorn a' pua rodi plolli mai a'u.

¹²³ Matrome! A'umatar nande a ma'tu klih-kliair nohora a wnie'yu la O'a. Mowen nianpena Omtiulan la mai a'u totpa amuori-liewna? Awuei miemn O'a totpena O' ed mak kolin doin memna a lia, yoma O' e mniel tiarga de.

¹²⁴ Mhi' a'u, mak khima-kre'a O'a, de nornor meman la O sniayanmu mak kodi liarni, me Mpuatutga a lia'a hya' maka ha Mukot oleka re wa.

¹²⁵ Matroma, mak khima-kre'a O'a, a' di, Mhi' a' pua a o'tu naphyar lia O wniatutmu-wniaye'emu. Totpena la'a hya' maka ha Mukota re de agatga re.

¹²⁶ Matromlawnu ne! Nte' olek la lerni-melli pa Mukmua riy maka edonna ra'unni-ramta'ata O'a. O lirmu-tunmu maka ha Mue'er taru-mtiatar taru re edonna rhe'du nan memna.

¹²⁷ La' O nie'ermu-tniatarmu re honona de a su'ku matmiat lia de narehi wiallia lel kgorkora-mah marmara.

¹²⁸ Yoma la' hade pede la a mormio'ru di aliernohora la'a hya' maka ha Mtiut tiaru. A'uhmen memna liola loi-talla koili-kaili.

Wniarora-wnialaiya samomuou totpena rlernohora Itmatromlawanni Makdenrer die, lirni-tunnu deullu-tatarni

¹²⁹ La'a hya' maka ha Mue'er taru-mtiatar taru re honona de samomuou muemna, pede aliernohora de agal tetema a ih'ru ralmu honona.

¹³⁰ La'pa rakot nohora O wniatutmu-wniaye'emu nnia'eratni, de rodia lelerni la rimormiori. De rwahauria la rimormior miaka mak kaplin niohora ma'ta de hota rat wual lia, pa rta'u-rta'g o'tani, yoma rla' nana ir ralma-riorni.

¹³¹ A' arnu hedu-wairia yoma uwlari pia mua uhaka O lirmu-tunmu, Matroma, yoma hade ed maka a ralmu nod rer lia.

¹³² Matroma! Mkillia a' die totpa Mtiutga ralam kalwiedmu la mai a'u, de emekwalima nhi'inde O' e Mtiulla-msiaynia la riy maka ralamni nal nan O'a.

¹³³ Matroma! La' hya' maka ha Muno'taru re, de Mual a' pua ururi-ulai niohora a li'mu-la'ku totpena yana awuehwa sala. Yanpa hota alier la do'a-hala ralamni pede do'a-hala nodi plolli mai a'u.

¹³⁴ Muolin doin a lia'a riy maka ktern apitg a'u re totpena aghu'ru-ghelam la'a hya' maka ha Mue'er taru-mtiatar taru re honona.

¹³⁵ Matroma! Mtiulla-msiayn nan a'u, mak khima-kre' O'a. Me Mpuatutu-mpuaye' a lia'a hya' maka ha Mukottaru.

¹³⁶ A lu'yu ntur die emeknekama gera maka nwau, yoma riy edonna rlernohora O nie'ermu-tniatarmu maka ha Mukot taru re.

Itmatromlawanni Makdenrer die, lirni-tunnu deullu-tatarni re raplola-ramneha

¹³⁷ Matroma! Omdiella plola-mneha wawannu. La'a hya' maka ha Mue'era-mtiatra re, de raplol momuou.

¹³⁸ La' lira-tun muaka ha Mukota re honona raplol momuou pua riy rpesiay meman la.

¹³⁹ La' O nnio'omu-niatmu maka ha Mpuatutu-mpuaye'a re de a' arwa'lu edonna rhe'du nana, la' hade pede a' ih'ru ralmu emeknekama e rhokal targa ai kwiari.

