Dan. 9 - Alkitab bahasa Luang

Daniel nsumbain la Uplerlawna la' e rimormiorni

^1-2 La anni yanullu maka Darius, Ahaswerus riy Media a'nani de nhi' ray lia' Babel, la' ler de a'u Daniel a'g e puaik reria Orgahi-Orha'a lirni la pukni ralamni de wuaror la'a-maiya makwohorulu-ktatrulu (nabi) Yermia, niwra let Yerusalem hota niat la' anin terampwo'itu ralamni.

³ Noma aniairi kadu (raini yaluli-yahona) me kienia awu li'ina la' a o'tu wuwannu la'pa utahan lara totpa tiutga a ralmu mawla onnila agora a rimormior wia'lu do'oni-halli. Emkade pede asiumbain la Uplerlawna a Matromlawnu de agal memna a ralmu.

⁴ A rimormio'ru do'oni-halli de awue'er momuoga la'a Orgahi-Orha'a A Uplerlawnu. Agiwra: “Matromlawnu ne! O inponmu, pa ma'uli-mawedia O'a. Nhi'inde Omhuoratreria O nnio'omu pede Mtiutga sniayanmu pa nodi liarni la riy mak kpol rieri-kwak rer tiy O'a me rlernohor reria O lirmu.

⁵ Ami e matlinnon kerna-ma'o'ta watu pa ami edonna matlina-matailla Omuora riormu-liaimu deulu-tatarmu nhi'nande amhi' oleka dodo'a-halala, yatyatni-halalli.

⁶ Makden Yahudi a hononami edonna matlina-matailla makwohorulu-ktatrulu mak khima-kre' O'a re lirni-tunnu maka ha rakokota la a ray miamni la'a a up mamni-tgar mamni lerni. Makwoho'ulu-ktatrulu lirni re it edon tsa'wu nohora nodia pa dodo'on di.

⁷ Matroma, hya' maka Omhi'a re raplol momuou. Omtiorreria O lirmu-tunmu. Mere am die edonna. Pede la' dodo'ondi de Yahudi ami ammola-mma'a, de makden la letlawna Yerusalem la'pa makden propinsi Yudea me Israel luwnu-a'nani hononami maka Omue'era-mhuakra la'a noha-rai maka olieta-patiouga yoma rhoitio'or doin olek O' wa.

⁸ Ray-ray marna-wuhura noha wawannu, me o'ta-mata honona la'pa limni-rorni, de a up mamni-tgar mamni honona la'pa makden Yahudi a hononami amler la molmola-mama'a onnila amhi'a oleka do'a-hal tiy O wa, Matroma.

⁹ Ami edonna matlina-matail tiy O'a, Matroma, mere emkade ho'mana, O de Uplerlawan mamni de O ralammu npenpuen niohor ma'ta sniayanmu mai ami pa Mumou-muwitna do'a-hal mamni.

¹⁰ Orgahi-Orha'u ne! Omhuopan pa makwohorulu-ktatrulu mak krima-kre' O'a re rakot nohora O deulu-tatarmu mai ami mere ami edonna matlina-matail tiy O'a, a Uplerlawna mamni O'a.

¹¹ Makden Israel ami, matlin onkerna-ma'ota watu. Ami edonna matlin la mak ha Mukota re mere ampir dioin la talan mak kaplola. Amhi' do'a-hal olek tiy O wa. Hade pede O mliawrernia niukum lawna mai ami, de niukum maka ha rakot targa la'a Musa, maka Omhuopan de, pukni ralamni. Yoma niukum de ed maka Omliokar nohora Miwra he' ed maka kmalawan la O'a pa khi'a do'a-kyap hiala de hota rlernana.

¹² Niukum maka Omua mutni-mdahla am die edonna nparei-npahal la la'a hya' maka ha Mukot targa oleka wa la'a amora a o'ta-mat mamni. Omliawrernia letlawna Yerusalem nor wutga rimormior ami honona nniutanni-dniahlani de narehi-nalawan momuoulia la' noha-rai honona makden la noheri woru mai lyanit di nayanni.

¹³ Niukum honona maka ha rakottarga la'a Musa pukni de Omual oleka la mai am pia. Mere la emkade ho'mana Matromlawnu ne! Ami e mpayotil ma'ta O ralma-rior kalwiedmu mere ami mtorn apit mua'ta a do'a-hal mamni, me ami edonna mtailla O nnio'omu-niatmu nora O wniatutmu-wniaye'emu.

¹⁴ Pede Matromlawnu ne! Omliawrerni oleka nniutanni-dniahlani de mai ami Mliernohora hya' maka ha Mukot oleka wa. Hihi'imu-yapyapmu de naplol toto' memna la geni. Yoma ama'o'ta watu pa ami edon matlina-matailla O'a, a Uplerlawan mamni.

¹⁵ Mere Matromlawnu ne! La' ler ululu de Omtiutg oleka O plolmu la'a O tnioranmu-riautmu pa Omuodia O rimormiormu pa amlergot la Mesir, me plolmu-mnehemu de riy rhoratrer mia'ta. Mere mai am die, amhi'a do'a-myap hiala.

¹⁶ Onnila a do'a-hal mamni rora a upmamni-tgar mamni do'oni-halli pede riy makdella noha-rai mak krehorgoru re rakleha nhiu'ru-nhielma yatota-yawawa la Yerusalem nora rimormiormu ami. Mere Yerusalem de O letmu me O genmu rdella wo'ormu Sion. Matroma, Omhi'a-myap reria hya' ed mak kaplola-kamneha. La' hade pede Matrome, herwali Muwenan lawan la'a Yerusalem O letmu-ruhunmu de!

