Nhiara 1 - Alkitab bahasa Luang

Ya'unut lawna plollolli

¹ Ya'unut lawna la riy mak edonna kwayow nohora nnio'a-niatu yatyata-halala ha rakota, me edonna rlernohora ir nhiolli-lietni illu-wniehwani. Edonna rwatamput lia' riy maka kapolu-kaliella maka Itmatromlawanni ha Nakotkota.

² Mere la'pa mak suksukni klernohor reri Itmatromlawanni Makdenrer die, ha Nakota me, la'pa nwaror nohora la lelera-melmela,

³ de hota la' riy de, la' hya'a-hya' to' de nler la kalwiedni. E' emeknekama ora-au mak kden la gerlawna aratni, mak kawo'ola la' lerni pa edonna napliau tiaru.

⁴ La'pa rwal dioinia de riy yatyata emekwalima ha kowu maka anni nten lia-maiya.

⁵ Riy yatyata re, Itmatromlawanni ed maka kukmua re, me rtaw dioinia la Uplerlawna mutnu.

⁶ Yoma la'a riy mak kden rer lia plol wawannu, de E' ed maka ktera-klahua me katiak reria. Mere riy maka kyata-khala de rlola talan mak kler la yatyatni-halalli yatlorni-yatra'ani.