Nhiara 104 - Alkitab bahasa Luang

Ta'uli-tawedia Orgahi-Orha'a Makakoki-kayapi hya'a-hya'a honona

¹ Agiwra u'uli-uwedi Itmatromlawanni Makdenrer die, yoma naplola pa hade lol talanni. O inponmu Uplerlawnu ne! Omumrehi-mumda'ar nohora liplipni-kamka'mani mak kamehi-kayona pa emeknekama naniairi maka Mniairia.

² Hitita-reprepra nwowna'nu. Mhi'a lyanti la krahanmu yaritni.

³ Me Muriria rommu la lol darta wawannu, ne Mhi'a kakam wlarliari la keretmu pa anni nodi O'a la meni-meni to'a.

⁴ Omhuopan doin anni mak kteni me ai mak kmori totpa e rhima-rre'a O emeknekama O hopopanmu-lili'irmu.

⁵ O' ed mak kwatatga nohmaran di la watu liar pianullu pa hota edonna nwo'la-nwaini.

⁶ Na'nama Muala gera pa npen niana noha, ne narehi dioini wo'or tutullu re honona.

⁷ La'pa Mkamota, de ger de nwau dioin la de nodi meranni yoma O' lirmu nkukru-ngauru.

⁸ Ger wawuau nwau liola wo'or tutulu re rletni pa nerun la elaw lalawna pa nla' gen miaka Mpualir nian oleka de.

⁹ Omhuo' targ oleka ger wawuau ha nlolola totpena yana naton targ owa'ana noha wawannu.

¹⁰ Omhi'a ger ormata re pa emeka nopli-nopli nohora wniaunu la'a elwa-elwa ralamni pa ger wawuau klihira re wawuau liola wo'ora re letgarni.

¹¹ Ne la'pa hamormiori mak kpora-kdawra remun la'a ger de. Emkade wal lia kuda-laidiarna mak kpora mana remun pa rpeher wali.

¹² Onu-ma'nu mak knema-mak ktai mana rma rhi'a puonni la rehgorgorga ger wawuau klihira re, pa kokokna-rariarni polpuolu-kakakria la ortawi-autiawi re ralamni.

¹³ Ne Omhuria otna pa ntur lia wo'ora-kawru re wawannu totpena nohkerna-rai miaran di npenpuen lia yawulli-yatniamni.

¹⁴ Omuala wewna pa rmor lia noha wawannu totpena hayori-orpau re ra'ana-remnia. Me yawulli-yatniamni de rimormiori ra'ala pa ra'ana-remnia.

¹⁵ Noma ra'ihi-rawo'a pa rhi'a ha niemni'ara, de lokrahi turnu mak khi' ir ralamni pa rahepru me wu'ru maka rawu'ru-ralena pa rhi' samou gaini, la'pa ya'ana-yemnu mak kala ruri-lai.

¹⁶ Me Itmatromlawanni orni-aunu rlernana otna liawanni, de agar on maka orgahani ha Ntamin nana la Libanon.

¹⁷ La ora-au re hananni onu-ma'nu rma rhi'a puonni la. Me ma'nu rohge'eta mana puonni er wal lia agari hananni.

¹⁸ La'a wo'or tutulu re de pip diawra rhollia. Me ohpora-ahdiawra rdella hu'ula-liena ko'oni-ka'ani.

¹⁹ Omhi'a wolla totpena ed maka ktutga me'eta-anni rlardoin la, me lera mana nat niohora hota mowen nianpena entuinia.

²⁰ La'pa Omulernia lera totpena lelera nwalia melmela. Ne ha mormiori mak kpora-kdawra re honona rla'a-rmai pa rwahaka ya'anni.

²¹ Ohpora-ahdiawra trapriapi re rmat lia yapolu pa rwahaka ya'anni. Yoma hare honona Uplerlawna Nhi' targa olek hare wa.

²² La'pa lera matni npah'a dewade honona ranewar wa nanpena raro'wa la gen miaka rade'a pa rwuw tiar lia.

²³ Noma la' rimormiori mana rlergot pa rtulla-rkar pia nodia pa lera ntuinia.

²⁴ Matroma, Makdenreri O'a! O tulanmu-kniarmu harahu rehia. Mhi' honona re de Mliernohora O kirkira-ralma rior samomuoumu. Nohkerna-rai miaran di de npenpuen lia ha mormiori mak Omukoki-muyap niana re.

²⁵ Tamkek la' lor de i'na-ya'ana kuku'uni-lalawanni nawnieran doin pa takeni trekan nana.

²⁶ La' hande loi-puou kapli nhopal pa rla'a-rmai, ne niy liawan lora maka ha rweta la Lewiatan ed walia, maka Omhi' nana de totpa nahe'i-nahepur la hande.

²⁷ La hare honona de e rawniair to'ola O'a totpena rlernana ya'anni-yemannu, edonna npahal la lelera onde melmela.

²⁸ O' ed mak kala ya'ana-yemun la, nanpena irawoka-rale'ega yamanan de. O' ed mak khi' targa, ne irwei pia ra'ana pa rpeher memna.

²⁹ Mere la'pa Omhoitio'or la, de hota iramta'at wenna. La'pa Omua'ala ir aranni, de hota ir rwal lia eni-tani owa'ana.

³⁰ Mere hota noha wawannu npenpuen owa'an la ir upni-a'nani. Yoma Omual arna la ira pede rmori-rdari.

³¹ Twakwak de Itmatromlawanni Makdenrer die, preheni-mkaini maka limni nhi' nana de nden nek la pa nodi liarni. Ne twak wal die Itmatromlawanni Nahepur nohora orgahani kokni-yapni.

³² La'pa Orgahi-Orha'a Namkek la noha wawannu dewade noha ndiwdiwra, la'pa Nheikla wo'ora tutulu re, dewade ai miokla nopli-nha' pa nlergota.

³³ Agiwra wuahniar nohora Itmatromlawanni Makdenrer die la a mormio'ru di plahwani. Wuahniar nohora Uplerlawnu de u'uli-uwed reria la' lera-mela maka a mormior mia'ta di.

³⁴ Awuakwak de maka wuahniara re totpa uhepuepur nohora Itmatromlawanni de hota nla' nana E ralamni ne rhi' ralamni pa Nahepur reri.

³⁵ Mere Mhuo'or doin mak khi' do'a-hala re la noh di wawannu. Awuak pa riy yatyata-halala, Mkuoh dioinia-mhuo'or doinia. Mere la'pa a die, agiwra gala a ihru ralmu tetema pa u'uli-uwedia lilili-mamuau Orgahi-Orha'a, Makdenrer die, la tutullu-lolo'oni! Haleluya!