¹⁴⁰ Hya' maka ha Muno' taru honona re, de Omhi' nan memna. La' hade pede a su'ku matmiat lia pa awuatut lia honona re totpena agat niohora.

¹⁴¹ Riy rhoi a lia mak kakleh weli, mere a'g edonna ghortaplinga O wniatutmu-wniaye'emu.

¹⁴² Omdiella plola-mneha wawannu nodia pa nodi liarni, me nie'ermu-tniatarmu mana rden mamain la plola wawannu.

¹⁴³ Kropna-krieutu rler la a wawnu pa apuolpuol i'nu-wuakwak a'mu mere la'a hya' maka ha Mukota re honona rhi' a' pua a ralmu nahepur wenna.

¹⁴⁴ O nie'ermu-tniatarmu re ha raplol momuou, ne hota emkade pa nodi liarni, la' hade pede Matro'mu Nal a' pua agat niohora re, totpena alier la mormiori-dardiari wawannu.

Tsumbain pa twak la Itmatromlawanni Makdenrer die, totpena Namori-nalewan nan ita.

¹⁴⁵ Matroma! Agala a ralma ploi-ple'eru pa apuolu-wuak la O'a. Mpuahla nan a'u Matromee! Ne hota utlina-utailla O'a!

¹⁴⁶ Aghaun la O' de giwra: “Matromee! Mumori-mulewn a'g ee! Yoma a'g e giwra tiorrer pitpitga O nie'ermu-tniatarmu.”

¹⁴⁷ La'pa loka-lak ma'ta de umat pa puolu-wuak la O'a, yoma a'g e gha'ar rer a arnu la O'a Matroma onnila hya' ed maka Mukottarg olekwa.

¹⁴⁸ A'umatar la mela plahwani pa awuarora-wualai nieka O nnio'omu re honona.

¹⁴⁹ Matroma! Mutlina-mutailla a polpuo'lu-wakwa'ku onnila sniayni onni O'a. Ne onnila Muetlia plol toto'a la tatiaili pniarni me watghudi lokarni de Mutiak kalwiedweda a mormio'ru-dardia'ru di.

¹⁵⁰ La'a riy maka khokr a'u re riwra rdamti a wua. Rrehgorgoru oleka pa riwra rhi' yatyatni-halalli mai a'u. Yoma oliet ir la'a O nie'ermu-tniatarmu.

¹⁵¹ Mere O' e Mriehgorgoru Matroma me mak ha Mukota re de raplol momuou.

¹⁵² La' ululu meman pa agat niohora de O nie'ermu-tniatarmu de nodia pa nodi liarni. Agat niohora hota emkade onnila hya' ed maka Mukot targ oleka de.

Rsumbain pa rwaka tniulan la Itmatromlawanni Makdenrer die

¹⁵³ Matroma! Mhueri tlinmu-mpual matmu mai a'u, yoma alier olek la kropanni-krietnu la'pa polpuol ina-wakwak ama. Mumori-mulewn a'g ee! Yoma a'g edonna ghortaplinga O lirmu-tunmu maka ha Mue'er taru-mtiatar taru re honona.

¹⁵⁴ Matroma! Muodnian a lia'a makhudi-kpar yatyata re gaini ralamni, totpena Muolin doin a lia. Mumori-mulewn a'u, Matroma! Yoma Omukot olek hadewa.

¹⁵⁵ La'a riy maka kler la yatyatni-halalli, de hota edonna rler la mormiori-lewlewna, yoma ir edonna ra'unni-ramta'ata ratlina-ratailla hya' maka ha Muet tiar lia.

¹⁵⁶ Plola! O tniulla-sniayanmu inponni, Matroma. Onnila Muetlia plol toto'a la tatiaili-pniarni me watghudi-lokarni (pengadilan) de Mutiak kalwiedweda a mormio'ru-dardia'ru di.

¹⁵⁷ Riy rahu rawok pa rhi' a lia arwalli pa rnahora-rnala' a'u. Mere a'g edonna ula'a sala la'a O lirmu-tunmu mak kwali olek la nie'era-tniatra.

