Nhiara 103 - Alkitab bahasa Luang

Itmatromlawanni Makdenrer die, sniayanni mai ita

¹ Ray Daud kieheni-nhiarni: Agiwra u'uli-uwedi Itmatromlawanni Makdenrer die, yoma naplola pa hade lol talanni. Agiwra gal a ihru-ralmu tetema pa u'uli-uwedia a Matromlawnu nan lululi de!

² Agiwra u'uli-uwedi Itmatromlawanni, yoma naplola pa hade lol talanni. Yana aghoratdoinia E kalwiedwedni.

³ Yoma E' ed maka Namou-nawitna do'u-ha'lu honona. E' ed maka khi' kalwieda a nnie'nu-nhie'nu honona.

⁴ E edonna Nolin doinia a' arnu pa nler la hoi-kietra ralamni ne Nal a' pua aliernana E tniulla-sniayanni pa nodi liarni.

⁵ E' ed mak khi' a pua lier meman la kalwiedwedni la a mormio'ru-dardia'ru ralamni, pede a ru'ru-la'yu nla' owa'an la genni emolmolan nekama riy mak tuwarwiar mia'ta. A ru'ru-la'yu de emeknekama ma'nu rajawali.

⁶ Itmatromlawanni Nodniana la'a riy honona mak kler tar lia klieratni yoma riy rtern ira, yoma Enden nek la plol wawannu.

⁷ E' ed mak kakot nohora E ralma-riorni la Musa me Ntutga hya' ed maka ha Nhi' nana re, la'a riy Israel.

⁸ Itmatromlawanni Makdenrer die, ed maka ktulla-ksayni. E' de edonna Nwahla pletleta rira do'oni-halli. Mere sniayanni liawanni memna yoma sniayni onni E'a.

⁹ Itmatromlawanni edonna Nkamota-nkama'ar pa nodi liarni me edonna Nawenan pa nodi liarni.

¹⁰ E edonna Nukmu it de emekwalima hya' maka itsi'a pa nhal olekwa. Nwahla it do'oni-halli, de weratni edon emeka hya' ed maka itsi' oleka re.

¹¹ Mere la'pa emkameni la lyanti oliet meman la noha wawannu, de emkade walia la'a E sniayanni lawanni memna la hameni mak ka'unni-kamta'ata katlina-katailla E'a.

¹² La'pa emkameni la tipru oliet mieman la warta, de emkade wal lia Itmatromlawanni Nwa'al molga it do'oni-halli la olietlet memna.

¹³ Emkameni la ama ida ntulla-nsaynia upni-a'nani de emkade walia Itmatromlawanni Ntulla-nsaynia la'a riy maka ka'unni-kamta'ata khu'ru-khelma E'a.

¹⁴ Yoma Itmatromni Natga de Enhi' nana it di de twatiaga tan miakmu.

¹⁵ Rimormiori mormiorni hoho'a pa emeknekama wewna. Enpeha-nlawan de emeknekama hadeut mak kden la nhyi' ralma.

¹⁶ Mere anni nten dioinia de dewade ha molga ne la genni maka ntuin tar lia ho'mana itaplin niohora.

¹⁷ Mere la'pa mak ka'unni-kamta'ata katlina-katailla Itmatromlawanni, Makdenrer die, de Itmatromlawanni Ntulan reri-nsayn reri ira. La'a ir duratni-waitni ho'mana Ntutga ralam kalwiedni la, tuwu la' tuwu.

¹⁸ Enhi' emkade la he' ed maka ktorreria E nnio'oni, me mak klernohora E nie'era-tniatarni.

¹⁹ Itmatromlawanni Nodi plolli la Ilyamou-Watyatoha, me E' nekpa Ray la'a haneknek wawannu.

²⁰ Orgahi-Orha'a hopopanni-lili'irnu mak karuri-kalai! Miy er maka mitlina-mitailla hya'a maka Enakotkota. Mia mi'uli-miwedi E'a.

²¹ De E hopopanni-lili'irnu riwnu-halli mak kwatiawua Ilyamou-Watyatoha pa klernohora E ralma-riorni de, hononmi mia mi'uli-miwed reri Orgahi-Orha'a.

²² Mior wutga hya'-hya' to'owa maka ha Nakoki-nayap niana, mak kden la meni-meni to' pa Enodi plolli la, miy hononmi mia mi'uli-miwedi reri Orgahi-Orha'a. Agiwra u'uli-uwedi Itmatromlawanni Makdenrer die, yoma naplola pa hade lol talanni.