Nhiara 107 - Alkitab bahasa Luang

Ya'uli-yawedi la Itmatromlawanni kalwiedni-paitiotni

¹ Ta'uli-tawedi Itmatromlawanni Makdenrer die onnila hihi'ini-yapyapni mak kodia kalwieda-paitiota me E sniayanni mak kden pa nodi liarni.

² Yoma Itmatromlawanni Namori-nalewan nan miy lia arwalmi mak knahora-knala' miy. La' hade pede miprir pia mikot nohor la'a hya' maka E Nhi'a-nyapia la miy rerieimi.

³ Enawoka-nale'u nian oleka miy lia'a hairi-hairi mak kden la tipru warta-ra'i tranna.

⁴ De la' hande de rlernana miy dom de rden la la'a wo'or letna-kawur loini. Pede raplin niohora talla mak hota kodi ir la leta-ruhuna mak hota rhollia.

⁵ Rakleha ya'ana-yemnu pa nhi'nande ralma-riora plinu-plo'a narehi nian oleka ir ralma-riora plollolli.

⁶ Mere ralma-riorni kuku' de nheik la Itmatromlawanni Makdenrer die, pede rhaun la E'a dewade Enamori-nalewn ir wa. (Ir de emeknekama i'na-ya'an maka meti ha nkeran nana mere meti nre'wa dewade rlekur tar lia yo'ora ralamni pa hoka lewr owa'ana).

⁷ Dewade ir Matromni Nodia ir pa rlola talla plele'era pa rodi liarni la let marna-ruhun marna ralamni dewade rhol lia hande.

⁸ Mmiai pia mi'uli-miwedia Itmatromlawanni Makdenrer die onnila sniayanni mak kodi liarni me hihi'ini-yapyapni mak khi'a noheri woru la lyanti nayanni di pa rwer rer wiawni ne rta'u-rtag o'tani.

⁹ Yoma E' ed maka kala ger pa miy miemnu, me Nhi'a miy mak kakleha-kaplara re pa mlier la pripanni-fa'anni.

¹⁰ Me la'pa mak ha rtoran nana de, de rawniutu-rakniohu la gen miaka melmela-kalkalma.

¹¹ Hade emkade yoma ir rwatikli-rwahya'al olek la Uplerlawna Makdella Tutullu-Lolo'oni de. Yoma ir edonna ratlina-ratailla pede orgahi rler tar lia sniusa ralamni.

¹² Uplerlawna Nolin doini ir pa ir arwalli rnahora-rnala' ir la kniar werwerta pede rakleha nhia'argeni me riy edonna rma rtulan la' ira.

¹³ La'pa rler la polpuol ina-wakwak ama dewade rhaun la ir Matromlawanni, dewade Nolin doinia ir la'a kropna-krieutu maka rlernana re.

¹⁴ Nodia ir pa rlergot la melmelli-kalkalamni na'nama Nwuhi' etietia wutwutu-kokuohu rella' limni-lakni re.

¹⁵ Mmiai pia mi'uli-miwedia Itmatromlawanni Makdenrer die, onnila sniayanni mak kodi liarni me hihi'ini-yapyapni mak khi'a noheri woru la lyanti nayanni di pa rwer rer wiawni ne rta'u-rtag o'tani.

¹⁶ Yoma Itmatromlawanni Nlunni-nwerna pinta-puohra lalawna maka ha rhi'a la pi'ra tnieri (tembaga) ror wutga nhio'lani mnotan lalawna re na'nama Nalgota mak kahnio'la re.

¹⁷ La'pa rlernan dom de ratlin oleka Uplerlawna lirni mere rtotpa raplinu-raplo' nohora, pede rler la hihi'ini-yapyapni yatyatni-halalli re wniahlani, de radodo'or nohora mehrani-maunu la'pa rnun lia'a-rnun miaiya, yoma la do'oni-halli re.

¹⁸ Rkillia ya'ana-yemnu de, ralamni yota-yata, yoma aranni ed olek la irannu tutnu pa riwra rmati wia.

¹⁹ Mere plinu-plinnianama rhaun pa riwra: “Matromlawnu ne! Mtiulla-msiayn nan ami e!” Dewade Itmatromlawanni Makdenrer die Namori-nalewan nan ira,

²⁰ de Enhar tio'a lirni dewade nnieni-nhien maka klu'ut apitga ira re onnila do'oni-halli re de, plinu-plinnianama emeka nmol wua. Me Nahal doinia ir la'a hoi-kietra hu'ulli.

²¹ Mmiai pia mi'uli-miwedia Itmatromlawanni Makdenrer die onnila sniayanni mak kodi liarni me hihi'ini-yapyapni mak khi'a noheri woru la lyanti nayanni di pa rwer rer wiawni ne rta'u-rtag o'tani.