¹⁵⁸ A ralmu namehra la mak ralamni edonna ndenrer lia O'a! Yoma ir edona ratlina-ratailla O wniatutmu-wniaye'emu.

¹⁵⁹ Mumkeka Matroma! A'g e su'ku matmiat lia lira-tun muaka ha Mukota re. Mumori-mulewn a'u, Matroma, yoma O' de sniayni onni O'a!

¹⁶⁰ La'a hya' maka klergot la O nurmu, de ha raplola. La'a nie'ermu-tniatarmu honona de rden la plola wawannu ne hota rnairia hare pa nodi liarni.

It sukni matmiat lia Itmatromlawanni Makdenrer die lirni-tunnu deullu-tatarni pa tlernohor reria

¹⁶¹ La'a riy maka kodi plolli re rhokr a' die rakleha nhiapargeni. Mere mak umta'ata de, O nie'ermu-tniatarmu to'a, pede aliernohor reria.

¹⁶² O nnio'omu ed mak khi' a' pua a ralmu nahepur nohora. Pa emeknekama mak klernana re'a-tniaru pripanni-fa'anni.

¹⁶³ La'pa kdiori-kdieha ohpa-lahara honona re de uhmena-upraiya re. Mere la'pa O lirmu-tunmu mak kwali olek la deulu-tatra re, de a su'ku matmiat lia.

¹⁶⁴ A'g e u'uli-uwedi rer niek O'a Matroma! Yoma aghoratnana O deulu-tatarmu raplola.

¹⁶⁵ Riy mak sukni matmiat lia O nie'ermu-tniatarmu de rden la mtiertierannu. Hota edon rdunit taru pa rhokal gaini.

¹⁶⁶ A'g e wuei tio'a a mormiori-lewlewnu la O'a, Matroma! Hya' ed maka Mukota re honona de aliernohora.

¹⁶⁷ Aghu'ru-ghelam la'a hya' maka ha Mue'era-mtiatar taru re honona, Matroma, yoma a su'ku matmiat lia.

¹⁶⁸ Aliernohora hya' maka ha Mhuopan pa aghi'a re honona, yoma orgahamu Mumkek memna a hihi'u-yapya'pu.

Rsumbain pa rwaka tniulan la

¹⁶⁹ Matroma! Awuak de matmu reprepar la tulu-lyanti, me tlinmu mana Mhuer tiarga la a polpuo'lu. Mual a' pua nia'erit nana la'a hya' maka ha Mukota re, yoma O nnio'omu olek hare wa.

¹⁷⁰ Matroma! Mtiulan pa Mrieiniana-mua'nana a polpuo'lu-wakwa'ku di. Matro'mu nnio'oni de hota aliernana mormiori-lewlewna.

¹⁷¹ A giwra u'uli-uwed reria O'a, Matroma! Yoma O' ed maka kwatutu-kwaye' a' pua gat niohora deulu-tatarmu.

¹⁷² A ralmu sukni la pa giwra wuatunu-wuahniar nohora hya' maka ha Muno'a-munatu re honona. Yoma la' hare honona de rden la plola wawannu.

¹⁷³ Yan Muolin limmu me, Mpue'er rormu la a'u! Yoma a' orgah'u ed mak kwalir niana loi-talan maka ha Mue'era-mtiatar taru re honona pa aliernohora.

¹⁷⁴ A ralmu nwewiei-narnar neka Omumori-mulewn a'u. A su'ku meman la nie'era-tniatarmu re honona.

¹⁷⁵ Matroma! Muyoryori a'u, totpena u'uli-uwed rie'ru. Awuaka pa la'a hya' maka ha Mukot taru re ed maka ktulan la mai a'u, Matroma!

¹⁷⁶ A'g emolmolan nekama pipi-dum mak khal talan pa kmolu ma. La' hade pede Muplet pa Mmuai pia Muhaka a' di, makhima-kre' O'a. Yoma a'g edonna ghoratdoin lira-tun muaka ha Mue'er taru-mtiatar taru re honona.