Nhiara 118 - Alkitab bahasa Luang

Rsumbain pa ra'uli-rawedi Itmatromlawanni Makdenrer die yoma Nal arwalli re la' yawa

¹ Mmiai pia ta'uli-tawedi tsu'ru-tselma tlili-tmamuau Itmatromlawanni Makdenrer die yoma kalwiedni-paitiotni ra'ani-pallu maka Enal oleka la mai ita. Plola Ntulla-nsayn reri ita la' ler di pa nodi liarni.

² Riy Israel hononmi mriarin pa mikot nohora miwra: “Itmatromlawanni sniayanni de hota nodi liarni pa nodi liarni.”

³ La'pa Harun duratni-waitni, de imam-imam hononmi mana, mikot emkade wali, de miwra: “Hota Itmatromlawanni sniayanni nodi liarni pa nodi liarni.”

⁴ La'pa rimormiori mak ka'unni-kamta'ata Itmatromlawanni hononmi ho'mana mriarin pa mikot nohora miwra: “Hota Itmatromlawanni sniayanni nodi liarni pa nodi liarni oo!”

⁵ La'pa alier la kropanni-krieutnu de aghaun la Itmatromlawanni agiwra: “Matrome! Yana Muolin limmu mai a'g e!” Dewade Itmatromlawanni Nwahla nan a li'ru pa Nanawar doinia a lia'a kropna-krieut de.

⁶ Yoma Itmatromlawanni Makdenrer die etla a o'nu de a ih'ru edonna ntepul nan kuku' eti. Hota hya' ed maka rimormiori nohkerna rhi' mai a'u?!

⁷ Itmatromni Nor a' tialan de totpena Ntulan la mai a'u. Hota Enal a' pua umkek memna arwa'lu re honona rla' yawa.

⁸ Samounu de it tsa'ar it inonni la Itmatromlawanni totpa e Nruwun reri ita. Yana tsa'ar it aranni la rimormiori tutulanni-rere'eni.

⁹ Samounu de it tler la Itmatromlawanni limni ralamni. Yana tsa'ar it inonni la'a marna-wuhura mai noh di wawannu.

¹⁰ La'pa arwa'lu mak kwatiawua lodna-hairi re rhapet reria a lia la' malwiru-malganna, ho'mana hota Orgahi-Orha'a plolli-mneheni ed maka khi' a' pua agala arwa'lu rella' yawa.

¹¹ Honona re rlol etnu-liolli pa rmai die rle'lu rer a lia letgara, mere onnila Orgahi-Orha'a plolli-mneheni, la' pede agala arwa'lu honona re la' yawa.

¹² Rler pa rmai die rruwun nan a' die emeknekama gani ruwun nan puonni, mere emkade ho'mana a gala ir la yawa pa emeknekama ai miaka klomar pa ka'an doinia ruwnu-ahla mak karuri-karkiartia. Aghi' emkade onnila Orgahi-Orha'a plolli-mneheni.

¹³ Rler temna a' die trema-trema a lia' yawa, mere Itmatromlawanni Makdenrer die ed mak ktulan la mai a'u.

¹⁴ La Orgahi-Orha'a de, aliernana yaruri-yalai. E' ed mak khi' a pua wuatunu-wuahniar pia u'uli-uwedi E'a, yoma la E' nanpena amuori-liewna.

¹⁵ Mitlin to'ola'a Itmatromlawanni Makdenrer die mutnu-rahanu re, mak kden la'a ohwialli re, honona riarni-riarni yoma rlernana unut lawna la' ar ralma. E' ed mak kala ruri-lai liawna la ira.

¹⁶ Itmatromlawanni plolli-mnehenni ed mak kala unut lawan de. E' orgahani ed mak khi'a-kyapia ruri-lai matmiat liawan de.

¹⁷ Hota a'g edonna mati mia'ta, la hade pede la a mormio'ru di de a'ukotkot reria Itmatromlawanni Makdenrer die hihi'ini-yapyapni.

¹⁸ Mitlina! Orgahi-Orha'a ed mak Nukmua a'u, mere edonna Nal a lia matmiati ralamni.

¹⁹ Mhiari dioinia Itmatromlawanni roma kreini nhiarni totpena a lia u'uli-uwedi E'a.

²⁰ Itmatromlawanni romni nhiar liawanni inhatti. Rimormiorni rlola pa rler meman la E gaini ralamni! Nhiari die naphyar lia'a riy maka ihranu ralamni kaploi-kaple'era.

²¹ A'g e u'uli-uwed rer O'a Matroma! Yoma a polpuo'lu-wakwa'ku re de Ompuahla nan momuoga re. Mual a' pua aliernan unut lawna la ar ralma.

²² Wat muaka tukna edonna rnair nana pa rhi'a roma-lewu, mere rhopliala, de Uplerlawna Nnairi oleka pa Nhi'a la watu liar pianulu.

²³ Hadi ed mak Itmatromlawanni Nhi'a. Adoh ha samounu nee!

²⁴ Plola! La' ler di de Itmatromlawanni Makdenrer die, Nhi' nan yamori-yalewan lawna mai ita. Hononmi mmiai pia tamuki-tahepur nohora.

²⁵ Matroma! Am mpak de O' orgahamu ma Mumori-mulewan nan ami, ne Matroma, Mual am pia mlernana unut lawna.

²⁶ Ampaka Uplerlawna pa Nara'a-napalga riy mak kmai pia kodia Orgahi-Orha'a nanni. La'a Itmatromni romni ralamni de ampak pa Nala ra'ani-pallu tiy miy mak kmai ri.

²⁷ Itmatromni de Uplerlawna inhatte. Entulla-nsayn reria ita. Pede mlier pa mlia' de mtiorreria ortawi-autiawia motmota, nanpena mpiania la' heyanan pa mriarni-mriarin nohora, ne hononmi mlie'lu reria Itmatromlawanni katri'anni.

²⁸ Matroma! A' Uplerlawnu O'a, pede amuai pia a'uli-uwedi O'a Matroma! A' Uplerlawnu O'a Matroma! Aghu'ru-ghelma lilili-muamuaga O nanmu la'a tutulmu-lolo'omu.

²⁹ Mmiai pia ta'uli-tawedi tsu'ru-tselma tlili-tmamuau Itmatromlawanni Makdenrer die yoma kalwiedni-paitiotni maka Enal oleka la mai ita. Plola Ntulla-nsayn reri ita la' ler di pa nodi liarni.