Dan. 8 - Alkitab bahasa Luang

Daniel yamkekni la duma muanu nora pipi muanu

¹ La anni wotellu la ray Belsyasar nodi plolli la' Babel de Daniel a liernana owa'ana yamkeka, hade de yamkeka re'eni wornu.

² La' a yamke'ku de, de umkeka a'g etla lodna-hairi Persia letlawanni ida de nwawa Susan. Letlawna Susan di de etla propinsi Elam. Ne rhi'a letlawanni de rnairia lutur watu liawanni maka kle'lu reria let de la' letgarni. De a'g e uprir lia' ger wawuau id onni. Ger de rpolga la Ulai.

³ La'pa atiutrier lia ger wawuau die onni de umkek nana duma muanu ida, de nnairia dudallu woru die plahwa. Dudallu id de naplahwa narehi dudallu handina. Mak kaplahwa rehia de warwuaru mua'ta yoma nmori tawli'iru.

⁴ De umkek reria duma muan die nwadudul la walli warta, ra'i me tranna. La'a hamormiori id mana edonna ntutur nana. Ta'enniana ralewan nan ir la duma muan die. Nhi'a-nyap die nden nek la e wa ne rurni-laini na'ititar rer lia.

⁵ La'pa a'g e lina-muat nohora, dewade umkek nan targho'a pipi muanu ida nwatiawu la' nohkerna-rai miarna uhunu-ewatni ewatni-lahwani pa nmai. La'pa a'g e umkek reri mia'ta de pipi muan die nwatiawu walli warta pa nokria gen miaka a'g e tutrier die. Namermeran la yawlari nande lakni edonna nlok la tani. La'a matni rora rletni de dudallu ida nmeh'a namemieheiya.

⁶ Pipi muan die nwakriania duma muan mak krehgorgorga ger wawau die na'nama pip die nawlar nodi meranni pa ntai tiemna dum de.

⁷ De a'umkek tertehra pipi muan die nakapliahan nan de notil doinia duma muan die pa nhi' watia dudallu rora. Duma muan die nmatloi-nmatlawar pa edonna nwadudlu. Ne nodia du'urnu pa nanhiokal la tani wawannu dewade pipi nwatei-nwahapra la genni, ne riy id mana edonna nma ntulan la dum de.

⁸ Pipi muan die rurni-laini yeher to'a pa na'itar la, mere la'pa nler la gen tiutul maka enodi plolli dewade dudul lalawanni de npat niana. Noma dudallu wogata rmori owa'an la'a dudul mak kpat die genni, de nmeha namemieheiya me naplalahwa, ne dudallu ida napali warta, id napali ra'i, id napali tranna, id napali tipru.

⁹ La' dudlu wogata re de dudlu ida nasil nana dudul ku'a ida, pa nlawlawan lol pa nreh nian momuoga dudlu korni re pede la'pa niwra nwadudul de, nokria la' wali tranna, me wali tipru la'pa ntutu mueman la noha-rai Israel, de gen miaka riy rapili-rahniaria (tempat orang pilih).

¹⁰ Dudul de yeher to'ama nlawlawan lola ne hota narur pia nlewria makodi keki-rautu la'a Ilyamou-Watyatoha mak ha riwra wtiona riwnu-halli pa nhi' nan de wtiona dom de rtuin la tani wawannu na'nama nwatei-nwahapra.

¹¹ La' walia nran inonni pa nmalawan la Makhi' o'tani la makodi keki-rautu la'a Ilyamou-Watyatoha, pa nlarna rimormiori totpa yana rala himimni-rere'eni hoihoi-tantiani la Uplerlawna maka nhi'inde irala la lera-lera. Ne nariria hadom mak khi' akdieha-ktiahli Uplerlawna roma kreini die.

¹² Dudul mak kmalawan Uplerlawna de nhi' do'a-hala. Mere Uplerlawna Nolin doinia pa nodi plolli la E rimormiorni. Pede edonna ral owa'an himimni-rere'eni hoihoi-tantiani maka Uplerlawna Nakottaru re. La' emkade pede Uplerlawna deullu-tatarni re riy edonna rha'wa nana. Mere hya' maka dudul nhi'a-nyap die nden nek la e wa me nler nek la ga'a.

¹³ Nhor nioma utlin nana Uplerlawna hopopanni-lili'irnu woru e raltieri. Noma ida nakot owa'an la mutwualli niwra: “Hota hihi'a-yapyap yatyata mak kayamkeka re mowen nianpena ha rhor wua? De la'a hya' ler nanpena mak kmalawan la Uplerlawna me khi' akdieha-ktiahli roma kreini de, rkuh dioinia-rho'or doinia totpa ral owa'an la himima-rere'a hoihoi-tantiani mak kaplollola rella Uplerlawna roma kreini? Hota mowen nianpena rollia Uplerlawna rimormiorni ror wut nieka roma kreini totpa yana rler owa'an la wniatei-wniahaparni de?”

