Nhiara 105 - Alkitab bahasa Luang

Ra'uli-rawedia Itmatromlawanni Makdenrer die, yoma hihi'ini-yapyapni la rimormiorni tuwu la' tuwu

¹ Ta'uli-tawedi Itmatromlawanni Makdenrer die, me takot nohora E preheni-mkaini plolli-mneheni. Twahaur nohora hihi'ini-yapyapni la'a hairi-hairi nor wutga noha-rai piatatra mai noha wawannu.

² Tloi-tsek nohora ita ya'ulli-yawedni la' Itmatromlawanni me twahniar de takot nohora E limni enni mak kamehi-kayona.

³ E' de Itmatromlawanni mak kden la momuounu-witwitanni, pa tahepur nohora. La'pa hononmi mak nhi'inde mmiai pia mkiola tieru-miawur nehla la E'a, de mmiai pia tamuki-tahepur nohora.

⁴ Lera-lera nekpa mmiai pia tkola tieru-tawur nehla la E'a. Mmiai pia twaka ruri-lai la.

^5-6 Miy miak kla' Abrahama, mak khima-kre'a Itmatromlawanni, me upni Yakopa de duratni-waitni miy. Miy er maka Itmatromlawanni Nwalir niana oleka. Mmiai pia mhioratreria Itmatromlawanni hihi'ini-yapyapni mak kamehi-kayona, me yana mhiortaplinga la'a niukum maka ha Nala re la arwalmi re wawannu.

⁷ Orgahi-Orha'a de it Uplerlawanni inhatte, ne la'a hya' maka ha Net tiaru de lir de nwewar momuou lia' nohkeran di wawannu.

⁸ La'a hya' maka ha Nano'taru re, de id mana edonna Nhoratdoinia la. Mak Ha Nano'taru re de hota edonna rherun doin oke' et pia nodi liarni.

⁹ Ne hadi de, Itmatromlawanni nnio'oni maka Enakottarga la Abraham nhoru nioma Nakottarg owa'an la Isaka.

¹⁰ Dewade Nkohlim owa'ana Yakopa totpena Nhi'a nnio'a id la'a hairi Israel pa nodi liarni.

¹¹ De lirni Niwra: “Noha-rai Kana'ana hota A gala la' miy, totpena mhiapar rer lia iktan mierni me mihlor rer lia hlor wewnihini. (mhi'a la' gah wamuehemi).”

¹² La' ululu ma'ta de Itmatromlawanni rimormiorni emeknekama do'ona-dakna la Kana'ana. La' ler de ir mutnu edonna rpeh ma'ta.

¹³ La'pa rlaun la geni ida demade rahulti-rahamar la'a geni dom to'a. Rwatiaga noha-rai id pa rma rahniu'ru la noha-rai ida.

¹⁴ Mere Itmatromlawanni edonna Nolin doin riy id pa nma nnahora-nnala'a ira, mere Nhoktemna ray-ray miaka kteran nihini la ira

¹⁵ totpena yana rtota E rimormiorni maka Enwalir nian oleka wa la klieratni. Yana rhi' yatyatni la E rimormiorni mak kodi E lirni.

¹⁶ Orgahi-Orha'a Nala lehka-lar lawna pa ntuin tar lia noha-rai Kana'an de, ne Na' momuou lia ya'ana-yemun maka rdudan taru re.

¹⁷ Mere Enhopan pa riy ida nala'ulga ir pa nla'awa Mesir, de Yusup maka amni-hyalli ra'olga pa nwal lia ata-wa'ara.

¹⁸ Wutwutu-kokuohu lol limni-lakni me ranti mnotna na niohol lia tiernu.

¹⁹ La' Mesir nampena Yusup nakwiet nana mi'a-lo'a maka ray Mesir nmi' nana re nnia'eratni. Ne plol toto'a pa hya' maka Yusup nakwiet nana de ntutu-nte'ewa. Hota la talan emkade pede hya' maka Itmatromlawanni Makdenrer die, Nakot targa de, ntutga de Yusup ndella plola wawannu.

²⁰ Dewade ray Mesir mak kodi plolli la luwu-a'na riwnu-rahanu ed maka kolin doinia e la'a roma nhio'la ralamni.

²¹ Na'nama ray nala pa nodi plolli la ray istanni. La'pa re'a-tniaru re me Mesir nohoni-raini honona de, e' ed maka ktorna-ka' momuoga.

²² Ntutmuata-nkewra' e' pa nwatutga okarni la ray tniutnu-nhianni nhielli-liarni me nhi' o'tani la nih tutiuini-mort hammamra re honona totpa ntutga talan la' ira.

