Nhiara 116 - Alkitab bahasa Luang

Nlewan la matmiati ralamni

¹ A ralmu napal niana Itmatromlawanni Makdenrer die, me u'uli-uwedi lilili-mamuau E'a! Yoma apuol olek la E' pa giwra: “Matrome! Mtiulan-msiayn nan a'g eee!” Noma la' a polpuo'lu-wakwa'ku de Nwahla nana.

² Yoma la'pa apuol lia de, Nheri tlinni mai a'u, pede hota la a mormio'ru mai nohkeran di de hota la' E' nampena ed mak apuolpuolu-wuakwak rer lia.

³ Alier olek la yatlorni-yatra'ani maka khi' a' pua trema-trema amuati pa emekanekama i'n maka kler tar lia dari.

⁴ Pede a nu'ru ema rwe'era pa apuol lia giwra: “Matromlawnu ne! Yan Muolin limmu mai a'g e!”

⁵ Plola! Itmatromlawanni Makdenrer die Nden rer lia plola-mneha wawannu. Uplerlawna maka itkola tieru-tawur nehla de Entut rer nieka E ralam kalwiedni me sniayanni mai ita onnila E' de sniayni onni E'a.

⁶ Entera-ndem reria riy mak kakleha ruri-lai. La' ler maka tah'i lola a tieru de Enamori-nalewan nan a'u. Ukleha ruri-lai wia dewade Nhedga a lia gera tlinni-ai aratni.

⁷ Aghi'a a ih'ru ralmu pa nawtentenna yoma la Itmatromlawanni kalwiedni de mai a'u.

⁸ Yoma Itmatromlawanni ed mak kamori-kalewna a lia'a matmiati ralamni. E Nhi' olek a pua yana a ralmu nmawal doinia. Ntulla-nsayni a' pua a'g edon lier la tutiuini-dadiayi.

⁹ La' hade pede la a mormio'ru-dardia'ru mai nohkeran di de hota aliernohor reri Itmatromlawanni ralma-riorni.

¹⁰ La' ler maka alier la polpuol ina-wakwak ama de giwra: “Ine! alier olek la kropna-krieutu yatlorni-yatra'ani!” A li'ru-tu'nu emkade ho'mana apuesiay toto'ola Itmatromlawanni.

¹¹ Mere la' ler de a'g edonna puesiaya rimormior nohkerna wawannu yoma rsuksukni pudi-akla ohpa-lahara.

¹² Hota agala hya'a ga wuahla Itmatromlawanni kalwiedni mai a'u?

¹³ Hota aghi' emkadi: agodia lokrahi turnu pa gala la Itmatromlawanni totpena a'u'uli-uwedi E' nanni onnila hihi'ini-yapyapni mai a'u.

¹⁴ Hya'a maka uno' targa olek la E'a, de hota a'g edonna ghoratdoinia. De nhiurliwtu-wnialodwa maka uno' taru de agala la E' la Krei mutnu-rahanu gaini ralamni.

¹⁵ La'pa Itmatromlawanni rimormiorni rler la matmiati ralamni de, Ensayn wen ira ne ralamni nmawal doin la.

¹⁶ Matroma! O limmu-lakmu a'u. Akola tieru-gawur nehla la O'a emekwalia a i'nu la' ler ululu de. O' ed maka kolin doinia a lia la'a wutwutu-kokuohu ralamni.

¹⁷ Hota agodia nhiurliwtu-wnialodaw la O'a totpena asiumbain pa u'uli-uwedi O'a.

¹⁸ Pede hya' maka a'g e uno'targ oleka la tiy O' de, hota agala, la'a gen miaka rimormiormu rkola tieru-rawur nehla tiy O'a.

¹⁹ De hota aghi' emkade la'a Yerusalema letni letgara-mnenehenni, la'a O rommu-kreimu herni-gaini. Mmiai pia ta'uli-tawedi Itmatromlawanni Makdenrer die! Haleluya!