Nhiara 101 - Alkitab bahasa Luang

Ray nnio'oni la Itmatromlawanni Makdenrer die

¹ Ray Daud nhiar ya'ulli-yawedni: Agiwra wuahniara pa ukot nohora sniayni mak kodi liarni me hihi'a-yapyapi mak kdella plol wawannu. Matrome, O' ed Makdenreri O'a! Mutlina a nhiar ya'uli-yawe'du di.

² Agiwra umkek nohora a mormio'ru totpena yana aghi'a do'a-hala hya' to'a. Hota la' ler meni nampena Omuai pia itrewre'wa la' gen ida? Ukleha do'a-hala la a ihru-ralmu. La' a knia'ru ralamni me la a ro'mu nayanni nek de emkade wali.

³ Yata-hala de uhmena-upraiya. Yatyata-halala de a'g edonna gho'ola kotni-ghai lia memannu (A'g edonna ghi' nana do'a-hala). Net niana-npat niana la riy mak khoitio'or doini Matromlawnu talanni de a'uhal doinia hare honona.

⁴ A'uhmen memna pa agor riy mak ralamni rkoili mawok wutu. Uhmena-upraiya rie' teman la yatyata-halala honona.

⁵ La' riy maka napupu-naheri de hota atiutwua nurnu. La' riy maka katulu-kapetna inonni de a'g uhmena-uhpraiya.

⁶ A ralmu nal memna riy mak klernohor reria hya' mak kaplola. Ir er maka agiwra gora mhol wiutu. Hopopna-lili'iru maka kakleha do'a-hala er maka hota awuak pa rhoi-rtan a lia ro'mu nayanni.

⁷ Ha meni nputra-npalka de aghoiya hi'ku-to'ru pa yana nden wut lia mai a'u. Mak kalahara de hota edonna nor a' tialla.

⁸ La' lera-lera nekpa akuh dioinia-gho'or doinia riy yatyata-halala mai noh di. Riy mak kwehwa yatyata-halala la' let maka Itmatromlawanni ralamni ha Nal de, de hota awuehwa dodioinia la.