Nhiara 109 - Alkitab bahasa Luang

Rsumbain la susa ralamni

¹ Hadi de Daud nhiar ya'ulli-yawedni maka ha rala la mak khi' o'tani la mak kwatunu-kwahniara: Uplerlawnu mak u'uli-uwed reri! Yana Mhuerer niohor a'u.

² Yoma riy yatyata mak kpudi-akla e rler pa rmai wia pa rwahaur nohora pudi-akla pa rtot a lia yatyatni.

³ Rler temna a' die de rapolu-raliella, mere rhi' emkade de rakleha nhiakilgeni (nhiapargeni).

⁴ Rto'on rer a'u mere ukleh do'a-hal la ira. Ir edonna rhoratnana a nhiol kalwie'du la' ira, ne la' walia nhi'inde a'g e siumbain reria re.

⁵ Rala yatyatni ra rwahla a kalwie'du, me rala gai pietanni ra rwahla a samo'wu.

⁶ Ndella pa riy yatyata ida netlia riy maka kto'on reri a'u di lirni-tunnu. Me ndella pa arwalli nto'on reri e'a.

⁷ Totpena retlia e halli de riwra e nhala, ne Muolin doinia pa la'pa nsumbain totpa nhi' aplola inonni la Uplerlawna gaini ralamni mere plollolli de orgahani ntutga do'oni-halli la rira.

⁸ Muolin doinia pa mormiorni mana yan naplahwa la noh di wawannu totpena riy dom to' ramtatan la genni-tienni.

^9-10 Ndella pa upni-a'nani re ra'a'na riy-rapatyat pa rmeh'a rawakwaka, yoma patke'eni napal wua. Upni-a'nani re rwal lia mak kmeh'a kalala' pa rwahaka ya'ana-yemannu yoma likit waumueheni re de riy rweyat olekwa.

¹¹ Muolin doinia re pa hyonni-hyanni re riy rwarui-rwate'la la otna-arni. Emkade pede prehenni-maunu re rwal lia hamamuamua.

¹² Yan mememna la riy id mana nsaynia onde npolga a'nani re pa ralla' ra'ana.

¹³ Emkade totpena duratni-waitni re rmolu-rhelam momuou totpena kotni-nanni mana tuwli'iru-a'na ga'a re rhoratdoin meman la.

¹⁴ Ndella pa upni-tgarni yatni-halli re de Itmatromlawanni ed maka khoratreria. Me inni nhiolli-lietni mak kler la do'a-hala de Orgahi-Orha'a edonna Nhapua la'a puka ralamni.

¹⁵ Emkadella totpena ir do'oni-halli re de Orgahi-Orha'a edonna Namou-nawitna, ne hota mak kden la nohkerna wawannu de rhoratdoin ir nanni.

¹⁶ Yoma la' riy' de de edonna nhoratnan etia sniayanni oke'ela rimormior wialli. Nhiolli-lietni de sukni namuki-nama'ala riy kleleha-larlara, me nwunu-nwenna riy maka kakleha mhuakru.

¹⁷ Ne sukni nlokra-nhautu. Muollia pa orgahi nlernana liokra-nhiautnu. Nhi'inde edonna nwak Uplerlawna pa Nara'a-napalu rira. Muollia pa rira edonna rwak walia Uplerlawna pa Nara'a-napalu e'a.

¹⁸ Hihi'a-yapyapia lera-lera de nlokra-nhautu. Nhiolli-lietni mak emkade, de emekwalima pola-raini la inonni mak e nnairi la' ler di, me repar demade nnair owa'ana. Rolin doinia totpena liokra-nhiautnu de nape'era-napahia inonni tetema me emekwalima wu'ru mak kwahi'da la rurni-kliakallu re honona.

¹⁹ La' emkade totpena liokra-nhiautnu de nhi'a la nhiekarnu, ne totpena naniewan la inonni pa emeknekama rewa la nehlani.

²⁰ Matroma! Muala niukum della'a riy maka kto'on rer a'u, de la'a he' maka kapolu-kaliel kwohor weyata-ktatra weyat a'u.

²¹ Mere Matroma! Mhuoratreria nnio'omu pa Mtiulan la mai a'u. Matromlawnu ne! Makdenreri O'a! Mumori-mulewn a'u yoma la'a O kalwiedmu nora O sniayanmu mak kden pa nodi liarni.

²² Yoma ukleha-uplar wa, mak la' ta'eni-mai ta'eni a'u. Pa a ralmu emeknekama ha knioki-tnia'wa.

²³ Trema-trema amuol wua, de emekneka memnu-tatra maka it tamkeka la lera lia'ani mere edon nalo'on wali ne nmol meman wa. A' die emeknekama kongoha id maka e rkakan doinia la.

²⁴ A to'ru rdiwra-rda'ala yoma utahan lara me ino'nu npo'ora-npait doin la wa.

²⁵ Riy rahu mak kamkek a'u re honona rdikdik o'tani me rapolu-raliel a'u.

²⁶ Matromlawnu ne! Makdenreri O'a! O' ed mak kla a Uplerlawnu! O' de sniayni onni O'a pa awuaka tniulan la O'a, Matrome! Mtiulan nan a'g e! Totpena alier la mormiori-lewlewna.

²⁷ Totpena a' arwa'lu re honona ratga de O hihi'mu-yapyapmu de ed maka ha ramkek nan meman de.

²⁸ La'pa ir rlokra-rhautu a'g ho'mana edonna nla' hadoma, hornama O' ed maka kala kalwieda la mai a'u. Mere la'pa ir rler pa rmai pia rnahora-rnala'a a'u ho'mana Muollia pa ramola-rama'a ira. Mere Mhi' a'u, hopopanmu a' di pa lier la yamuki-yahepru.

²⁹ Muollia pa totpena la'pa he' ed maka ktutu a lia lira-tunu de hota rler la molmola-mama'a. Pa mola-ma' de nruwun rer nieka la pa emeknekama nhiekru id la' ira.

³⁰ Mere agiwra u'uli-uwedi reri Itmatromlawanni Makdenreri de, de aghaun wah'a noh di. Totpena riy honona la' woka-le'u muaka e rkola tieru-rawur nehla la E' de rat momuoga.

³¹ Yoma O' ed maka kodniana me kamori-kalewna riy maka kakleha-kaplara mak kla' ta'eni-kmai ta'eni la'a riy maka rira riwra rukum penna re.