¹⁷ Matromlawnu ne! Mhueri tlinmu la hopopanmu a' sniumbainu maka a'g e puolu-wuak tiy O' di. Mtiulan pa Mtiutga ralam kalwiedmu owa'an la mai am pia Mkieni owa'an rommu maka ha rweyata-rwaniawu diella la'a genni totpena riy honona ratga de Uplerlawna O inhatta.

¹⁸ Mhueri tlinmu-mpual miatmu mai ami Uplerlawnu nee! Mumkek la amalui-manuhru nohora O letmu maka ha rweyata-rwaniaga de. Amsumbain la O' de, edonna riwra yoma la'a hya' maka amhi'a-myapia ed maka kaplola, mere onnila O' nanpena ed maka ktutga ralam kalwiedmu mak kareh mieman de mai ami.

¹⁹ Mhueri tlinmu-mpual miatmu mai ami! Yana Mhuoratreria a do'a-hal mamni! Pleta-plet pa Mtiulan nan mai ami ee! Totpena riy honona rwer matni la O'a, yoma Uplerlawna O' inhatta me Yerusalem nora O rimormiormu am di, de O' orgahamu Mpualir niana totpena Mhi'a la O gah wuamuehemu!”

Gabriel nma nwe'er nohora hya' maka Daniel natiana

²⁰ Asiumbain pa nodi liarni pa ukot nohora a do'u-ha'lu nor wutga a rimormio'ru Israel re do'oni-halli me awuak la Uplerlawna, a Matromlawnu totpena E roma kreini makdella Sion, E wo'orni de, nwali owa'an emek ululu.

²¹ La'pa a'g e siumbain reri de Gabriel mak yamkekni emeka riy ida, me maka a'umkek ulga la' a yamke'ku ralamni de, nnem de meranni pa nmai, la'pa riy e rtepartarlia rala himima-rere'a hoihoi-tantiani la'a Uplerlawna roma kreini la'a lera nhierni.

²² Noma Gabriel nakot emkadilla mai a'u niwra: “Daniel e! Amuai totpena ghima-rie' o la'a hya' maka ha mpuarora de totpena mnia'erit nana.

²³ La' ler maka na'nama ompuak toto' memna la Uplerlawna, de la' ler de meman pa Uplerlawna Nhopan doin a' pua mua ukot nohora tiy o'a la'a hya' maka E Niwra Nhi'a-nyapia. Enhopan doin a' muai yoma Nsayn reri o'a. Mtia'wa tlinmu pa mutlina la hya' mak aukota la'a makwohorulu-ktatrulu Yermia yamkekni de nnia'eratni.

²⁴ Uplerlawna Net tiarga oleka de anni wo'itu nti'il nana la terampwo'itu (7x70 tahun), totpena la'a anni-anin ralamni re E Namou-nawitna o rimormiormu ror wutga letlawanmu maka Uplerlawna geni lululli etla de. Hota rwe'er doin miy lia do'omi-halmi yatyatmi-halalmi honona totpena hare honona rhap dioinia la. Hota miy edon mhi' o'ta-wat lia Uplerlawna owa'ana. Mere Uplerlawna Nhi' miy pia mimdiella plol wawannu me hota Ntorna-nrautu de nodi plola-mneha pa nodi liarni. Emkade totpena hya' maka makwohorulu-ktatrulu ramkek nana la mi'ini ralamni de, de rtutu-rte'ewa, me Uplerlawna roma kreini de rhi' amou-awitn totpa rnairia owa'ana.

²⁵ Totpa muatga me mnia'erit nana: La'awa la'a lera ha ralgota tita pa rariri owa'ana Yerusalem pa rwei-rnara riy memeh maka Uplerlawna ha Nwaliria pa nodi plolli de, de anni wo'itu nti'il nan wo'itu (7x7 tahun) hota rlardioinla. La'pa nalo'on nana anni terampwonema wehrani woru nti'il nana la wo'itu (62x7 tahun) die, de loi-talla rhi' owa'ana me Yerusalem lutur watu liawanni maka kle'lu reria letlawan de hota rhi' aruri owa'ana mere la' ler de de noha nler la kropna-krieutnu.

²⁶ La'pa anni terampwonema wehrani woru nti'il nana la wo'it die nhi'pa nhorwua noma rwunu-rwenna riy maka Uplerlawna ha Nwalir pia nodi plolli de, la'pa tamkeka de edonna nhal nekane rwenna. Noma ray mak kawunu-ka'ara ida nmai nor wut nieka kekni-rawutnu re, de ruri-lai npenpuen lia, pede ntiwru-ngor targa Yerusalem nor wut nieka Uplerlawna roma kreini. La'pa nodi liarni la'awa tuwu die hohoni de wunu-ara emeknekama ger wawuau mak kluh'ni-kweran momuou, pa emeka Uplerlawna Net tiarg oleka wa.

²⁷ Ray die nor wutga riy harahu makden hande rhi' kniohlima totpa idma nhi' mak kalwiedwed lia ida, la' anni wo'itu ralamni mere la'pa anni wo'it die edon rlardoin ma'ta, yoma ntut to'ola anni wotelu reheni, de ray die nwaldoinia pa nlarna yana rhi' neka himima-rere'a hoihoi-tantiani la Uplerlawna roma kreini. La'pa edon nalo'on wali ne nhopan pa rariria hadom la' hande' mak khi' akdeha-aktiahlia gen lululi la Uplerlawna roma kreini ralamni nhi'nande Uplerlawna Nawenna. Mere ray die nden nek la hande pa la'pa ntutu-nte'ewa la' ler maka nler la yatyatni-halalli yatlorni-yatra'ani yoma Uplerlawna Nakottarg oleka pa hota nlernan niukum mak emkade.”