Nhiara 111 - Alkitab bahasa Luang

Mmiai pia ta'uli-tawedi Itmatromlawanni!

¹ Matromlawnu ne! Makdenreri O'a! Agala a ihru ralmu tetema pa a'u'uli-uwedi O'a mai woka-le'u muaka O rimormiormu e rhopun tar di.

² Plola la O hihi'imu-yapyapmu mak kamehi-kayona, pa nhi'nande riy rahu mak sukni ramkeka re me rahaka kirkira-ralma rior la.

³ Matromlawnu ne! O hihi'imu-yapyapmu mak kamehi-kayona re de rmemeh'a ragengen lia genni me nodi ya'uli-yawedi la O'a. Omtiut rer nieka kalwiedni-paitiotni la rimormiori pa nodi liarni.

⁴ Itmatromni Makdenrer die, sniayni ononni inhatte. Enhi'a-nyapia tulanni-kniarni re de riy rta'u-rta'g o'tani ne hota rhoratreria.

⁵ Enwahi' targa ya'ana-yemnu la riy maka klernohora E'a, me Nhoratreria hya' maka Enakottaru.

⁶ Ntutg oleka E plolli-mneheni rurni-laini la E rimormiorni la' ler maka Nal oleka lodna-hairi re nohoni-raini la'a ira.

⁷ Itmatromlawanni hihi'ini-yapyapni rden rer lia plol wawannu. E' edonna Naheri-nawalia lirni la'a hya' maka ha Nakot oleka wa. Deullu-tatarni honona re naplol memna pede it edon tamta'at pa tlernohor reria.

⁸ Riorni-liaini deullu-tatarni er maka ha rnairia pa tuwu-tuwu. Itmatromlawanni Nhi'a-nyapi la plol wawannu pa Nala deullu-tatarni re.

⁹ E' ed maka Nwe'er doinia E rimormiorni me Nora re rhi'a nnielu-niau mak kodia pa tuwu-tuwu pa nodi liarni. E' ed maka rwet nanni la Orgahi-Orha'a Uplerlawna mak kmou-kwitna me mak kaliwna la hitni-lomarni maka hadom edonna nparan pia nwakriania.

¹⁰ La' hameni niwra nwalia la riy makatu de, de na'unni-namta'ata Itmatromlawanni Makdenrer die. E' ed maka kala lira-yatu o'ta-kriahlu la' he' maka katlina-katailla E lirni-tunnu. Ya'uli-yawedi nden rer lia E' pa nodi liarni.