Nhiara 11 - Alkitab bahasa Luang

Itmatromlawanni Makdenrer die, ed maka kruwun reri E rimormiorni

¹ Hadi de Daud kieheni-nhiarni mak ha rala la mak khi' o'tani la mak kwatunu-kwahniara: A'uyaheu lia Itmatromlawanni Makdenrer die, nayanni. A'g edonna utlin la lira-tun mak kakot mai a' pua uwlar lia wo'ora hananni totpena ulewna ino'nu, pa emolmolla onu-ma'nu mak knema-ktai.

² Rakot emkade, yoma riy yatyata e nrei tiarga ra'pani talli, pa niwra nolin doinia ra'p'ihini nlol melli-kalamni pa ntaiya riy mak kakleha do'a-hala.

³ La'pa lima-rora honona edon rlernohor owa'ana hairi deullu-tatarni mere rkokokna-rrariarin nek wa, de hota riy mak kaplola re rhi' hya'a totpa mormiorni-dardiarni ramtemn owa'ana?

⁴ Itmatromlawanni etla genni-tienni mak kmou-kwitna. La'a E liwan genni la Ilyamou-Watyatoha de Enodi plolli. Matni e nreprepar la'a rimormiori nohkeran di, pa E Nat niohora ir hihi'ini-yapyapni re honona.

⁵ Itmatromlawanni Nta'aga riy samomuou me riy yatyata. E ralamni namehra la riy maka suksukni ramat mera-rawul kaulu.

⁶ Riy yatyata-halala re hota Uplerlawna Nala ir nhiakarni. Hota rlernana ai kwiari mak kpanpahna ma'ta, ai liali nor anin lawna mak kamutni-kaki'ira.

⁷ Yoma Itmatromlawanni Nden rer lia plola wawannu, pa Nhudi-npara lol talanni. Riy mak kaploi-kaple'era hota ramkek nan memna E' gaini me rlernan E ralam kalwiedni.