Nhiara 106 - Alkitab bahasa Luang

Itmatromlawanni kalwiedni la E rimormiorni

¹ Ya'uli-yawedi la Imatromlawanni! Mmiai pia ta'uli-tawedi tsu'ru-tselma E' Makdenreri yoma ralam kalwiedni mai ita. Sniayanni de nodia pa nodi liarni.

² Hya' maka E Nhi' nana la E mutnu-rahanu re de narehi-nalawan memna! Tnairia hya' lira pa twahaur nohora E sniayanni totpa Nlernana ya'uli-yawedi mak kaplol meman la genni?

³ La'pa he' ed maka katlina-katailla E'a me nhi' hadom de ploi-ple'era de hota nler nek la unut lawna.

⁴ Matroma, la'pa Mtiutga O kalwiedmu la O rimormiormu ri de yana Mhuoratdoinia a lio oo, me la'pa Omumori-mulewna ira, de a' walio oo!

⁵ Totpena a hononami maka Mpualir nian oleka ri mler owa'an la kalwiedni-paitiotni pripanni-fa'anni, pa agor rewre'wa ir pa amamuki-mahepru.

⁶ Am di de mlernohora up mamni-tgar mamni pa mler oleka do'a-hala. Am mhi' oleka yatyatni-halalli pa mpoklira-mpah'a waw la O'a.

⁷ La' ler maka up mamni-tgar mamni rdella Mesir de rtotpa raplinu-raplo' nohora tniulla-kniari mak kamehi-kayona maka Mhi' nana re. Ir edonna rhoratnana O tniulanmu-sniayanmu maka lawan rehi la' ira. La' lera rrehgorga Laut Gelagah, de ira rpoklira-rpah'a waw la O' makden la tutullu-lolo'oni.

⁸ La' emkade ho'mana Mumori-mulewan nana re, totpena nan kalwiedmu namtemtemna me riy rat niohora memna rurmu-laimu.

⁹ La'a O plolmu pa Mhuopna Laut Gelagah pa nkerna-nhau, pede Muodia rimormiormu pa rala' lola gera wikni la' letgara mneneha, de emeknekama e rler la tan kierna wawannu.

¹⁰ Emkade pede Muolin doinia ir la'a arwalli limni ralamni.

¹¹ La' noma ger lawna npupun nan momuoga ir arwalli, de nlumu-ntelan nan momuoga re.

¹² La' hade pede O rimormiormu rpesiaya nnio'omu pa rwatunu-rwahniar pa ra'uli-rawedia O'a.

¹³ Mere edon nalo'on wali ne rhortaplinga O hihi'imu-yapyapmu. Rwatikil la O gaimu ralamni pa edonna ratota-rawaw eti O'a, edonna rahak pa rlernohora O ralma-riormu.

¹⁴ La'pa rte'ela wo'or kerna-rai mtatanni dewade ralamni re rwakwak nekpa ra'ana ya'ana-yemnu maka ha rara'ana la' Mesir la' ler ululu. Yoma riwra rta'aga O'a.

¹⁵ Ne ya'ana-yemnu maka ha rwaka de, Omuala la ira, mere Mual walia nnien liawna nma ntai tiemna re.

¹⁶ La' ler maka rdella wo'or kerna-rai mtatanni de ralamni ramehra la Musa nora Harun pa gaini rpetan rer lia, la' emkameni ho'mana ir rora de O tniutmu-nhianmu nhieli-liarmu, me Harun nek de makla' imam mak khima-kre' O'a.

¹⁷ Dewade nohmarna nwer wawni pa nlumu-ntella Datan, me tani namdiar gerun pa npupun nwenna Abiram nora yawokni-yale'enu re.

¹⁸ Ai mana nmatliair erun pa nram kerkerna riy mak klernohor reri e'a re pede riy yatyatni-halalli honona re rmat miomuou wua.

¹⁹ Ne la'a wo'or Sinai demade rtu'tu-rlewur targho'a leli-maha pa rhi'a la sapi a'na totpena rhu'ru-rhelam la uplera-upmat die.

²⁰ Rala hayori-orpau (sapi) maka nhi'inde ka'ana wewna pa rna'ih'la la uplera-upmati, na'nama rkola tieru-rawur nehla la pa ra rherun doinia O' mak kla' ir Uplerlawanni-Mempulwatnu mak kmeh'a kden tar lia hititni-repreparni ralamni de.

²¹ Rhoratdoin memna O'a maka kamori-kalewna ira la' Mesir. Rhortaplinga O hihi'imu-yapyapmu maka rimormiori edonna rhi' tar lia mai nohkerna wawannu.

²² Plola! La'a Mesir me Laut Gelagah de Omhi' hihi'a-yapyapi mak kamehi-kayona.

²³ O ralma-riormu de Miwra mpunu-mpuenna O rimormiormu ri yoma rhu'ru-rhelam la uplera-upmati, mere Musa nodnian ir la O gaimu ralamni. Musa maka Ompualir nian de ed maka klol lir letgar la O'a pede ralammu namdiaru.