²³ Noma amni Yakopa mak ha rwet wal lia Israel nmai pia nden nek la Mesir, de Ham duratni-waitni genni, pa nado'ona-nadakna la hande.

²⁴ Noma Itmatromlawanni Nhi'a rimormiorni pa npeha-nlawna, hade pede rurni-laini nrehi targho'ola ornoha.

²⁵ Nhor diewade Itmatromlawanni Nawiru-nawal lia riy Mesir ihranu ralamni pa rahankeran rer lia E rimormiorni mak khu'ru-khelam la E'a, ne rputra-rpalka re.

²⁶ Dewade Enhopan doinia Musa mak kodia E lirni, me Harun maka Enwalir niana.

²⁷ Pa rhi'a hihi'a-yapyapi mak kamehi-kayona pa riy Mesir, de Ham duratni-waitni re, ramkek nana, yoma Itmatromlawanni ed maka khopna re.

²⁸ Mere rahmena ratlina-ratailla Itmatromlawanni lirni-tunnu maka Musa nora Harun rakot nohora re. Pede Orgahi-Orha'a Nala mel'uta-maliena pa na nkaduw nana noh Mesir.

²⁹ Nhi'a pa gerlawna Mesir rwal lia rar mermera, nhi'nande i'na-ya'ana no'a gerlawan de rmat pia rpohra-rgehpa.

³⁰ Ne la'a kakhargera ho' de raniutni-ramdieran lola etnu-liolli pa nodi liarni la ray romni ralamni.

³¹ Itmatromlawanni Nhopan pa laran mota nora mi'na potpota rma rtawrurnhiala noh Mesir uhunu-ewatni-lahwani.

³² Nhopan pa otna es ema rhuriernia, de emeknekama otan lawna nturu. Ne hita-tlena nor neka layera rwadawar malwiru-malganna.

³³ Au kar lalawna nor wut nieka lokrahi ona Nweyata-nwaniaga. Ora-au re honona tutnu-akni pala patia la pa rtuin la tani wawannu.

³⁴ Noma Itmatromlawanni Nhopan kongoha niutni riwnu-halli pa riw niana pa rnem pa rmai die makden Mesira takeni rho'a-rhai niana la irannu-matni.

³⁵ Kongoha re rwarehi-rwatal niohora yawrotanni la yawuli-yatniamin no'a Mesir pa rawrotan kerkerna ora-au, la'pa wewan mota-wewan kerna la'pa ortawi-au tiawi oke' to' mana edonna nayamkek la noha wawannu.

³⁶ Nhor nia'nama riy Mesir a'na muan yanullu, de a'nani maka ha rlililia re, honona de Orgahi-Orha'a Nwunu-nwenan momuoga, de edonna nkatet etia riy ida.

³⁷ Dewade Itmatromlawanni orgahani Nodgiota riy Israel re de rlola kalwieda-paitiota. Rla'awa de rodi re'a-tniaru leli-maha honona maka rlernana la' Mesir.

³⁸ Mak kden la Mesir la' ornoha re rler la yamta'at lawna onnila ira, pede honona re sukni wal pia riy Israel plet pa rwaran lakni la Mesir.

³⁹ Itmatromlawanni Neh'a targa kakam lawna pa na npupun nana rimormiorni re. Me Nal ai pa nalera riy Israel rella' melmela.

⁴⁰ La'pa rwak pa ra'ana noma Itmatromlawanni Nala ma'nu hamra (puyuh) pa ra'ana me roti mak kwatiaga Ilyamou-Watyatoha pa rpeher nohora.

⁴¹ La' wa'ura wat muetma mana ema rweta pa gera nwau lia tan kierna wawannu.

⁴² Yoma Itmatromlawanni Nhoratreria E nnio'oni la'a E mutnu Abrahama, mak klernohor reria E lirni.

⁴³ La' hade pede Nodgiota mutnu re de ralamni re rahepuepur nohora. De maka Ha Nwalir niana re rlergot la Mesir de rwahniara pa riarni-riarin nohora yamukni-yaheparnu.

⁴⁴ La'pa hairi-hairi re nohananni-taniaratni mana, Nhakra la' luwu-a'na Israel termida wehrani woru re pa rlernan momuoga ror wut nieka yawulli-yatniamni mak kden la arwalli re nhyi'ini ralamni.

⁴⁵ Totpena Itmatromlawanni mutnu-rahanu re ratlina-ratailla deulu-tatra maka E Ne'er targ oleka wa. Ya'uli-yawedi la'a Itmatromlawanni, Makdenrer die. Haleluya!