Nhiara 102 - Alkitab bahasa Luang

Sniumbaini la'a rler la sniusa

¹ La'a maka kler la sniusa ralamni pa npolpuol inni-nwakwak amni pa nakleh oleka ruri-lai wia dewade npol lia Itmatromlawanni Makdenrer die, niwra:

² Matrome! Muheri tlinmu-mutatar matmu la'a a wakwa'ku di! Aghaun tiy O' de Mtiulan la mai a'u Matroma!

³ Alier la polpuol inni-wakwak amni de yana Muolin limmu-mpue'er rormu mai a'u! Mhueri tlinmu-mpual miatmu pa pleta-plet pa Mpuahla nan a'u.

⁴ Yoma a mormio'ru di emekneka ai miokal maka kekeneka klar doin la wa. Te'mu nhi'a pa emeknekama a ru'ru-kliaklu rwal lia ai kwiari mak kharn a'u.

⁵ A' di de ukleha ruri-lai emeknekama wewan keran mak kerna-khau me a'uhmena u'una-gemnu.

⁶ Apuolpuol i'nu-wuakwak a'mu nande tre' ma'ta to'a ulti ntoman ruri la a te'mu.

⁷ A'g emeknekama ma'nu mak kdella gen miaka riy hadamonan la onde la' let maka riy rweyata-rwaniawu oleka wa.

⁸ Lelera-melmel de yanin onna-yamat onna. A'g emeknekama ma'nu prowta maka nmemeh'a tar lia likti id wawannu.

⁹ Lelera-melmel nek mana arwa'lu re rapolu-raliella a'u. Mak ralamni sukni tiala mai a'u, de rlokra-rhautia rira de rweta a na'nu.

¹⁰ Lera-lera nekpa aken reri awu la a o'tu wawannu totpena atiutg a ralma mayo'u. Apuolu-kiakur nande a lu'yu-nuhru nawniah'a wutga la' a niemnu.

¹¹ Yoma la'a O yawenanmu ralamni de Omuhankeran pa Mpualiakra a lia walli.

¹² A mormio'ru de emeknekama memnu-tatra mak ktuin nohora lera, ne upliau pua emeknekama wewna.

¹³ Mere Matroma Makdenreri O'a. O' ed maka khi' Ray mak kodi liarni pa, tuwu nhernu tuwu mana, edonna rhoratdoinia O' inponmu.

¹⁴ Matroma! Ntutg olek la lerni-melli pa hota Omumat pa Mtiutga tniulanmu-sniayanmu la leta Sion.

¹⁵ Yoma O rimormiormu mak khima-kre'a O'a sukni ir let wamueheni Sion de. La'pa rira rweyata-rwaniaga ir letni nhi'nande nwal nieka la watu-watu nor wutga enni-tanni to'a, mere emkade ho'mana, rsayn ma'ta letni genni.

¹⁶ Itmatromni Nodi plolli nhi'nande riy mak kwatiawua noha-rai honona ra'unni-ramta'at wenna, ne la walia ray-ray honona mana, ihranu ntepul wenna la'a Itmatromni preheni-mkaini.

¹⁷ Yoma hota Itmatromlawanni Makdenrer die, Nariri owa'ana leta Sion la genni. Emkade hota ramkek nana E rurni-laini plolli-mneheni.

¹⁸ Ne hota Natlin la rimormiori mak kakleha-kaplara sniumbaini. Ir wakwakni re de edonna Nwayotlia.

¹⁹ Mmiai pia tsorat tar momuoga Matromlawanni Makdenreri de, hihi'ini-yapyapni la Puka totpena rimormior miak ktawli'iru de ratga, totpena rimormior miak edon rmor mia'ta la dodo'ondi mana, hota ra'uli-rawed reria E'a.

²⁰ Yoma Itmatromlawanni Makdenrer die Ndella tutullu-lolo'oni la'a Ilyamou-Watyatoha pa Nta'wa matni la nohkerna wawannu.

²¹ Me Nta'wa tlinni la mak kden la roma nhio'la ralamni re polpuollu-wakwakni. Nolin doinia riy mak klernana niukum matmiati.

²² Nhi'nande Itmatromlawanni nanni mana rwahaur nohora la' Sion, de ra'uli-rawedia E'a la Yerusalem,

²³ la' ler maka makden la lodna-hairi, noh pa'etu-rai piatatra rawowioin pa rla rkola tieru-rawur nehla la Itmatromlawanni la hande.

²⁴ Mere Itmatromlawanni Nhi' a pua ukleha ruri-lai lia a ino'nu la'a ler maka a tuwarwiar mia't a'u, ne la a mormio'ru plahwani la nohkerna wawannu mana, Nhi' akpuria.

²⁵ Dewade a'ukot la giwra: “Uplerlawnu ne! Yana mliehga a arnu yoma a mormio'ru edon nla ma'ta mto'oni-pe'eni. Matroma, tuwu nerun la tuwu mere Omdien ma'ta la.”

²⁶ La'a ululu memna, la' noha gergera-tatiah'i ma'ta de O' ed mak kakoki-kayapia noh maran di me O orgahamu ed maka khi' nana lyanti.

²⁷ Hota hare honona re rmol wua, emeka raini mak yatyat olek wa, mere O' di de Omdiella genmu. Nohkerna-rai miaran di hota Omhi'a pa rmolu wa emeknekama rain maka edon rnairi owa'ana. Honona re hota Mhuoplial momuoga. Na'nama O ed mak kala warwuarnu ma Mhuerun doinia.

²⁸ Mere O' edonna Mhuerun doinia oke' eti. Me O mormiormu edonna la ntutu-la nte'ewa mere nodia pa la nodi liarni.

²⁹ Ne la'a am die mak khima-kre' O'a, de hota a' up mamni-a'na mamni rmori-rdar lia mtiertierannu. Hota rden la mtemtemanni la O limmu ralamni.