²⁴ Dewade la'awa hohoni noma ir rwayotil targho'a gen miaka samomuou die. Yoma ir edonna rpesiaya O nnio'omu maka Omukottarga hota Mtiera-mdiem ir la hande.

²⁵ Honona re rahankeran nande rlu'uta-retra reranni oratni, ne rahmen etia ratlina-ratailla O lirmu.

²⁶ Dewade Omliokar pa hota Mpuenan nan momuoga ir honona la'a wo'or kerna wawannu

²⁷ ne hota Mhuopliala upni-a'nani re la'a hairi-hairi dom to'a pa ranie'era-rahniakar la' hande.

²⁸ Ne la' wo'or Peor de honona rhu'ru-rhelam la Baal, me ra'ana-remnia uplera-upmati ya'ana-yemannu korni.

²⁹ Nhiolli-lietni re rhi'a O ralammu pa namehra, pede nnieni-nhien lawna ntai tiemna re de rmattiti'ir nohora.

³⁰ Mere Penehas naprir pia nukmua mak khala, dewade nnien liawan de nmol wua.

³¹ Onnila Penahas hihi'ini-yapyapni pede nwal lia riy mak kden la plol wawannu la'a Uplerlawna yamkekni, pa hota edonna rhortaplinga pa rhi'a la tui ida.

³² La gera tnipu mak kden la Mariba, de ir rhi'a O pa ralammu namehra, nhi'nande orgahamu Mukmua Musa.

³³ Yoma la'a ira nhiolli-lietni re pede Musa nawen nande naltier lia ir de naplin niohora ha nakotkota.

³⁴ Omhuopna riy Israel re pa rwenna rimormiori la hairi-hairi mak kden hande, mak khi'a-kyap nieka dodo'a-halala yatyatni-halalli, mere riy Israel re rahmena rlernohora O lirmu.

³⁵ Pa rora riy yatyata-halala re rhol wiutu, nhi'nande rlernohor neka hairi-hairi maka kaplin niohor ma'ta O kotmu-nanmu de hihi'ini-yapyapni.

³⁶ Dewade rhu'ru-rhelam la mak kden hande uplera-upmatni pede narieiniande rtuin la do'a-hala ralamni.

³⁷ Riy Israel upni-a'nani re nekane rodia pa emeknekama hoihoi-tantiani pa rala la hegana-kawnu yatni-rha'ani mak ha rpesiay re, de uplera-upmatia Kana'an.

³⁸ Makden Israel re rwunu-rwenna riy mak edonna khala, de ir upni-a'na wamueheni pa rala la makden Kana'an uplerni-upmatni, pede rhi'a noh de pa nwalia la gen maka kdeha-ktiahli olekwa.

³⁹ La'a hihi'ini-yapyapni re pede ir rler olek la rimormior miaka Omuakriarnia (najis). Ir edon rdenrer (setia) olek la O wa pede emolmolan nekama pat maka kalira-kaliai olekwa pa edon ndenrer lia muanke'eni.

⁴⁰ Dewade orgahamu Mtio'on reria yawenanmu la ir wa. Me Mumkek la O rimormiormu de Miwra Mumota.

^41-42 Noma Muala ir la'a hairi-hairi dom to' pa rodi plolli la ira, ne Muolin doinia ir pa arwalli re rnahora-rnala'a ira la'pa arwalli re rwatei-rwahapar kalwiedweda ira.

⁴³ Mere O' de nhi'inde Muod nian mamainia rimormiormu re pa Mumori-mulewna ira mere emkade ho'mana ir orgahani ratlinnon keran la O'a pa narieiniande orgahani rler owa'an la do'a-hala ralamni pede rlernana yatyatni-halalli yatlorni-yatra'ani.

⁴⁴ Mere Omutail rer lia ir polpuollu-wakwakni, pede la'pa rler la kropanni-krieutnu dewade Omtiulan la re.

⁴⁵ Yoma la' ir rerieini pede O' edonna Mhuoratdoinia nnio'omu, ne Msiaynia ira yoma la' O' de sniayni onni O'a.

⁴⁶ Omhi' ir pa arwalli maka ktoran nan ir ho'mana rtulan la ira.

⁴⁷ Matromlawnu ne! A Uplerlawan mamni O'a! Makdenreri O'a! Mtiulan pa Mulewan nan ami! Ami e manie'era-mahniakar la hairi-hairi lo'mani ralamni mere hota Muwoka-mule'g ami totpena a ralam mamni nahepuepru pa ma'uli-mawedi mhu'ru-mhelma O nanmu la'a tutulmu-lolo'omu. Nanmu de nden la mounu-wahrani yoma O' de mak kakleha do'a-hala.

⁴⁸ Ya'uli-yawedi nden rer lia O'a, de riy Israel Uplerlawanni. Ma'uli-mawedia mhu'ru-mhelma O'a la dodo'ondi pa nodia la tuwu-tuwu pa nodi liarni. Mmiai pia it hononita makdella noh di wawannu takota “Plola (Amin)”. Ya'uli-yawedi la'a Itmatromlawanni, Makdenrer die. Haleluya!