¹⁴ Noma utlin reria Uplerlawna hopopanni-lili'irnu handina nwalola niwra: “Hota plahwani de, la'a lera ntuini la'pa repar doin owa'ana la re'eni riwnu woru rahu wotelu de edonna rala himima-rere'a hoihoi-tantiani mak kaplollola rella Uplerlawna roma kreini. Hade nhor nianpena rhi' amou-awitn owa'ana Uplerlawna roma kreini.”

Lili'iru-hopopna Gabriel nakot nohora yamkek de nnia'eratni

¹⁵ La'pa Daniel, a'g e lina-muat nohora me atia'wa reria a tlinu la yamkek de nnia'eratni, dewade plinu-plinniama emolmolan nekama riy ida e ntutrier lia a ga'yu ralamni.

¹⁶ Dewade utlin de lira nwatiaga ger wawuau Ulai walli de nhaun pa niwra: “Gabriel, mukot nohora yamkekni de nnia'eratni la.”

¹⁷ Dewade Gabriel mak ktutrier lia a ga'yu ralamni de nwakriania a wua. Aumta'at nande pleta-plet pa awualtiora-wualtieman pa rernu ntutu mueman la tani wawannu. Noma Gabriel nakot ma'u niwra: “Oi! Rimormiori ee! Totpa muatga, la hya' maka ha mumkek de, de rlernana la' lera noha niatni!”

¹⁸ La'pa naltiertier mia'ta dewade a ga'yu nmokal pa uplinga aliolola. Mere nte'la la a li'mu pa upriri owa'ana na'nama niwra:

¹⁹ “Hya' maka omumkeka la yamkeka ralamni de Uplerlawna Netlia pa hota ntutu-nte'ewa la lera noha niatni, de la' ler maka Uplerlawna hankeranni-ralmha'arni ntuin la nohkerna. Amuai pia ukot nohora hari honona tiy o'a.

²⁰ La'pa duma muan muaka mumkek de, de dudallu worga hare. Hade nnia'eratni de, lodna-hairi Media nora Persia.

²¹ La'a pipi ltiata (muanu) de ntutga de lodna-hairi Yunani, me dudallu mak kareyeh lia la'a matni rora rletni de de makden Yunani rayni mak kala'ulu inhata.

²² Me la'a dudallu mandadatni maka kmor pia kwau dioinia dudul meheni de nnia'eratni de hota lodna-hairi Yunani ema rhakre'era la'a nhiakra wogata, mere id mana hota edonna narur niana lodna-hair mak kala' ul die.

²³ Hota la'pa lodna-hairi wogata re rhi' pa rmol wua, de yeher to'ama lodna-hairi re rimormiorni do'oni-halli re ra'ititar rer lia liawanni, noma hota ray kapliahan mera ida nha'at owa'an de na'o'ta tehra, me nwaklili-nwakdior liawna.

²⁴ Hota yeher to' pa rurni-laini na'ititar rer lia. Mere rurni-laini de edon nwatiawua inon wamueheni. Pa nhi'a wnieyata-wnianiawua maka tamkeka de it tmati'ira. La'a hya' to' mak ha nhi'a-nyapi re de nden nek la e wa me nler nek la ga'a. Hota nwunu-nwenna o'ta-mata mak karuri-kalai ror wutga Uplerlawna rimormiorni.

²⁵ Yoma yatnu plokra wotwotarni-hawuautnu ho'mana riy raplinga. La' ralma-riorni de e ed makodi plolli. La' pa riy rdella mtiertieranu, ne edonna ramta'ata de plin-plinniamde enodia iwarni-wo'orni (rurni-laini) pa nwunu-nwenan riy harahu. Rereh nianama, e' nekde namer matni la Uplerlawna makla' Ray Makarehi-Kalawna. Mere hota riy ida edonna nheik la mano, hota plin-plinnianama Uplerlawna Nwakoha-nwananin memna ray die.

²⁶ Yamkeka la'a himima-rere'a hoihoi-tantiani maka rlarna pa rodia la'a lera ntuini me repardoini de hota ntutu-nte'ewa pa emeknekama a'ukot oleka de, mere hota mahnek ma'ta nanpena ha rayamkeka pa yana mpuahaur nohor ma't la riy ida.”

²⁷ Nhor nioma a'u'eram de ino'nu nakleh ruri me namehra la' lera ida-woru. Nhor diewade a'uwal pia ghi' owa'an la a knia'ru de la ray. Mere a ihru ntepul mamain la hya' maka umkek oleka re, me uplinu-uplo' nohor ma'ta yamke'ku de nnia'eratni.