²² Riy mak kler la hare honona re mmiai pia miodi nhiurliwtu-wnialodaw la Itmatromlawanni roma kreini totpa mi'uli-miwedia E'a onnila hya' ed maka ha Nhi' nana, ne totpena mpiahniar pa mihepur nohora E hihi'ini-yapyapni la'a miy rerieini.

²³ La'pa mak khopal pa kahaka tiernu-apannu,

²⁴ nek de ramkek walia Itmatromlawanni Makdenrer die hihi'ini-yapyapni mak khi' riy mak klol lora pa rwer rer wiawni ne rta'u-rtag o'tani.

²⁵ De Itmatromlawanni ed mak khopan pa anin lawna ntet gernia lol lor de name'eta.

²⁶ Yo'ora-anni nwakloli-nwaklalia kapil lalawna re pa nhi'nande riy ramta'ata pa rakleha nhiorat la temni yoma rwakloli-rwaklali lola yo'ora-anni ralamni.

²⁷ Riy honona re gaini rmokal nande orloi-orta'ara la kapli wawannu, ne rakleha nhiorta plollol la' temni.

²⁸ La'pa rwakloli-rwaklal lia kapli wawannu de ranin to'ola la motni wawannu, noka rhaun pa rpol lia Itmatromlawanni, dewade E' ed maka ktulan la ir pa Nahal doinia ir la yo'ora-anni re.

²⁹ Pede la'a me'eta-anin matmiati-molmuol die, nleretniekla tah'i wawannu nalina-nalera, yoma natlin la Itmatromlawanni lirni.

³⁰ Honona re ralamni rahepru yoma kakmoran lawan de nmol wua, ne Itmatromlawanni Nodia kapil de pa nler la pnialgen miaka ha rahniar niana.

³¹ Mmiai pia mi'uli-miwedia Itmatromlawanni Makdenreri de onnila sniayanni mak kodi liarni me hihi'ini-yapyapni mak khi'a noheri woru la lyanti nayanni di pa rwer rer wiawni ne rta'u-rtag o'tani.

³² La gen miaka Uplerlawna rimormiorni rawoka-rale'elia de, de mikot nohora Orgahi-Orha'a hihi'ini-yapyapni mak ksamomuou muemna re, ne la'a o'ta-mata gaini ralamni mana mi'uli-miwedia Orgahi-Orha'a Uplerlawna-Mempulwatnu.

³³ Ne la'a ger lalawna mak wawau mana rleretniekla rwal lia wo'or kerna, me la'a ger ormata mak kopli-kha'a mana rwair la matni pa rwal lia tani kieran maka kpoklihira-kpoknai.

³⁴ Ne la'a nohanna-taniarat maka kpoti-kaduw nohora yawulli-yatniamanni ho'mana Orgahi-Orha'a Nhi'a la ge'eta, yoma riy yatyata-halala rhol lia re.

³⁵ Mere la'a wo'or mak kerkerna ho' de Itmatromlawanni Nhi' targho'a pa rwal lia gera tliwu genni. Ne tani kierna re genni ho' de ger ormata ropli-ropli.

³⁶ Uplerlawna Nodia riy mak kakleha-kaplara pa rma rdeh'a nana geni re, pa tamkek owa'an de nwali olek la leta id wa pa honona rhollia.

³⁷ La' let de walli-walli, pa nawlar lia wo'or de lo, de rahni'a-ratlunni awrieha (padi) pa rru'u-rtowar nohora wo'oni, me tamkek la walli malwiru-malganan de lokrahi (anggur) onni re rpoti-rkadwu, ne akni re ema rwerat watwatia nohora wo'oni. La' hade pede mak khollia hande rler la pripanni-fa'anni.

³⁸ Itmatromlawanni Nala re pa rayori-radari niana upa-a'na liawanni, me la'a ira nhiurni-wnia'anni mana rleretniekla rpeha.

³⁹ La' ler dom de, ral ir la yawa pa nhi'nande riy doma rmeh'a targ ira, yoma rdeh'a reria la klieratni.

⁴⁰ Orgahi-Orha'a Nhi'a ira o'ta-matni re pa rmola-rma'a, me Nhi' pa rwakdiordiori to'ola genni plior lalawna, mere raplin niohora loi talla.

⁴¹ Mere la'pa riy mak kakleha-kaplara de Itmatromlawanni Nolin doin ir la'a yatyatni-halalli me Nala ir pa rlernana tiernu-apannu. Ra'upa-ra'a'na de rpeha-rlawan pa emeknekama pipi-dum maka kpeha-klawna.

⁴² La'pa riy mak kden la plola wawannu re ramkeka hare honona de hota ralamni rahepru pa ra'uli-rawed reria Orgahi-Orha'a, mere riy yatyata-halala re nurnu rakniukmu.

⁴³ Riy maka ka'o'ta-kakriahlu re hota rwarora-rwalaiya hare honona, Mpiaror samomuou lia Itmatromlawanni Makdenrer die sniayanni mak kodi liarni.