Nhiara 115 - Alkitab bahasa Luang

Orgahi-Orha'a mak kden la tutullu-lolo'oni nampena ed mak klernana ya'uli-yawedi

¹ Matromlawnu ne! La' O' nanpena ed maka ha ra'uli-rawedia yoma hya' to' maka Omukottaru oleka de, Omhi' nana. O' edon Mhuoratdoinia rimormiormu mere Msiayn reria re pa nodi liarni. La' am di de, riy hadamonan la mak emek O'a.

² La'a hya'a nrei piede riy mak kwatiawua noha-rai re ratian la'a-maiya ita riwra: “Uplerlawna maka mkiola tieru-miawur nehla de, etla meni? Nihya' pede edon Ntutga plolli-mneheni?”

³ Mere it Uplerlawanni de etla Ilyamou-Watyatoha. Nden la hande pa Nhi'a-nyapia hya'a maka orgahi ha Nwaror nana.

⁴ Mere riy mak kwatiawua noha-rai mak edon kpesiaya re, rhi' nan neka uplerni-upmatni la maha nora maha wawahra. Mere uplerni-upmatni re, rimormiori nohkerna wawannu limni enni to'a de.

⁵ Nhioini-tnianni re e rodi nurnu, mere edonna raltieri. Matni mana er wal lia mere edonna ramkek nana hadomdoma.

⁶ Rnairia tlinni mere edonna ratlin nana hadomdoma, rodi wal lia irannu mere edonna ra'irun nana ha kuku'a.

⁷ Rnair wal lia limni-lakni mere edonna rwaho'a-rwahai, me edonna ralola-rala'a. Rakleha lira-wawa mak klergot lola tier rokrokni.

⁸ Hota emkade walia la riy maka kakoki-kayapia uplera-upmati re. De riy maka kpesiaya uplera-upmati re hota rakleha ruri-lai me ta'enniana rhi' hadomdoma emekwalima ir uplerni-upmatni.

⁹ Mere riy Israel hononmi mmiai pia mhia'ara aranmi la Itmatromlawanni Makdenrer die, yoma Nla' keliaumi-halwa'anmi. E' ed maka khimpai-kmanat miy.

¹⁰ La' Harun duratni-waitni mak kla' imam-imam, miy hononmi mana, mhia'ar inonmi la Orgahi-Orha'a yoma E' ed maka kodniana me ktulan nan miy.

¹¹ La'pa miy hononmi mak kola tieru-kawur nehla la Itmatromlawanni mhia'ar reri aranmi la Itmatromlawanni onnila E' ed maka katiak reri me khimpai-kmanat miy.

¹² Itmatromlawanni Makdenrer die, Nhoratrer ita, ne hota E' ed mak kara'a-kapalga ita. Hota E' ed maka kara'a-kapalga Harun duratni-waitni mak kla' imam-imam la'pa riy Israel honona re.

¹³ La'pa he' to' ed maka rkola tieru-rawur nehla E'a, de kuku'uni-lalawanni honona, de hota Enala ra'ani-pallu la.

¹⁴ Twakwak de Itmatromlawanni pena Ntera-ndema miora duratmi-waitmi pa yeher to' pa ra'ititar rer lia liawanni.

¹⁵ Hota mliernana pripanni-fa'anni la'a Orgahi-Orha'a mak kakoki-kayap niana lyanti nora nohmaran di.

¹⁶ Lyanit lawan de E gahani to'a de. Mere nohkeran di de, E' ed maka kala la rimormiori.

¹⁷ Riy mak kmati olekwa ta'enniana ra'uli-rawedia Orgahi-Orha'a. Maka kernu olek la'a matmiati geni re, rakleha lira wawa pa emkameni owa'an pa ra'uli-rawedia rhu'ru-rhelma E'a?

¹⁸ Mere la' pa mak kmormiori it nampena er mak ka'uli-kawedia khu'ru-khelma klilili-kmamuawua E'a nwaga la ler di pa nodi liarni! Mmiai pia ta'uli-tawedi Itmatromlawanni Makdenrer die! Haleluya!