Nhiara 112 - Alkitab bahasa Luang

Riy kalwieda rler la pripanni-fa'anni

¹ Mmiai pia ta'uli-tawedi Itmatromlawanni Makdenrer die! Haleluya! Ya'unut lawna edonna nwalar la'a riy maka katu ka'unni-kamta'at pa klernohor reria Itmatromlawanni lirni-tunnu.

² Hota upni-a'nani rodi plolli la'a noha-rai maka ha rholi-rlet la re. Riy mak kden la plol wawannu duratni-waitni re hota rlernana kalwiedwedni la'a Itmatromlawanni.

³ Hota romni mniotni rler la re'a-tniaru. Nhiolli-lietni mana ndella plol wawannu pa nodi liarni.

⁴ Hihi'ini-yapyapni mak kaploi-kaple'era re de emeknekama hya' ed maka khi'a repreparni la melmelli-kalkalamni ralamni la'a riy honona mak ktulla-ksaynia e rimormior wialli me mak kwehwa-klakat la ploini-ple'erni.

⁵ Ya'unut lawna la'a riy maka ralamni kalwieda, maka kalla riy ra'otna, me na'olu-nala'a la rira de ihranu ralamni naploi-naple'era.

⁶ La'a riy mak klernohora Itmatromlawanni deullu-tatarni lirni-tunnu de yala'ani edonna ndunti ne riy rhoratreria e' pa nodi liarni.

⁷ Edonna namta'ata lir mak kmai die hota nodia susa. Ihranu ralamni edonna nwo'la, yoma pesiayni narur lia Itmatromlawanni Makdenrer die.

⁸ Nhi'inde ihranu ralamni edonna nmakokan nohora yamta'ata. Hota e' arwalli rla' yawa.

⁹ Nhi'inde nwahakra hyonni-hyanni la'a riy mak kakleha-kaplara. Nhiolli kalwieda la'a he'a-he' to'a. Pede hota e nodi plolli me riy rhormata-rkanala de.

¹⁰ La'pa riy yatyata ramkeka de hankerna nden rer lia riy yatyata re ihranu ralamni, ne rut gakarni la de gaini rpetan wenna. Mere hota rler la yatyatni-halalli yatlorni-yatra'ani. Ne hya' maka ir rwahaka re de rwalia la hamamuamua.