Nhiara 10 - Alkitab bahasa Luang

Rsumbain pa rwaka Uplerlawna Nukmua riy mak khi' yatyat la' ira

¹ Matrome! Emeknekama O' e Mude'u mai ami. Matrome! Yan olietmu mai ami e! Mumkek rer nieka alier la susa ralamni!

² Riy yatyata-halala re rodi po'oni pa rteman la riy mak kakleha-kaplara re onni pa rwatei-rwahapra ira. Rolin doinia la, totpena orgahi rmeh'a rler tar lia tototni re ralamni.

³ Orgahi nekpa rpo'ona-rpei yoma rlernana hya' ed maka ha rahakhaka. De riy mak ralamni rapal niana kupna-kai re ralernu-raha'ana Itmatromlawanni nanni me rwanikli-rwayotlia E'a.

⁴ Riy yatyata-halala re edonna rha'wa nana Itmatromlawanni. Yoma la po'oni re pede edonna rwaror nana Uplerlawna Enmormior lia'a lyanti lawna.

⁵ Riy mak kyata-khala, de rler la ga'a la tniulanni-kniarni honona, mere ta'enniana rna'erit nana Itmatromlawanni Makdenrer die, lirni-tunnu deullu-tatarni. Riy yatyata re rahe'i-ramal lia he'-he' to' maka edonna ror ira rkalwiedweda.

⁶ La'a ralma-riorni de riwra hota ir edonna rtut tiar lia'a talla pahakarni, ne hota rala'a plele'era la'pa nodi liarni.

⁷ Nurnu re rpenpuen lia nhiorghala-wniaghala, kdiorni-kdieheni, lir yata-tun yata. Wawni re nalgot neka lira-tunu yatyata-halala onnila sukni tia'ala rira.

^8-9 Rholi wunwunmu la leta-leta totpena rtota rimormiori mak edonna rhala pa rwenna. Yehwani re emekneka ohpora-ahdiawra la ruwnu-ahla ralamni mak kawuwu-kaweiya mak khakamkamu. Rler temna mhuakria riy mak kakleha-kaplara nanpena rwasnunnia la dar miaka kanietra ralamni.

¹⁰ Rru'u-rru' liol pa riwra rte'la la riy mak edonna kwo'la nan inonni, pa rwakloli-rwaklali miemna la' genni.

¹¹ La'a ir wniarorni de Uplerlawna Nhortapling olek ir wa pa hota edonna Nhi' hadom la ira. Hota edon Nlina-nmata ir nhiolli yatyatni re.

¹² Mere Matrome! O' de Makdenreri O'a! Mak kla' a Uplerlawnu O'a! Mhuoratreria riy maka ha rutni-rdahla re, me Mukmua riy yatyata-halala re!

¹³ Hya' ed mak katota-kariei lia riy yatyata-halala re pede edonna rtelan nana-raut nana Uplerlawna, me edonna rwaror nana hota Uplerlawna Nwahla nan ir hihi'ini-yapyapni rena?!

¹⁴ Mere Uplerlawnu ne! Nhi'inde Mlin wah'a-mtiakar wah'a re! O' ed mak klin reri-kmat reria mak kler la susa ralamni pa Mtiulan la ira. Riy mak edonna kwo'la nan inonni de rawniair to'ola O'a. O' nanpena ed mak ktulla-ksaynia a'na riy patyata.

¹⁵ Mtiewarwatia riy yatyata-halala re ror wutga plolli-mneheni. Mukmua re totpena yana rhi' owa'ana yatyata-halala.

¹⁶ Itmatromlawanni Nodi plolli pa emeka Ray pa nodi liarni. La' riy mak kwatiawu hairi-hairi mak edonna katg E'a, de Orgahi-Orha'a Ndi'na-nlo'wa doinia ira totpa yana rden owa'an la E nohoni-raini.

¹⁷ Matroma! Nhi'inde Omhueri tlinmu la maka ha rutni-rdahla re maka ksumbain rer lia O'a, ne Muala ruri-lai lia ira.

¹⁸ A'na riyi patyata ror wut nieka maka ha rutni-rdahla dom to'a, de O' ed maka kaprir lia lir halli-tun halli re totpena yana rira rhi' owa'an ir pa ramta'ata.